فوتو: forbes.kz
رەسەيدىڭ باس پروكۋراتۋراسى قازاقستاندىق كاسىپكەر، حالىقارالىق شاحمات فەدەراتسياسىنىڭ (FIDE) پرەزيدەنتى تيمۋر تۇرلوۆ پەن ونىمەن بايلانىستى قۇرىلىمداردىڭ مۇلكىن تاركىلەۋ تۋرالى تالاپ-ارىزىنان باس تارتتى. بۇل تۋرالى «ينتەرفاكس» جازدى، دەپ حابارلايدى “ادىرنا”.
ماسكەۋدىڭ تۆەر اۋداندىق سوتىندا تالاپ-ارىزدى قاراۋ كۇنىن بەلگىلەۋ ماسەلەسى تالقىلانىپ جاتقان كەزدە سۋديا: «14 قازاندا باس پروكۋروردىڭ ورىنباسارى تكاچەۆ قول قويعان تالاپ-ارىزدان باس تارتۋ تۋرالى ءوتىنىش سوتتىڭ كەڭسەسىنە كەلىپ ءتۇستى»، – دەپ مالىمدەدى.
قازان ايىنىڭ باسىندا رەسەيدىڭ باس پروكۋراتۋراسى تيمۋر تۇرلوۆ پەن ونىمەن بايلانىستى قۇرىلىمداردىڭ مۇلكىن مەملەكەت كىرىسىنە وتكىزۋ تۋرالى تالاپ-ارىز بەرگەن بولاتىن. قۇقىق قورعاۋ ورگاندارىنداعى دەرەككوزدەردىڭ «ينتەرفاكسقا» حابارلاۋىنشا، ءسوز جالپى قۇنى جۇزدەگەن ميلليون دوللاردى قۇرايتىن اقشا قاراجاتى، وزگە دە اكتيۆتەر، سونداي-اق جىلجىمالى جانە جىلجىمايتىن مۇلىك تۋرالى بولعان.
تۇرلوۆتان بولەك، جاۋاپكەرلەر قاتارىندا ونىمەن بايلانىستى Freedom Holding Corp.، Freedom Finance Europe Ltd. جانە W-Empirical Holding Corp. كومپانيالارى، سونداي-اق ونىڭ ىسكەر سەرىكتەسى، كاسىپكەر اركادي ششۋكين بولدى.
تالاپ-ارىز بويىنشا الدىن الا سوت وتىرىسى 15 قازانعا بەلگىلەنگەن ەدى.
بۇعان دەيىن «كوممەرسانت» باسىلىمى بۇل تالاپ-ارىز پروكۋراتۋرانىڭ تۇرلوۆتى، ششۋكيندى جانە ولارمەن بايلانىستى كومپانيالاردى ەكسترەميستىك ۇيىمدار دەپ تانۋ نيەتىمەن بايلانىستى بولۋى مۇمكىن دەپ بولجاعان. مۇنداي شەشىم ولاردىڭ مۇلكىن تاركىلەۋگە مۇمكىندىك بەرەر ەدى. الايدا باس پروكۋراتۋرا مەن سوت تالاپ-ارىزدىڭ ناقتى ءمان-جايىن رەسمي تۇردە جاريالامادى.
باسىلىم دەرەككوزدەرىنىڭ مالىمەتىنشە، رەسەي بيلىگىنىڭ نازارىنا ۋكراينانىڭ گۋمانيتارلىق جوبالارىن قارجىلاندىرۋ ماسەلەسى ىلىككەن. «كوممەرسانت» جازعانداي، تۇرلوۆ قازاقستانداعى ۋكراينا ەلشىلىگىنە 1 ملرد تەڭگە (2,2 ملن دوللار), سونداي-اق ۋكراينانى قولداعان قازاقستاندىق قايىرىمدىلىق قورلارىنا 371,5 ملن تەڭگەدەن استام (820 مىڭ دوللار) قاراجات اۋدارعان.
باسىلىمنىڭ مالىمەتىنشە، Freedom Holding كومپانياسىنىڭ ەۋروپالىق قۇرىلىمى UNITED24 پلاتفورماسى ارقىلى جەدەل جاردەم كولىكتەرىن ساتىپ الۋعا جانە باسقا دا گۋمانيتارلىق قاجەتتىلىكتەرگە 2 ملن ەۋرو بولگەن.
2022 جىلى تۇرلوۆ رەسەي ازاماتتىعىنان باس تارتىپ، قازاقستان ازاماتتىعىن الدى. ول اقش-تا تىركەلگەن جانە Nasdaq قور بيرجاسىندا ساۋدالاناتىن Freedom Holding Corp. قارجى توبىنىڭ نەگىزىن قالاۋشىسى، نەگىزگى اكتسيونەرى ءارى باسشىسى.
تۇرلوۆتىڭ توبى رەسەيدىڭ باعالى قاعازدار نارىعىندا بەلسەندى جۇمىس ىستەگەن. الايدا 2022 جىلعى ماۋسىمدا رەسەي نارىعىنان شىعاتىنىن جانە جەرگىلىكتى مەنەدجمەنتكە اكتيۆتەرىن ساتاتىنىن جاريالادى. مامىلە 2023 جىلدىڭ باسىندا اياقتالدى. وسىدان كەيىن Freedom-نىڭ رەسەيدەگى بۇرىنعى اكتيۆتەرى اتاۋلارىن وزگەرتتى.
2026 جىلدىڭ قىركۇيەك ايىنىڭ سوڭىندا تيمۋر تۇرلوۆ FIDE پرەزيدەنتى بولىپ سايلاندى.
Freedom Holding Corp. قازاقستان، وزبەكستان جانە ازەربايجاندى قوسا العاندا، الەمنىڭ 20-دان استام ەلىندە جۇمىس ىستەيدى. توپ بروكەرلىك قىزمەت كورسەتۋ، ينۆەستيتسيالىق كەڭەس بەرۋ، باعالى قاعازدارمەن ساۋدا جاساۋ، ينۆەستيتسيالىق بانكينگ جانە ساقتاندىرۋ سياقتى قارجىلىق قىزمەتتەر ۇسىنادى.
