Алғаш рет Моңғолияда «Моңғол жылқышылары» атты ұлттық форум өтті, деп хабарлайды «Адырна» тілшісі.
Іс-шараға 21 аймақ пен сомоннан келген 800 жылқышы қатысқан. Президент Ухнаагийн Хурэлсух моңғол халқының жылқы мәдениеті мен дәстүрінің дамуына зор үлес қосқанын атап өтіп, оны сақтау және әлемге таныту ісінде жетекші рөл атқаруы тиіс екенін айтты.
Мемлекет басшысы моңғол жылқышылары бірегей жылқы шаруашылығы мұрасының сақтаушылары екенін, оның ішінде моңғол жылқысының шығу тарихы, оны күтіп-баптау, ауруларын емдеу, атқа мінуді үйрету, жүйрік аттарды іріктеу және ат әбзелдерін жасау сияқты дәстүрлер қамтылатынын жеткізді.
Президент заманауи ғылыми жетістіктерді пайдалана отырып жылқыларды емдеу әдістерін дамыту қажеттігін, сондай-ақ ғалымдармен тығыз ынтымақтастық орнатудың маңызын айтты. Сонымен қатар ол жылқы мұрасын әрі қарай жетілдіру және оны болашақ ұрпаққа жеткізу үлкен жауапкершілік екенін ерекше атап өтті. Одан бөлек, бапкерлер мен шабандоздардың этикасы мен адалдығы ұлттық «Наадам» мерекесін әділ әрі абыройлы ұйымдастыруда және оның дәстүрін сақтауда маңызды рөл атқаратынын жеткізді.
Әлемдегі шамамен 60 миллион жылқының 9 пайызы, яғни 5 миллионнан астамы Моңғолияда шоғырланған. Ел жылқы саны бойынша әлемде төртінші орында, ал халық санына шаққандағы жылқы үлесі бойынша бірінші орында тұр.
Өткен жылы Біріккен Ұлттар Ұйымының Бас Ассамблеясы президент Ухнаагийн Хурэлсухтің Бүкіләлемдік жылқы күнін белгілеу жөніндегі бастамасын қолдап, бұл шешім жылқының адамзат тарихындағы маңызының жаһандық деңгейде мойындалғанын көрсетті. Осыған байланысты әлем елдері 11 шілдеде, моңғол ұлттық «Наадам» мерекесі күндері бүкіләлемдік жылқы күнін атап өтетін болады.
2013 жылы Ұлан-Батыр маңындағы Хой долоон худаг аймағында 10 мың шабандоздың шеруі және 4 мың жүйрік ат қатысқан жарыстар өтіп, Гиннестің рекордтар кітабына енгізілген еді.
Форумда «Бүкіләлемдік жылқы күні – Моңғолия бастамасы», «Жылқышылардың алдында тұрған мәселелер және оларды шешу жолдары», «Жылқы тұқымын сақтау, асылдандыру және бәйге спортын дамыту», «Мал шаруашылығына арналған экологиялық 8 тәсіл мен шешім», «Морин хуур өнерін жылқы мәдениетімен ұштастыру» және «Жылқыларды емдеу әдістері» тақырыптарында баяндамалар жасалып, пікірталастар өтті.
