فوتو: ButusovPlus / YouTube
ۋكراينالىق 49 جاستاعى كونستانتين ۆلاسەنكو كۋپيانسك باعىتىنداعى مايدان شەبىندە 491 كۇن بولىپ، ونىڭ جەتى ايدان استامىن جالعىز وتكىزگەن، دەپ حابارلايدى "ادىرنا" ۇلتتىق پورتالى.
اۋىر جاراقات الىپ، ەكى تابانىنان ايىرىلعان جاۋىنگەر 2026 جىلعى 4 قازاندا اۋىر جۇك درونىمەن ەۆاكۋاتسيالاندى. بۇل تۋرالى اسكەري جۋرناليست يۋري بۋتۋسوۆقا بەرگەن سۇحباتىندا ايتىلعان.
ۆلاسەنكو سوعىسقا دەيىن كەن ورنىندا جۇك كولىگىنىڭ جۇرگىزۋشىسى بولعان. 2025 جىلعى 3 ماۋسىمدا مايدانداعى پوزيتسياعا كەلگەن ول سەرىگىمەن بىرگە بەتون قۇبىردا پانالاعان. رەسەي اسكەرى درونداردى كۇشەيتكەندىكتەن، ولاردى اۋىستىرۋ مۇمكىن بولماي، ۇزاق ۋاقىت سول جەردە قالعان.
2026 جىلعى اقپاندا جاۋىنگەرلەردىڭ پاناسى سۋعا تولىپ، كەيىن شابۋىل كەزىندە سەرىگى قازا تاپقان. ۆلاسەنكو جالعىز قالىپ، اۋىر جاراقات العان. اياقتارىنداعى تىندەر ولە باستاعان سوڭ، ساۋىردە سول تابانى وزدىگىنەن اجىراپ كەتكەن. ال مامىردا ول مەتالل قالبىر اشاتىن قاراپايىم پىشاقپەن ەكىنشى اياعىن ءوزى كەسۋگە ءماجبۇر بولعان.
جەتى ايدان استام ۋاقىت جالعىز قالعان جاۋىنگەر راديوبايلانىس ارقىلى كومانديرلەرىنە اقپارات بەرىپ، پوزيتسيانى باقىلاۋدى جالعاستىرعان. ونى جەرمەن ەۆاكۋاتسيالاۋ ارەكەتتەرى ناتيجە بەرمەگەندىكتەن، اسكەري قىزمەتشىلەر اۋىر جۇك كوتەرەتىن درون ارقىلى قۇتقارۋ وپەراتسياسىن ۇيىمداستىرعان.
2026 جىلدىڭ 4 قازانىندا ۆلاسەنكو ارنايى اسپاعا بەكىنىپ، درونمەن وزەننەن اسىرا جەتكىزىلگەن. كەيىن ونى جەرۇستى روبوت پلاتفورماسى مەديتسينالىق توپقا جەتكىزگەن. وسىلايشا جاۋىنگەردىڭ مايدانداعى 491 كۇندىك كەزەڭى اياقتالدى. قازىر ول اسكەري گوسپيتالدە ەم قابىلداپ جاتىر.
