15 قازاندا رەسپۋبليكا سارايىندا وتكەن BE WOMAN ASIA 2026 حالىقارالىق فورۋمىندا ايەلدەردىڭ شەشىم قابىلداۋعا قاتىسۋى، ءبىلىم مەن كاسىپتەگى مۇمكىندىكتەرى، تەحنولوگيالىق وزگەرىستەر جانە قوعام الدىنداعى جاۋاپكەرشىلىك ماسەلەلەرى تالقىلاندى. بيىلعى «ەتيكالىق كۇش» تاقىرىبى قاتىسۋشىلاردى ىقپالدىڭ اۋقىمى عانا ەمەس، ونىڭ ادام مەن قوعام ومىرىنە اسەرى تۋرالى وي بولىسۋگە شاقىردى.
فورۋمنىڭ اشىلۋىندا مادەنيەت سالاسىنا جاۋاپتى ۆيتسە-مينيستر ەۆگەني كوچەتوۆ ەرلان قاريننىڭ قۇتتىقتاۋ حاتىن وقىدى. وندا قازاقستانداعى ايەلدەردىڭ قوعامدىق جانە مەملەكەتتىك ومىرگە قاتىسۋى، گەندەرلىك تەڭدىك، ايەلدەر كاسىپكەرلىگىن قولداۋ جانە وتباسىلىق-تۇرمىستىق قاتىناستار سالاسىنداعى زاڭنامالىق وزگەرىستەر اتاپ ءوتىلدى. حالىقارالىق فورۋمنىڭ ءمانى دە وسى ماسەلەلەردى ءار ەلدىڭ تاجىريبەسى ارقىلى تالقىلاۋعا مۇمكىندىك بەرۋىندە.
باعدارلاما «ۇماي»، «توميريس»، BE WOMAN Talks جانە Mentor Hub الاڭدارىندا قاتار ءجۇردى. نەگىزگى ساحنالارداعى باياندامالار مەن پىكىرتالاستارعا قوسا، قاتىسۋشىلار ساراپشىلارمەن تىكەلەي كەزدەسىپ، كاسىپكەرلىك، كاسىبي دامۋ جانە جاڭا باستامالار تۋرالى كەڭەستى.
بۇۇ ايەلدەر قۇرىلىمىنىڭ قازاقستانداعى ەلدىك كەڭسەسىنىڭ وكىلى ءارى ورتالىق ازياداعى بايلانىس كەڭسەسىنىڭ باسشىسى دجەرەن گيۋۆەن گيۋرەس تەڭسىزدىك، ايەلدەرگە قاتىستى زورلىق-زومبىلىق، اقى تولەنبەيتىن ەڭبەك پەن تەحنولوگيا سالاسىنداعى الشاقتىقتى دەرەكتەر ارقىلى سيپاتتادى. ونىڭ بايانداماسىندا قازىرگى قارقىن ساقتالسا، گەندەرلىك تەڭدىككە جەتۋگە 171 جىل قاجەت بولۋى مۇمكىن ەكەنى جانە جاساندى ينتەللەكت سالاسىنداعى مامانداردىڭ 22 پايىزى عانا ايەلدەر ەكەنى ايتىلدى. بۇل ساندار تەڭ مۇمكىندىك ماسەلەسىنىڭ ءبىلىم بەرۋمەن شەكتەلمەيتىنىن، ەڭبەك نارىعى مەن شەشىم قابىلداۋ دەڭگەيىندە دە وزگەرىس قاجەت ەكەنىن كورسەتتى.
كامبودجانىڭ ايەلدەر ىستەرى جونىندەگى ءمينيسترى ينگ كانتا پاۆي تسيفرلىق تەحنولوگيالار مەن جاساندى ينتەللەكت دامىعان كەزەڭدە كوشباسشىنىڭ جاۋاپكەرشىلىگى ارتا تۇسەتىنىن اتاپ ءوتتى. ونىڭ پايىمىنشا، تەحنولوگيانىڭ پايداسى قوعامعا قانشالىقتى ءادىل بولىنەتىنى ونى ەنگىزەتىن ادامداردىڭ شەشىمىنە بايلانىستى.
