АҚШ президенті Дональд Трамп Израиль президенті Ицхак Герцогты сынға алып, оны «әлсіз әрі дәрменсіз» деп атады, деп хабарлайды "Адырна" ұлттық порталы.
Трамптың айтуынша, Герцог Израиль премьер-министрі Биньямин Нетаньяхуды кешіруге уәде берген, алайда бұл сөзінде тұрмаған.
«Ол маған бірнеше рет кешірім жасайтынын айтты, бірақ өтірік сөйледі. Ол – көшбасшы емес», – деді Трамп.
Сонымен қатар, ол Нетаньяхуға қатысты сот процесі әскери әрекеттерге кедергі келтіріп отырғанын мәлімдеді.
"Ол соғысқа назар аударуы керек, мұндай істерге емес", – деп пікір білдірді.
Өз кезегінде Израильдің жоғары лауазымды шенеуніктерінің бірі Трамптың мәлімдемесін жоққа шығарып, Герцог ешқашан мұндай уәде бермегенін айтты. Оның сөзінше, президент тек заң аясында бұл мәселені қарастыру мүмкіндігін ғана атап өткен.
Айта кетейік, Биньямин Нетаньяху сыбайлас жемқорлыққа қатысты бірнеше іс бойынша айыпталып отыр. Сот процесі ұзақ уақыттан бері жалғасып келеді.
