قىزىلوردادا بەس ايلىق ءسابيدى اناسىمەن قوسا كولىكپەن قاعىپ، وقيعا ورنىنان قاشىپ كەتكەن جۇرگىزۋشىگە ىزدەۋ جاريالاندى. جول-كولىك وقيعاسى سالدارىنان ءسابي كوز جۇمدى، ال اۋىر جاراقات العان اناسى جانساقتاۋ بولىمىندە ەم قابىلداپ جاتىر، دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەپ
قايعىلى جاعداي 13 قازاندا قىزىلوردا قالاسىندا بولعان. الەۋمەتتىك جەلىلەردە تاراعان اقپاراتقا سايكەس، Mitsubishi Lancer اۆتوكولىگىنىڭ جۇرگىزۋشىسى 26 جاستاعى ايەل مەن ونىڭ بەس ايلىق ۇلىن قاعىپ كەتكەننەن كەيىن وقيعا ورنىنان كەتىپ قالعان.
وبلىستىق دەنساۋلىق ساقتاۋ باسقارماسىنىڭ مالىمەتىنشە، انا مەن ءسابي دەرەۋ اۋرۋحاناعا جەتكىزىلگەن. الايدا دارىگەرلەردىڭ كومەگىنە قاراماستان، بالانىڭ ءومىرىن ساقتاپ قالۋ مۇمكىن بولماعان. ال ايەل اۋىر حالدە جانساقتاۋ بولىمىنە جاتقىزىلعان.
اتالعان فاكتى بويىنشا پوليتسيا سوتقا دەيىنگى تەرگەپ-تەكسەرۋدى باستاعان. كۇدىكتىنىڭ كىم ەكەنى انىقتالعانىمەن، ونى ۇستاۋ شارالارى ءالى جالعاسىپ جاتىر. قۇقىق قورعاۋ ورگاندارى جۇرگىزۋشىنى سەگىز كۇننەن بەرى ىزدەستىرۋدە.
قىزىلوردا وبلىسىنىڭ پوليتسيا دەپارتامەنتى 2000 جىلعى 1 شىلدەدە تۋعان الەكسەي الەكساندروۆيچ ۆەليكوۆتى ىزدەستىرىپ جاتىر.
ول قازاقستان رەسپۋبليكاسى قىلمىستىق كودەكسىنىڭ 345-بابى 3-بولىگى بويىنشا، ياعني ابايسىزدا ادام ولىمىنە اكەپ سوققان جول ءجۇرىسى قاعيدالارىن بۇزدى دەگەن كۇدىككە ىلىنگەن.
اتالعان باپ بويىنشا بەس جىلعا دەيىن باس بوستاندىعىنان ايىرۋ، سونداي-اق بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ايىرۋ جازاسى قاراستىرىلعان.
پوليتسيا مالىمەتىنە سايكەس، كۇدىكتىگە قاتىستى قاماۋدا ۇستاۋ تۇرىندەگى بۇلتارتپاۋ شاراسى تاڭدالعان.
كۇدىكتىنىڭ قايدا جۇرگەنى تۋرالى قانداي دا ءبىر مالىمەت بىلەتىن ازاماتتاردان پوليتسياعا حابارلاسۋ سۇرالادى. بايلانىس نومىرلەرى:
- 27-64-71;
- 29-75-07;
- 27-42-06;
- 29-75-69;
- 27-45-47.
پوليتسيا باسقارماسىنىڭ مەكەنجايى: قىزىلوردا قالاسى، تولە بي كوشەسى، 112.
20 قازانداعى مالىمەت بويىنشا، ايەل ەسىن جيىپ، وزدىگىنەن تىنىس الا باستاعان. دەگەنمەن ونىڭ جاعدايى ءالى دە تۇراقتى اۋىر دەپ باعالانىپ وتىر. دارىگەرلەر ناۋقاسقا قارقىندى تەراپيا جۇرگىزۋدى جالعاستىرىپ جاتىر.
