گرۋزيا استاناسى تبيليسيدە نارازىلىق اكتسياسى كەزىندە ادامدار پرەزيدەنت سارايىنىڭ قاقپاسىن سىندىرىپ، كۇزەتشىلەرگە شابۋىل جاسادى، دەپ حابارلايدى "ادىرنا" ۇلتتىق پورتالى Georgia Online-عا سىلتەمە جاساپ.
وقيعا بارىسىندا ارنايى جاساق پەن جۇزدەگەن پاترۋلدىك پوليتسيا قىزمەتكەرلەرى وقيعا ورنىنا كەلىپ، نارازىلارعا قارسى كوزدەن جاس اعىزاتىن گاز قولدانعان. سونداي-اق بىرنەشە ادام ۇستالعانى حابارلاندى.
كەيىن دەمونسترانتتار پوليتسياعا پيروتەحنيكالىق زاتتار لاقتىرعان، ال ءتارتىپ ساقشىلارى سۋ اتقىش قۇرىلعىلاردى پايدالانعان. جاراقات العاندار بار ەكەنى ايتىلدى.
گرۋزيا ىشكى ىستەر مينيسترلىگى DW-گە بەرگەن تۇسىنىكتەمەسىندە اكتسيانىڭ زاڭمەن رۇقسات ەتىلگەنىن، بىراق ۇيىمداستىرۋشىلار تاراپىنان زورلىققا شاقىراتىن ۇندەۋلەر ايتىلعانىن مالىمدەدى.
نارازىلىقتار ءتبيليسيدىڭ ورتالىعىندا مۋنيتسيپالدىق سايلاۋ كەزىندە ءوتتى. دەمونسترانتتار بيلىكتەگى پارتيا مەن ونىڭ جەتەكشىسى يراكلي كوباحيدزەنىڭ رەسەيمەن بايلانىسىنا قارسى شىققان.
سەنبى كۇنى جۇزدەگەن ادام مەليكيشۆيلي داڭعىلىنان رۋستاۆەلي داڭعىلىنداعى پارلامەنت عيماراتىنا دەيىن شەرۋ جاساپ، كەيىن سول جەردە جينالۋدى جالعاستىرعان.
ەكس-پرەزيدەنت سالومە زۋرابيشۆيلي جەرگىلىكتى سايلاۋ كۇنى وتەتىن نارازىلىق اكتسيالارىن الدىن الا جاريالاعان بولاتىن. Paper Kartuli باسىلىمىنىڭ مالىمەتىنشە، بۇل جولعى اكتسياعا قاتىسۋشىلار سانى سوڭعى ۋاقىتتاعى كورسەتكىشتەردەن الدەقايدا كوپ بولعان.
گرۋزيادا نارازىلىقتار سوڭعى ءبىر جىل بويى جالعاسىپ كەلەدى. نارازىلاردىڭ باستى تالابى — جاڭا پارلامەنتتىك سايلاۋ وتكىزۋ.
