نەپالدا ەۆەرەست تاۋىنىڭ ماڭىندا ەكى تىكۇشاق سوقتىعىسىپ، سالدارىنان ءبىر ادام قازا تاپتى. تاعى ەكى ادام جاراقات الدى، دەپ حابارلايدى "ادىرنا" ۇلتتىق پورتالى.
بۇل تۋرالى اl Jazeera باسىلىمى حابارلادى.
وقيعا سەيسەنبى كۇنى ەۆەرەست بازالىق لاگەرىنەن تومەن ورنالاسقان الاڭعا ەكى تىكۇشاق قونۋعا ارەكەت جاساعان كەزدە بولعان. اپات تەڭىز دەڭگەيىنەن 4 مىڭ مەتردەن استام بيىكتىكتە ورنالاسقان پەريچە اۋىلىندا تىركەلدى.
بيلىك وكىلدەرىنىڭ مالىمەتىنشە، قازا تاپقان ادام – ءۇندىستاننىڭ 47 جاستاعى ازاماتى. جاراقات العانداردىڭ ءبىرى – جاڭا زەلانديا ازاماتى، ەكىنشىسى – نەپالدىق ۇشقىش. تىكۇشاقتاردىڭ بورتىندا بارلىعى قانشا ادام بولعانى ازىرگە ناقتىلانباعان.
وقيعاعا قاتىستى ۆيدەو الەۋمەتتىك جەلىلەردە تارادى. الدىن الا بولجام بويىنشا، اۋە كەمەلەرى ديسپەتچەرلىك مۇنارانىڭ بايلانىس اياسىنان تىس ايماقتا بولعاندىقتان، ۇشقىشتار ءبىر-ءبىرىنىڭ ارەكەتىن دۇرىس تۇسىنبەۋى مۇمكىن. اپاتتىڭ ناقتى سەبەبى ازىرگە بەلگىسىز.
ايتا كەتەيىك، ەۆەرەست ماڭىنداعى تاۋلى ايماقتاردا جول قاتىناسى شەكتەۋلى. سوندىقتان تۋريستەر مەن الپينيستەردى تاسىمالداۋ، سونداي-اق دەنساۋلىعىنا بايلانىستى ەۆاكۋاتسيالاۋ ءۇشىن تىكۇشاقتار ءجيى قولدانىلادى. اپات نەپالدا تۋريستىك ماۋسىم قىزعان كەزەڭدە بولدى.