فورۋمداعى جەكە تاجىريبەگە قۇرىلعان باياندامالاردىڭ ءبىرى — Tilu EdTech نەگىزىن قالاۋشى، گارۆارد تۇلەگى اسەل امانگەلدىنىڭ «ارىستان گارۆاردقا دەيىن» اتتى ءسوزى. ارىس قالاسىندا وسكەن كاسىپكەر ءبىلىم جولىنداعى جەتىستىگىن وتباسىنان العان سەنىممەن بايلانىستىردى. اتا-اناسىنان ايىرىلعاننان كەيىن دە سول تاربيە ونىڭ ومىرلىك تىرەگىنە اينالعان. ول انا اتانىپ، ءوز كومپانياسىن قۇرعاننان كەيىن، ءبىر جاسار بالاسىن تاربيەلەپ ءجۇرىپ گارۆاردقا وقۋعا تۇسكەن.
اسەل امانگەلدى قازاقستاندا جوعارى ءبىلىم الاتىن ايەلدەر كوپ بولعانىمەن، ەڭبەكاقى ايىرماشىلىعى ساقتالىپ وتىرعانىنا نازار اۋداردى. ونىڭ نەگىزگى ويى — قىز بالانىڭ ءبىلىم الۋىنا مۇمكىندىك جاساۋ عانا ەمەس، وتباسىن، عىلىمدى، كاسىپتى نەمەسە مانساپتى ءوز ەركىمەن تاڭداۋ قۇقىعىن قامتاماسىز ەتۋ. ء«ار قىزدىڭ ءوز بولاشاعىن ءوزى تاڭداۋى سيرەك بۇيىراتىن مۇمكىندىك ەمەس، قالىپتى جاعداي بولۋى كەرەك»، – دەدى ول.
Ulysmedia.kz باسىلىمىنىڭ نەگىزىن قالاۋشى ءارى باس رەداكتورى سامال يبراەۆا قازاقتىلدى تاۋەلسىز مەديانىڭ ىقپالى مەن جاۋاپكەرشىلىگىنە توقتالدى. ول ءسوز بوستاندىعى، جۋرناليستىك ەتيكا، قوعام مەن بيلىك اراسىنداعى اشىق ديالوگ جانە ايەل جۋرناليستەرگە جاسالاتىن قىسىم تۋرالى ايتتى. بايانداماسىندا ورتالىق ازياداعى ايەل جۋرناليستەردىڭ 75 پايىزى ءتۇرلى قىسىمعا تاپ بولاتىنى جونىندەگى دەرەكتى كەلتىردى. بۇل كورسەتكىش سپيكەردىڭ مالىمدەمەسى رەتىندە بەرىلىپ وتىر.
«وسكار» سىيلىعىنىڭ ەكى دۇركىن يەگەرى، رەجيسسەر شارمين وبايد-چينويدىڭ قاتىسۋى دا فورۋمنىڭ قوعامدىق تاقىرىپتارىنا ونەر تۇرعىسىنان قاراۋعا جول اشتى. ونىڭ دەرەكتى كينو سالاسىنداعى جۇمىسى نازاردان تىس قالعان وقيعالاردى كوپشىلىككە جەتكىزۋدىڭ جانە قوعامدىق پىكىر قالىپتاستىرۋدىڭ ماڭىزىن كورسەتەدى.
ورتالىق ازيانىڭ مادەني ىنتىماقتاستىعىنا ارنالعان تالقىلاۋدا وزبەكستاننىڭ مادەنيەت جانە ونەردى دامىتۋ قورىنىڭ ءتورايىمى گايانە ۋمەروۆا ايماق ەلدەرىنىڭ مادەني مۇراسىن بىرلەسە تانىتۋ ماسەلەسىن كوتەردى. كاسىپكەر داننا قاراعۇسوۆا حالىقارالىق مادەني جوبالاردى ۇيلەستىرۋ جانە مەملەكەت پەن بيزنەستىڭ سەرىكتەستىگىن دامىتۋ جونىندە ۇسىنىس ايتتى. اڭگىمە مادەنيەتتى تانىستىرۋمەن قاتار، ونى تۋريزم جانە كرەاتيۆتى ەكونوميكا مۇمكىندىكتەرىمەن ۇشتاستىرۋعا ارنالدى.
BE WOMAN ASIA 2026 باعدارلاماسىنداعى ءارتۇرلى تاقىرىپ ءبىر ورتاق تۇجىرىمعا توعىستى: ايەلدەردىڭ الەۋەتىن ىسكە اسىرۋ ءۇشىن جەكە تاباندىلىقپەن قاتار، ءادىل ەرەجەلەر، قولجەتىمدى مۇمكىندىكتەر جانە جاۋاپتى كوشباسشىلىق قاجەت. فورۋم حالىقارالىق تاجىريبە مەن جەرگىلىكتى ماسەلەلەردى قاتار تالقىلاپ، قاتىسۋشىلارعا كاسىبي بايلانىس ورناتۋعا مۇمكىندىك بەردى.
