«AMANAT» پارتياسى فراكتسياسىنىڭ مۇشەسى ءابۋتالىپ ءمۇتالى پرەمەر-مينيستر ولجاس بەكتەنوۆكە جوعارى وقۋ ورىندارىنىڭ ساپاسىن باقىلاۋدى تسيفرلاندىرۋ تۋرالى دەپۋتاتتىق ساۋال جولدادى، دەپ حابارلايدى «ادىرنا» ءتىلشىسى.
دەپۋتاتتىڭ ايتۋىنشا، سوڭعى جىلدارى جوعارى جانە ورتا ءبىلىم بەرۋ جۇيەسىندە الاڭداتارلىق ماسەلەلەر كوبەيگەن. اتاپ ايتقاندا، كەيبىر جەكەمەنشىك ۋنيۆەرسيتەتتەر مەن كوللەدجدەردە ستۋدەنتتەر رەسمي تۇردە تىركەلگەنىمەن، ولاردىڭ وقۋ پروتسەسىنە ناقتى قاتىسۋى مەن ءبىلىم باعدارلامالارىن مەڭگەرۋى جەتكىلىكتى دەڭگەيدە باقىلانبايدى. سونىڭ سالدارىنان ستۋدەنتتەر ساباققا قاتىسپاسا دا نەمەسە وقۋ تالاپتارىن تولىق ورىنداماسا دا، ديپلوم الىپ شىعۋ فاكتىلەرى كەزدەسەدى.
«بولاشاقتا مۇنداي قاعاز جۇزىندە عانا كاسىبي ماماندار جەتىستىككە جەتە قويادى دەپ سەنۋ قيىن. كەرىسىنشە، ءومىرىن جەڭىلدەتەمىن دەپ كەيىن جۇمىسسىزدىق نارىعىن تولتىرىپ، مەملەكەتتىڭ الەۋمەتتىك باعدارلامالارىنىڭ كومەگىنە تاۋەلدى بولىپ قالا ما دەگەن كۇدىك بار. ەڭ سوراقىسى، اكادەميالىق جۇيەگە حاكينگ جاسادىم دەپ جۇرگەن ماماندار جالپى وتاندىق ۋنيۆەرسيتەتتەر قاۋىمداستىعىنىڭ يميدجىنە زالال كەلتىرەدى. بۇل جاساندى شىندىق ۇكىمەتتىك باقىلاۋ ناتيجەلەرىمەن راستالدى. ۋاكىلەتتى ورگاننىڭ مالىمەتى بويىنشا، سوڭعى جىلدارى 25 ۋنيۆەرسيتەتتىڭ 60 ليتسەنزيالىق قوسىمشاسى توقتاتىلعان بولاتىن. دەمەك، سالاداعى جۇيەلى قۇقىق بۇزۋشىلىقتاردى جويۋ مەن باقىلاۋ تەتىكتەرىن كۇشەيتۋ بويىنشا تياناقتى جۇمىس قاجەت»،– دەدى ول.
ءابۋتالىپ ءمۇتالى ءبىلىم ساپاسىن باقىلاۋدىڭ ءداستۇرلى اكىمشىلىك تاسىلدەرى بۇگىنگى كۇنى جەتكىلىكسىز ەكەنىن اتاپ ءوتتى. ونىڭ پىكىرىنشە، تسيفرلاندىرۋ داۋىرىندە قاعازباستىلىقتان ارىلىپ، زاماناۋي تەحنولوگيالاردى ەنگىزۋ قاجەت.
«ارالىق جانە قورىتىندى ەمتيحاندار مەن اتتەستاتسيالاردى تسيفرلاندىرۋ ەرەكشە ماڭىزعا يە. پروكتورينگ پەن جەكە باستى سايكەستەندىرۋدى پايدالانا وتىرىپ, وسى راسىمدەردى تسيفرلىق فورماتتا جۇرگىزۋ ءبىلىم بەرۋ پروتسەسىنىڭ اشىقتىعىن قامتاماسىز ەتەدى، سىبايلاس جەمقورلىق جانە سۋبەكتيۆتى تاۋەكەلدەردى ازايتادى، ناتيجەلەردى اۆتوماتتى تۇردە تىركەيدى جانە باعالاۋدى قولدان وزگەرتۋ مۇمكىندىگىن بولدىرمايدى. ءبىز ۋنيۆەرسيتەتتەردىڭ ادىلەتسىز تاجىريبەسىنە تسيفرلىق توسقاۋىل قويۋىمىز كەرەك. مەملەكەت ەڭ ۇزدىك حالىقارالىق ستاندارتتارعا سايكەس وزىق ءبىلىم بەرۋ جاعدايلارىن جاساۋى قاجەت.
ءدال وسى تسيفرلىق اتتەستاتتاۋدىڭ وبەكتيۆتى ناتيجەلەرى ءبىلىم بەرۋ ۇيىمدارىنىڭ جاۋاپكەرشىلىگىن ارتتىرۋ جانە كادرلاردى دايارلاۋ ساپاسىنا مەملەكەتتىك باقىلاۋدى كۇشەيتۋ ءۇشىن نەگىز بولۋعا ءتيىس. قولدانىستاعى ءبىلىم بەرۋ ستاندارتتارى مەن باقىلاۋ تەتىكتەرى قازىرگى تسيفرلىق جۇيەلەردىڭ مۇمكىندىكتەرىن ەسكەرمەيدى. وسىعان بايلانىستى كوپتەگەن جوعارى وقۋ ورىندارىندا ءبىلىمدى تەكسەرۋ فورمالدى بولىپ قالا بەرەدى جانە مامانداردى دايارلاۋدىڭ ءتيىستى ساپاسىن قامتاماسىز ەتپەيدى»،-دەدى ول.
وسىعان وراي ءابۋتالىپ ءمۇتالى ۇكىمەتتەن جاساندى ينتەللەكت نەگىزىندەگى پروكتورينگ، تسيفرلىق سايكەستەندىرۋ جانە تالدامالىق جۇيەلەردى مىندەتتى تۇردە ەنگىزە وتىرىپ، جوعارى ءبىلىمنىڭ مەملەكەتتىك ستاندارتتارىنا وزگەرىستەر ەنگىزۋدى; جوعارى وقۋ ورىندارىندا وقۋ پروتسەسىن باقىلاۋ مەن اتتەستاتتاۋدى تسيفرلاندىرۋ بويىنشا ناقتى مەرزىمدەرى، جاۋاپتى تۇلعالارى جانە تيىمدىلىك كورسەتكىشتەرى ايقىندالعان جول كارتاسىن ازىرلەۋدى سۇرادى.
