ساران قالاسىنداعى Tengri Tyres شينا زاۋىتىندا ەل ەكونوميكاسىن نىعايتۋ، وتاندىق ءوندىرىستى وركەندەتۋ جانە ونەركاسىپتىڭ باسەكەگە قابىلەتتىلىگىن ارتتىرۋ ماسەلەلەرى تالقىلاندى. كاسىپورىنعا قۇرىلتاي دەپۋتاتتارى ايسۇلۋ سۇلەيمەنوۆا مەن الەكساندر دانيلوۆ، قازاقستان حالىق كەڭەسىنىڭ مۇشەلەرى ۆيتالي تۆاريوناس، ۋۆايس دجاناەۆ جانە ۆيتالي حمەلەۆسكي، سونداي-اق ۇلتتىق ەكونوميكا ۆيتسە-ءمينيسترى ەرلان ساعىناەۆ باردى.
بۇگىندە Tengri Tyres – قاراعاندى وبلىسىنىڭ ونەركاسىپ سالاسىنداعى ءىرى كاسىپورىندارىنىڭ ءبىرى. مۇندا ءوڭىردىڭ جۇزدەگەن تۇرعىنى ەڭبەك ەتەدى. زاۋىتتىڭ تىنىس-تىرشىلىگى مەن وندىرىستىك الەۋەتى وتاندىق كاسىپورىنداردىڭ ەل ەكونوميكاسىن نىعايتۋداعى ورنىن ايقىن اڭعارتادى.
كەزدەسۋ بارىسىندا ەڭبەك ۇجىمىمەن مەملەكەت باسشىسى قاسىم-جومارت توقاەۆتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىندا ايقىندالعان باسىم باعىتتار تالقىلاندى. ەكونوميكانىڭ ناقتى سەكتورىن دامىتۋ، ينۆەستيتسيا تارتۋ، ونەركاسىپ قۇرىلىمىن ءارتاراپتاندىرۋ جانە ءوندىرىس ورىندارىن تەحنولوگيالىق تۇرعىدان جاڭعىرتۋ ماسەلەلەرىنە باسا نازار اۋدارىلدى.
پرەزيدەنت ءوز جولداۋىندا ەلدىڭ ەكونوميكالىق قۋاتىن ارتتىرۋ، زاماناۋي ينفراقۇرىلىم قالىپتاستىرۋ جانە وزىق تەحنولوگيالاردى كەڭىنەن ەنگىزۋ ەگەمەندىكتى نىعايتىپ، حالىقتىڭ ءال-اۋقاتىن جاقسارتۋدىڭ ماڭىزدى العىشارتتارى ەكەنىن اتاپ وتكەن بولاتىن. سونىمەن قاتار جاڭا كاسىپورىندار اشۋ، ءوندىرىس اۋقىمىن كەڭەيتۋ جانە تۇراقتى جۇمىس ورىندارىن قۇرۋ دا ەل دامۋىنىڭ ستراتەگيالىق باسىمدىقتارى رەتىندە بەلگىلەندى.
بۇل مىندەتتەر Tengri Tyres سەكىلدى وتاندىق ءوندىرىس ورىندارىنىڭ قىزمەتىمەن تىكەلەي بايلانىستى. ساپالى ءارى باسەكەگە قابىلەتتى ءونىم شىعارۋ، ءوندىرىس ۇدەرىسىنە جاڭا تەحنولوگيالاردى ەنگىزۋ جانە كاسىپورىنداردىڭ مۇمكىندىگىن كەڭەيتۋ ونەركاسىپتىڭ ءورىسىن ۇلعايتۋعا جول اشادى. مۇنىڭ ءوزى يمپورتقا تاۋەلدىلىكتى ازايتىپ، قازاقستاندىق ءونىمنىڭ سىرتقى نارىقتاعى باسەكەگە قابىلەتتىلىگىن ارتتىرۋعا مۇمكىندىك بەرەدى.
قۇرىلتاي دەپۋتاتى الەكساندر دانيلوۆ ونەركاسىپتىڭ دامۋى، ەڭ الدىمەن، ءوندىرىس ورىندارىندا ەڭبەك ەتەتىن ادامداردىڭ كاسىبيلىگى مەن جاۋاپكەرشىلىگىنە بايلانىستى ەكەنىن اتاپ ءوتتى.
– پرەزيدەنت جولداۋى قازاقستاننىڭ الداعى دامۋ باعدارى مەن ستراتەگيالىق باسىمدىقتارىن ايقىندايدى. وندا ەكونوميكانى نىعايتۋعا، زاماناۋي تەحنولوگيالاردى ەنگىزۋگە جانە ونەركاسىپتى وركەندەتۋگە ايرىقشا ءمان بەرىلگەن. وتاندىق ءوندىرىستى دامىتۋ، جاڭا جۇمىس ورىندارىن اشۋ جانە ەڭبەك ۇجىمدارىن قولداۋ – ەل ەكونوميكاسىنىڭ تۇراقتىلىعىن قامتاماسىز ەتەتىن بەرىك نەگىز. ءاربىر كاسىپورىننىڭ جەتىستىگى، ەڭ الدىمەن، وندا ەڭبەك ەتەتىن ادامداردىڭ كاسىبي بىلىگىنە، جاۋاپكەرشىلىگىنە جانە كۇندەلىكتى ماڭداي تەرىنە بايلانىستى. سوندىقتان ءوندىرىستىڭ وركەندەۋىنە قاجەتتى جاعداي جاساپ، ءار ادامنىڭ ەڭبەگى سۇرانىسقا يە بولىپ، لايىقتى باعالانۋىنا مۇمكىندىك تۋعىزۋ – ورتاق مىندەتىمىز، – دەدى الەكساندر دانيلوۆ.
جۇزدەسۋ بارىسىندا ادامي كاپيتالدى دامىتۋ ماسەلەسى دە نازاردان تىس قالمادى. قاتىسۋشىلار زاماناۋي ءوندىرىستىڭ وركەندەۋى ينۆەستيتسيا مەن وزىق تەحنولوگياعا عانا ەمەس، بىلىكتى ماماندارعا دا تىكەلەي بايلانىستى ەكەنىن اتاپ ءوتتى. ويتكەنى جاڭا جابدىقتى يگەرىپ، ءوندىرىس ۇدەرىسىن جەتىلدىرۋ ءۇشىن كاسىبي شەبەرلىگىن ۇدايى شىڭداپ وتىراتىن، جاڭاشىلدىققا بەيىم كادرلار قاجەت.
ونەركاسىپتىڭ وركەندەۋى – مەملەكەت پەن بيزنەسكە عانا ەمەس، تۇتاس قوعامعا ورتاق جاۋاپكەرشىلىك. ال ءوندىرىس ۇجىمدارىمەن وسىنداي جۇزدەسۋلەر جولداۋدا بەلگىلەنگەن مىندەتتەردى تالقىلاپ قانا قويماي، سالا ماماندارىنىڭ پىكىرىن تىڭداۋعا، ولاردى تولعاندىرعان ماسەلەلەردى ورتاعا سالىپ، ءوزارا اشىق پىكىر الماسۋعا مۇمكىندىك بەرەدى.
