Қырғызстанның Баткен ауданындағы Андиген жайлауында I–II ғасырларға жататын тарихи ескерткіштерге археологиялық қазба жұмыстары жалғасып жатыр. Бұл туралы Баткен аудандық ішкі істер бөлімі айтты, деп хабарлайды «Адырна» тілшісі.
Полиция мәліметінше, қазба жұмыстары ғұндардың жерлеу орындары орналасқан тарихи-археологиялық ескерткіштері бар Самарқандек ауылдық аймағында жүргізілуде.
Самарқандек полиция бөлімшесінің қызметкерлері археологиялық экспедиция мүшелерімен профилактикалық кездесу өткізіп, өзара құқықтарды құрметтеу, құқық бұзушылықтарға жол бермеу және қауіпсіздік талаптарын сақтау қажеттігін түсіндірді. Сондай-ақ таулы аймақта жүру ережелеріне ерекше назар аударылып, қауіпті аумақтарға бармау керектігі ескертілді.
Қазіргі уақытта археологиялық топ құрамында 28 адам жұмыс істеп жатыр. Оның төртеуі — жергілікті тұрғындар, ал қалғандары – Баткен мемлекеттік университетінің, Жалал-Абад мемлекеттік университетінің және Ош мемлекеттік университетінің студенттері. Археологиялық қазба жұмыстарына ғалым Хадиша Ташбаева жетекшілік етеді.
