Франция Украинаға 195 миллион еуро көлемінде қару-жарақ пен оқ-дәрі жеткізеді. Бұл қаржы Ресейдің бұғатталған активтерінен түскен пайыздық табыс есебінен бөлінеді, деп хабарлайды "Адырна" ұлттық порталы.
Бұл туралы Францияның қорғаныс министрі Себастьян Лекорню Tribune Dimanche басылымына берген сұхбатында мәлімдеді.
Министрдің айтуынша, бөлінген қаражат Украинаға 155 мм калибрлі снарядтар мен AASM басқарылатын бомбаларын жеткізуге жұмсалады. Бұл бомбалар Mirage 2000 жойғыш ұшақтарында қолданылады.
Жуырда Украина қарулы күштері Франция берген Mirage 2000 ұшақтарын алғаш рет қолданғанын хабарлады.
Бұған қоса, Лекорню Париждің Украинаға AMX-10RC танктері мен VAB бронетранспортерлерін жіберуді жеделдететінін айтты.
Айта кетейік, арнайы әскери операция басталғаннан кейін АҚШ, G7 елдері мен Еуроодақ Ресейдің 300 миллиард еуроға жуық валюталық резервтерін бұғаттады. Оның ішінде 200 миллиард еуро ЕО аумағында, әсіресе Бельгиядағы Euroclear есеп айырысу жүйесінде сақтаулы.
