وزبەكستان مەن اقش-تىڭ ىسكەرلىك وكىلدەرى سامارقاندتا جالپى قۇنى 12 ملرد دوللار بولاتىن 54 ىنتىماقتاستىق كەلىسىمىنە قول قويدى، دەپ حابارلايدى “ادىرنا” ءتىلشىسى.
بۇل تۋرالى «گازەتا.uz» حابارلادى.
كەلىسىمدەر اقش مەملەكەتتىك حاتشىسى ماركو رۋبيو باستاعان دەلەگاتسيانىڭ وزبەكستانعا ساپارى اياسىندا جاسالدى.
باق مالىمەتىنشە، قۇجاتتار ونەركاسىپ، كولىك جانە ەنەرگەتيكا ينفراقۇرىلىمى، ستراتەگيالىق ماڭىزى بار مينەرالدار، قارجى سەكتورى، تسيفرلىق تەحنولوگيالار، اۋىل شارۋاشىلىعى، دەنساۋلىق ساقتاۋ جانە ءبىلىم بەرۋ سالالارىن قامتيدى. تاراپتار ينۆەستيتسيالىق، تەحنولوگيالىق جانە ساۋدا ىنتىماقتاستىعىن دامىتۋدى كوزدەيدى.
اتاپ ايتقاندا، Franklin Templeton, Oppenheimer & Co.، Citigroup جانە BlackRock كومپانيالارىمەن جاسالعان كەلىسىمدەر وزبەكستاندىق كومپانيالاردىڭ حالىقارالىق كاپيتال نارىقتارىنا شىعۋىنا، ينستيتۋتسيونالدىق ينۆەستورلاردى تارتۋعا جانە ينفراقۇرىلىمدىق جوبالاردى قارجىلاندىرۋعا باعىتتالعان.
Wabtec كومپانياسىمەن جاسالعان كەلىسىم تەمىرجول تەحنيكاسى مەن ونىڭ بولشەكتەرىن جەرگىلىكتى جەردە ءوندىرۋدى دامىتۋعا مۇمكىندىك بەرەدى. ال GE Aerospace كومپانياسى Uzbekistan Airways اۋە كومپانياسىنىڭ جاڭا ۇشاقتارىنا ارنالعان قوزعالتقىشتاردى جەتكىزەدى.
تاۋ-كەن ونەركاسىبى سالاسىنداعى ىنتىماقتاستىق ReElement Technologies, Traxys جانە Trafigura كومپانيالارىمەن جاسالعان كەلىسىمدەر ارقىلى بەكىتىلدى. قۇجاتتار پايدالى قازبالار كەن ورىندارىن زەرتتەۋ مەن يگەرۋدى، تەحنولوگيا الماسۋدى جانە ستراتەگيالىق ماڭىزى بار مينەرالداردى قوسا العاندا، تابيعي رەسۋرستاردى جەتكىزۋدى قامتيدى.
سونىمەن قاتار Amazon Leo كومپانياسىمەن جاسالعان كەلىسىمدەر سپۋتنيكتىك بايلانىستى دامىتۋعا، GE HealthCare كومپانياسىمەن جاسالعان كەلىسىمدەر زاماناۋي مەديتسينالىق تەحنولوگيالاردى ەنگىزۋگە، ال Valmont Industries كومپانياسىمەن ىنتىماقتاستىق اۋىل شارۋاشىلىعىنىڭ تيىمدىلىگىن ارتتىرۋعا باعىتتالعان.
ماركو رۋبيونىڭ سامارقاندقا ساپارى اياسىندا «ورتالىق ازيا – اقش» (C5+1) فورماتىنداعى كەلىسسوزدەردىڭ ىسكەرلىك باعدارلاماسى 19 قازاندا Welcome & Orientation اتتى كىرىسپە سەسسياسىمەن باستالدى. ءىس-شارانى وزبەكستاننىڭ ينۆەستيتسيالار، ونەركاسىپ جانە ساۋدا مينيسترلىگى امەريكالىق-وزبەك ساۋدا پالاتاسىمەن بىرلەسىپ ۇيىمداستىردى.
مينيسترلىكتىڭ مالىمەتىنشە، ىسكەرلىك باعدارلاماعا 400-دەن استام كومپانيانىڭ وكىلدەرى قاتىسۋدا. ولاردىڭ قاتارىندا اقش-تىڭ 100-دەن استام، ورتالىق ازيانىڭ باسقا ەلدەرىنەن 100 جانە وزبەكستاننىڭ 200 كاسىپورنى بار.
