الماتى قالاسىنىڭ المالى اۋداندىق سوتىندا كەزەكتى وقيعا ورىن الدى.
سانجار بوقاەۆتىڭ ءىسى بويىنشا ونىڭ جيەنى ءارى سىبايلاسى دەپ ايىپتالعان ماديار قالمەنوۆ بۇعان دەيىن ءوزى جالداعان قورعاۋشىسى عالىمجان جولداسباەۆتىڭ قىزمەتىنەن كۇتپەگەن جەردەن باس تارتتى.
بۇعان ايىپتالۋشىنىڭ ەكىنشى ادۆوكاتى ايمان وماروۆانى سوت وتىرىسىنا ونلاين فورماتتا قوسۋدى تاباندى تۇردە تالاپ ەتۋى سەبەپ بولدى.
سۋديا بۇعان دەيىن سوت پروتسەسىن تەك وفلاين فورماتتا وتكىزۋ تۋرالى شەشىم قابىلدانعانىن جانە وعان باستاپقىدا بارلىق قاتىسۋشىلار كەلىسكەنىن ەسكە سالدى. وماروۆانىڭ سوت وتىرىسىنا قاتىسۋىنا ەشكىم تىيىم سالمايدى، الايدا ول ءۇشىن ادۆوكاتتىڭ سوت زالىنا جەكە ءوزى كەلۋى قاجەت.
بەلگىلەنگەن ءتارتىپتى وزگەرتۋگە كەلىسپەگەن سوتتىڭ ۇستانىمىن ەستىگەن كالمەنوۆ زالدا وتىرعان جولداسباەۆتىڭ كومەگىنەن باس تارتىپ، وسى سوت وتىرىسىندا ءىس جۇزىندە قورعاۋشىسىز قالدى.
پروتسەستىك نورمالاردى قاتاڭ ساقتاپ، ايىپتالۋشىنىڭ قورعانۋ قۇقىعىن قامتاماسىز ەتۋ ماقساتىندا سوت كەڭەسۋ بولمەسىنە كەتتى. ودان كەيىن وتىرىس 22 قازانعا اۋىستىرىلدى. سۋديا جانات ابەنوۆا سونداي-اق قورعاۋشىسى تاعى دا كەلمەگەن جاعدايدا كالمەنوۆ قانداي ارەكەت ەتۋى كەرەكتىگىن ءتۇسىندىردى.
«سوتتالۋشىنىڭ قورعانۋ قۇقىعىنىڭ بۇزىلۋىنا جول بەرمەۋ ماقساتىندا سوت وماروۆا ادۆوكاتتىڭ وفلاين فورماتتا جۇمىس ىستەۋى ءۇشىن ونىڭ كەلۋىن قامتاماسىز ەتۋگە بايلانىستى سوت وتىرىسىن كەيىنگە قالدىرادى. ادۆوكات كەلمەگەن جاعدايدا باسقا ادۆوكاتتارمەن كەلىسىم جاساسۋ ماسەلەسىن شەشۋىڭىزدى سۇرايمىن. نەمەسە سوت سىزگە قورعاۋشى تاعايىندايدى»، – دەپ تۇيىندەدى سۋديا.
ەسكە سالايىق، وتكەن سوت وتىرىسىندا پروكۋرور وقىعان ايىپتاۋ اكتىسىنە سايكەس، ماديار كالمەنوۆ اعاسى سانجار بوكاەۆپەن ءسوز بايلاسا وتىرىپ، قاراجاتتى جىمقىردى جانە زاڭداستىردى دەپ ايىپتالىپ وتىر.
تەرگەۋ نۇسقاسى بويىنشا، بوكاەۆ قىلمىستىق سحەمانى «قازترانسگاز» باسشىسىنىڭ كەڭەسشىسى بولىپ جۇمىس ىستەگەن كەزدە جۇزەگە اسىرىلعان. مەملەكەتتىك ايىپتاۋدىڭ مالىمەتىنشە، كالمەنوۆ باقىلايتىن كومپانيا ارقىلى ۇلتتىق كومپانيا كاسىپوداعىنان 42 ميلليون تەڭگەدەن استام قاراجات جىمقىرىلعان. كەيىن بۇل اقشا بوكاەۆتىڭ جەكە جيھاز بيزنەسىن دامىتۋعا جۇمسالعان.
