قىرعىزستاندىق كاسىپكەر ايەل رىسگۇل اكىمجانوۆا الەمدەگى ەڭ بيىك تاۋ – ەۆەرەست شىڭىن باعىندىردى. بۇل تۋرالى Facebook پاراقشاسىندا ونىڭ كۇيەۋى، پارلامەنت دەپۋتاتى ەميل توكتوشەۆ جازدى، دەپ حابارلايدى “ادىرنا”.
ونىڭ ايتۋىنشا، رىسگۇل شىڭعا 27 مامىر كۇنى نەپال ۋاقىتىمەن تاڭعى 04:40-تا كوتەرىلگەن. «قازىر ول بازالىق لاگەرگە ءتۇسىپ كەلە جاتىر. وعان ءساتتى تۇردە تومەن ءتۇسۋىن تىلەيمىز»، – دەپ جازدى توكتوشەۆ.
رىسگۇل ەۆەرەستتى ەكىنشى ارەكەتىندە باعىندىردى. بۇعان دەيىن ول 8400 مەتر بيىكتىكتە وتتەگىنىڭ جەتىسپەۋىنە بايلانىستى كوتەرىلۋىن توقتاتۋعا ءماجبۇر بولعانىن جازعان.
ول – ەۆەرەستتى باعىندىرعان قىرعىزستاننان شىققان ەكىنشى ايەل. بۇعان دەيىن، 9 مامىر كۇنى، اسەل بايباگىشەۆا ەۆەرەستتىڭ شىڭىنا قىرعىزستان تۋىن تىككەن بولاتىن.
ەۆەرەستتىڭ بيىكتىگى – 8 848 مەتر. اكىمجانوۆا وسى شىڭدى باعىندىرعان قىرعىزستاننان شىققان التىنشى الپينيست اتاندى.
