Алматыда тепловоз бен маршруттық автобустың соқтығысуы салдарынан алты адам зардап шекті. Бұл туралы қалалық полиция департаментінің (ПД) баспасөз қызметі мәлімдеді, деп хабарлайды “Адырна” ұлттық порталы.
«Жергілікті полиция қызметінің кезекші бөлімі хабарлағандай, жол-көлік оқиғасы бүгін сағат 11:40-та Алматының Алмалы ауданында болған. Солтүстік бағытта Әуезов көшесімен жүріп келе жатқан жеке тасымалдаушыға тиесілі 88-бағыттағы автобус Гоголь көшесінен солтүстікке қарай теміржол бойымен батысқа бағыт алған тепловозбен соқтығысқан. Алдын ала мәлімет бойынша, жол апатының салдарынан қоғамдық көліктің алты жолаушысы зардап шекті», – делінген сейсенбі күнгі хабарламада.
Зардап шеккендерге медициналық көмек көрсетілгені атап өтілді.
«Апаттың басқа да мән-жайлары анықталуда», – деп қосты ПД.
