«AMANAT» партиясы фракциясының мүшесі Әбутәліп Мүтәлі премьер-министр Олжас Бектеновке жоғары оқу орындарының сапасын бақылауды цифрландыру туралы депутаттық сауал жолдады, деп хабарлайды «Адырна» тілшісі.
Депутаттың айтуынша, соңғы жылдары жоғары және орта білім беру жүйесінде алаңдатарлық мәселелер көбейген. Атап айтқанда, кейбір жекеменшік университеттер мен колледждерде студенттер ресми түрде тіркелгенімен, олардың оқу процесіне нақты қатысуы мен білім бағдарламаларын меңгеруі жеткілікті деңгейде бақыланбайды. Соның салдарынан студенттер сабаққа қатыспаса да немесе оқу талаптарын толық орындамаса да, диплом алып шығу фактілері кездеседі.
«Болашақта мұндай қағаз жүзінде ғана кәсіби мамандар жетістікке жете қояды деп сену қиын. Керісінше, өмірін жеңілдетемін деп кейін жұмыссыздық нарығын толтырып, мемлекеттің әлеуметтік бағдарламаларының көмегіне тәуелді болып қала ма деген күдік бар. Ең сорақысы, академиялық жүйеге хакинг жасадым деп жүрген мамандар жалпы отандық университеттер қауымдастығының имиджіне залал келтіреді. Бұл жасанды шындық үкіметтік бақылау нәтижелерімен расталды. Уәкілетті органның мәліметі бойынша, соңғы жылдары 25 университеттің 60 лицензиялық қосымшасы тоқтатылған болатын. Демек, саладағы жүйелі құқық бұзушылықтарды жою мен бақылау тетіктерін күшейту бойынша тиянақты жұмыс қажет»,– деді ол.
Әбутәліп Мүтәлі білім сапасын бақылаудың дәстүрлі әкімшілік тәсілдері бүгінгі күні жеткіліксіз екенін атап өтті. Оның пікірінше, цифрландыру дәуірінде қағазбастылықтан арылып, заманауи технологияларды енгізу қажет.
«Аралық және қорытынды емтихандар мен аттестацияларды цифрландыру ерекше маңызға ие. Прокторинг пен жеке басты сәйкестендіруді пайдалана отырып, осы рәсімдерді цифрлық форматта жүргізу білім беру процесінің ашықтығын қамтамасыз етеді, сыбайлас жемқорлық және субъективті тәуекелдерді азайтады, нәтижелерді автоматты түрде тіркейді және бағалауды қолдан өзгерту мүмкіндігін болдырмайды. Біз университеттердің әділетсіз тәжірибесіне цифрлық тосқауыл қоюымыз керек. Мемлекет ең үздік халықаралық стандарттарға сәйкес озық білім беру жағдайларын жасауы қажет.
Дәл осы цифрлық аттестаттаудың объективті нәтижелері білім беру ұйымдарының жауапкершілігін арттыру және кадрларды даярлау сапасына мемлекеттік бақылауды күшейту үшін негіз болуға тиіс. Қолданыстағы білім беру стандарттары мен бақылау тетіктері қазіргі цифрлық жүйелердің мүмкіндіктерін ескермейді. Осыған байланысты көптеген жоғары оқу орындарында білімді тексеру формалды болып қала береді және мамандарды даярлаудың тиісті сапасын қамтамасыз етпейді»,-деді ол.
Осыған орай Әбутәліп Мүтәлі Үкіметтен жасанды интеллект негізіндегі прокторинг, цифрлық сәйкестендіру және талдамалық жүйелерді міндетті түрде енгізе отырып, жоғары білімнің мемлекеттік стандарттарына өзгерістер енгізуді; жоғары оқу орындарында оқу процесін бақылау мен аттестаттауды цифрландыру бойынша нақты мерзімдері, жауапты тұлғалары және тиімділік көрсеткіштері айқындалған жол картасын әзірлеуді сұрады.
