Грузия астанасы Тбилисиде наразылық акциясы кезінде адамдар президент сарайының қақпасын сындырып, күзетшілерге шабуыл жасады, деп хабарлайды "Адырна" ұлттық порталы Georgia Online-ға сілтеме жасап.
Оқиға барысында арнайы жасақ пен жүздеген патрульдік полиция қызметкерлері оқиға орнына келіп, наразыларға қарсы көзден жас ағызатын газ қолданған. Сондай-ақ бірнеше адам ұсталғаны хабарланды.
Кейін демонстранттар полицияға пиротехникалық заттар лақтырған, ал тәртіп сақшылары су атқыш құрылғыларды пайдаланған. Жарақат алғандар бар екені айтылды.
Грузия Ішкі істер министрлігі DW-ге берген түсініктемесінде акцияның заңмен рұқсат етілгенін, бірақ ұйымдастырушылар тарапынан зорлыққа шақыратын үндеулер айтылғанын мәлімдеді.
Наразылықтар Тбилисидің орталығында муниципалдық сайлау кезінде өтті. Демонстранттар биліктегі партия мен оның жетекшісі Ираклий Кобахидзенің Ресеймен байланысына қарсы шыққан.
Сенбі күні жүздеген адам Меликишвили даңғылынан Руставели даңғылындағы парламент ғимаратына дейін шеру жасап, кейін сол жерде жиналуды жалғастырған.
Экс-президент Саломе Зурабишвили жергілікті сайлау күні өтетін наразылық акцияларын алдын ала жариялаған болатын. Paper Kartuli басылымының мәліметінше, бұл жолғы акцияға қатысушылар саны соңғы уақыттағы көрсеткіштерден әлдеқайда көп болған.
Грузияда наразылықтар соңғы бір жыл бойы жалғасып келеді. Наразылардың басты талабы — жаңа парламенттік сайлау өткізу.
