ۋكراينانىڭ كامىشەۆاحا ەلدى مەكەنىندە مەكتەپ عيماراتىنا جاسالعان اۋە سوققىسىنان كەمىندە 26 ادام قازا تاپتى، دەپ حابارلايدى “ادىرنا”.
بۇل تۋرالى ۋكراينانىڭ توتەنشە جاعدايلار جونىندەگى مەملەكەتتىك قىزمەتى حابارلادى.
ۋكراينا پرەزيدەنتى ۆلاديمير زەلەنسكيدىڭ مالىمەتىنشە، اتالعان مەكتەپ عيماراتى گۋمانيتارلىق كومەك تاراتۋ ءۇشىن پايدالانىلعان. وقيعا كەزىندە تۇرعىندار سول جەردەن قاجەتتى كومەكتى الىپ جاتقان.
زەلەنسكيدىڭ ايتۋىنشا، اۋەلى ەلدى مەكەنگە بىرنەشە اۋە بومباسى تاستالعان. العاشقى سوققىدان كەيىن نىسانعا تاعى توعىز اۋە بومباسى، ونىڭ ىشىندە ادامدار پانالاعان ورىنعا دا سوققى جاسالعان.
ۋكراينانىڭ توتەنشە جاعدايلار جونىندەگى مەملەكەتتىك قىزمەتىنىڭ سوڭعى دەرەگىنە سايكەس، قازا تاپقاندار اراسىندا ەكى قۇتقارۋشى مەن ءتورت پوليتسەي بار. تاعى بەس ادام جاراقات العان. ولاردىڭ ەكەۋى – قۇتقارۋشى.
مەكەمە حابارلاۋىنشا، وقيعا ورنىنا قۇتقارۋشىلار مەن پوليتسيا قىزمەتكەرلەرى جەتكەن كەزدە قايتا شابۋىل جاسالۋ قاۋپى تۋىنداعان. وسىعان بايلانىستى ولار پانالاۋ ورنىنا ءوتىپ، سول ساتتە ەكىنشى اۋە سوققىسى جاسالعان.
سالدارىنان مەكتەپتىڭ سپورت زالى مەن شارۋاشىلىق نىسانى قيراپ، وقۋ عيماراتىنا زاقىم كەلگەن. سونىمەن قاتار ءورت ءسوندىرۋ-قۇتقارۋ كولىگى جويىلعان.
زاپوروجە وبلىستىق اسكەري اكىمشىلىگى باسشىسىنىڭ مىندەتىن اتقارۋشى ميحايل سەميكيننىڭ مالىمەتىنشە، ەلدى مەكەننىڭ ورتالىعىنا فاب-3000 باسقارىلاتىن اۋە بومبالارى تاستالعان. ونىڭ ايتۋىنشا، سوققى تۇرعىندار گۋمانيتارلىق كومەك الىپ جاتقان ۋاقىتتا جاسالعان. سونداي-اق درونداردىڭ شابۋىلىنا بايلانىستى قۇتقارۋ جۇمىستارى ۋاقىتشا توقتاتىلۋعا ءماجبۇر بولعان.
ازىرگە رەسەي تاراپى كامىشەۆاحا ەلدى مەكەنىنە جاسالعان اۋە سوققىسىنا قاتىستى پىكىر بىلدىرگەن جوق.
