يسپانيادان قازاقستاننىڭ اۋە قورعانىسى كۇشتەرىنە ەكىنشى اۋىر اسكەري-كولىك Airbus A400M Atlas ۇشاعى جەتكىزىلدى، دەپ حابارلايدى "ادىرنا" ۇلتتىق پورتالى.
جاڭا اۋە كەمەسى ەلىمىزدىڭ اسكەري-كولىك اۆياتسياسىنىڭ مۇمكىندىكتەرىن كەڭەيتۋگە مۇمكىندىك بەرەدى.
A400M ۇشاقتارى اسكەري مىندەتتەردى ورىنداۋمەن قاتار، توتەنشە جاعدايلاردىڭ سالدارىن جويۋ، حالىقتى ەۆاكۋاتسيالاۋ جانە گۋمانيتارلىق كومەك جەتكىزۋ ءۇشىن دە قولدانىلادى.
قورعانىس مينيسترلىگىنىڭ مالىمەتىنشە، اسكەري-كولىك اۆياتسياسىن پايدالانۋدىڭ تاعى ءبىر ماڭىزدى باعىتى – قازاقستاندىق اسكەري قىزمەتشىلەردىڭ حالىقارالىق بىتىمگەرلىك ميسسيالارعا قاتىسۋىن قامتاماسىز ەتۋ.
«مۇنداي ساناتتاعى ۇشاقتاردىڭ بولۋى ۇلتتىق بىتىمگەرلىك كونتينگەنتتى ءوز كۇشىمىزبەن تاسىمالداۋ مۇمكىندىگىن كەڭەيتەدى»، – دەپ حابارلادى ۆەدومستۆو.
جاڭا اۆياتسيالىق تەحنيكانى باسقارۋ جانە وعان قىزمەت كورسەتۋ ءۇشىن قازاقستاندىق ەكيپاجدار مەن ينجەنەرلىك-تەحنيكالىق ماماندار ارنايى دايارلىقتان ءوتتى. ولار يسپانيانىڭ سەۆيليا قالاسىنداعى Airbus وقۋ ورتالىعىندا تەوريالىق جانە پراكتيكالىق كۋرستاردى اياقتاپ، ۇشاقتى باسقارۋ، پايدالانۋ جانە تەحنيكالىق قىزمەت كورسەتۋ داعدىلارىن مەڭگەردى.
Airbus A400M – اۋىر اسكەري تەحنيكانى الىس قاشىقتىققا تاسىمالداۋعا ارنالعان ۇشاق. ونىڭ ەرەكشەلىگى – قىسقا ءارى ارنايى جابىن توسەلمەگەن ۇشۋ-قونۋ جولاقتارىنا قونۋ مۇمكىندىگى. قازىرگى ۋاقىتتا بۇل ۇلگىدەگى اۋە كەمەلەرى قازاقستان، تۇركيا، گەرمانيا، مالايزيا، يندونەزيا، فرانتسيا، ۇلىبريتانيا، يسپانيا، بەلگيا جانە ليۋكسەمبۋرگتىڭ قارۋلى كۇشتەرىندە قولدانىلادى.
ەسكە سالايىق، قازاقستاننىڭ اۋە قورعانىسى كۇشتەرىنە ارنالعان العاشقى Airbus A400M ۇشاعى 2024 جىلدىڭ سوڭىندا جەتكىزىلگەن.
