اقش-تىڭ ستراسبۋرگ قالاسىنداعى فەدەرالدى سوتى گارۆارد ۋنيۆەرسيتەتىنە قاتىستى قابىلدانعان شەكتەۋ شارالارىنىڭ كۇشىن ۋاقىتشا توقتاتتى، دەپ حابارلايدى “ادىرنا” ۇلتتىق پورتالى CNN-گە سىلتەپ.
بۇل شەشىم گارۆارد ۋنيۆەرسيتەتىنىڭ دونالد ترامپ اكىمشىلىگىنە قارسى سوتقا ارىزدانۋىنان كەيىن بىرنەشە ساعات ىشىندە قابىلدانعان.
22 مامىردا اقش ىشكى قاۋىپسىزدىك مينيسترلىگىنە قاراستى شەتەلدىك ستۋدەنتتەر مەن الماسۋ باعدارلاماسى (SEVP) گارۆاردتى جۇيەدەن شىعارۋ تۋرالى شەشىم قابىلداعان. وسىعان بايلانىستى ۋنيۆەرسيتەت شەتەلدىك ستۋدەنتتەردى قابىلداۋ قۇقىعىنان ايىرىلىپ، قازىرگى ءبىلىم الىپ جاتقان ستۋدەنتتەرگە باسقا وقۋ ورنىنا اۋىسۋ نەمەسە ەلدەن شىعۋ مىندەتى جۇكتەلگەن.
گارۆارد ۋنيۆەرسيتەتى بۇل شەشىمدى زاڭسىز دەپ تانىپ، سوتقا شاعىم ءتۇسىردى. ۋنيۆەرسيتەتتىڭ رەسمي مالىمدەمەسىندە بۇل ۇكىمەت ارەكەتى “گارۆاردتىڭ اقش كونستيتۋتسياسىنىڭ ءبىرىنشى تۇزەتۋىمەن بەكىتىلگەن قۇقىقتارىن پايدالانىپ، وقۋ باعدارلاماسى مەن باسقارۋعا ۇكىمەتتىڭ ارالاسۋ تالابىنان باس تارتقانى ءۇشىن جاسالعان كەك الۋ ارەكەتى” دەپ باعالانعان.
ۋنيۆەرسيتەت پرەزيدەنتى الان گاربەر بۇل جاعدايعا بايلانىستى مالىمدەمە جاساپ، گارۆارد قاۋىمداستىعىنا شەتەلدىك ستۋدەنتتەر قۇقىعىن قورعاۋ ءۇشىن بارلىق قاجەتتى قادامدار جاسالاتىنىن جەتكىزدى.
الايدا اق ءۇي گارۆارد باسشىلىعىن سىنعا الىپ، “بۇرىنعى ۇلى وقۋ ورنىن انتيامەريكاندىق، انتيسەميتتىك جانە تەرروريستىك ناسيحات ورتالىعىنا اينالدىردى” دەپ ايىپتادى. سونىمەن قاتار، شەتەلدىك ستۋدەنتتەردى قابىلداۋدى “قۇقىق ەمەس، ارتىقشىلىق” دەپ اتادى.
ايتا كەتەيىك، 2024–2025 وقۋ جىلىندا گارۆارد ۋنيۆەرسيتەتىندەگى شەتەلدىك ستۋدەنتتەردىڭ ۇلەسى 27,2%-دى قۇراپ وتىر.
