قازاقستاندا ەسىرتكى كونترابانداسىنا قاتىسى بار دەگەن كۇدىكپەن ۇستالعان رەسەيلىك رەپەرگە قاتىستى قىلمىستىق ءىس اقتالمايتىن نەگىز بويىنشا توقتاتىلدى، دەپ حابارلايدى “ادىرنا”.
ءانشىنىڭ ءوزى ەلدەن شىعارىلدى. الايدا بۇل شەشىم ونىڭ سوتتالعانىن بىلدىرمەيدى.
الماتى قالالىق ادۆوكاتتار القاسىنىڭ ادۆوكاتى ابزال قاسىمجانوۆتىڭ تۇسىندىرۋىنشە، ءىس ءانشىنىڭ شىن وكىنۋىنە بايلانىستى توقتاتىلعان. بۇل جاعدايدا ادام قىلمىستىق جاۋاپتىلىقتان بوساتىلادى، بىراق اقتالعان بولىپ سانالمايدى.
ادۆوكاتتىڭ ايتۋىنشا، شىن وكىنۋ نەگىزىندە ءىستى توقتاتۋ كەزىندە ادامنىڭ جەكە باسى، كىناسىن مويىنداپ كەلۋى، تەرگەۋگە كومەكتەسۋى جانە كەلتىرىلگەن زياندى وتەۋى سياقتى ءمان-جايلار ەسكەرىلەدى. الايدا پوليتسيانىڭ حابارلاماسىندا Navai-عا قاتىستى ناقتى قانداي ارەكەتتەر نەگىزگە الىنعانى كورسەتىلمەگەن.
ادۆوكاتتىڭ مالىمەتىنشە، ءانشىنىڭ سوتتىلىعى جوق. ەگەر قىلمىستىق ءىس سوتقا دەيىن توقتاتىلىپ، ايىپتاۋ ۇكىمى شىعارىلماسا، سوتتىلىق تۋىندامايدى. دەگەنمەن، قىلمىستىق ءىس بويىنشا مالىمەتتەر مەملەكەتتىك دەرەكقورلاردا ساقتالۋى مۇمكىن.
ادۆوكاتتىڭ تۇسىندىرۋىنشە، سوت شەشىمىمەن ەلدەن شىعارىلعان شەتەلدىككە قازاقستانعا كىرۋگە بەس جىلعا دەيىن تىيىم سالىنۋى مۇمكىن. بۇل مەرزىم ەلدەن شىعارۋ تۋرالى شەشىم ورىندالعان كۇننەن باستاپ ەسەپتەلەدى. سوندىقتان Navai-دىڭ قازاقستانعا ناقتى قاشان ورالا الاتىنىن انىقتاۋ ءۇشىن ءتيىستى شەشىمنىڭ ورىندالعان كۇنىن ءبىلۋ قاجەت. جاريالانعان اقپاراتتا بۇل مالىمەت ناقتىلانباعان.
ەسكە سالايىق، 14 قازاندا رەسەيلىك رەپەر Navai-دىڭ قازاقستاندا ۇستالعانى حابارلانعان ەدى.
