قوسشى قالاسى ءوزىنىڭ العاشقى مەرەيتويىن اتاپ ءوتتى. وسىدان تۋرا بەس جىل بۇرىن مەملەكەت باسشىسىنىڭ جارلىعىمەن ەلدى مەكەنگە رەسمي تۇردە قالا مارتەبەسى بەرىلگەن بولاتىن. بۇگىندە قوسشى ەكونوميكاسى قارقىندى دامىپ، ينفراقۇرىلىمى جاڭارىپ جاتقان، ەڭ جىلدام ءوسىپ كەلە جاتقان قالالاردىڭ بىرىنە اينالدى.
سوڭعى بەس جىل ىشىندە قوسشى قالاسىنىڭ ەكونوميكاسىنا 200 ميلليارد تەڭگەدەن استام ينۆەستيتسيا تارتىلدى. قاراجاتتىڭ باسىم بولىگى تۇرعىن ءۇي قۇرىلىسىنا، ينجەنەرلىك-كوممۋنيكاتسيالىق ينفراقۇرىلىمدى دامىتۋعا، جول جەلىسىن جاڭعىرتۋعا جانە الەۋمەتتىك نىساندار سالۋعا باعىتتالدى.
مەرەيتوي قارساڭىنداعى ەڭ ۇلكەن تارتۋ – قالانى تولىق گازداندىرۋ جۇمىستارىنىڭ اياقتالۋى بولدى. قالا كۇنى ەكىنشى جانە ءۇشىنشى ورتالىقتاندىرىلعان گازبەن جابدىقتاۋ كەشەندەرى رەسمي تۇردە ىسكە قوسىلىپ، ناتيجەسىندە قالانىڭ بارلىق شاعىن اۋداندارى مەن 112 مىڭ تۇرعىنى ەكولوگيالىق تازا وتىنعا قول جەتكىزدى.
اقمولا وبلىسىنىڭ اكىمى مارات احمەتجانوۆتىڭ ايتۋىنشا، بۇل جوبا مەملەكەت باسشىسىنىڭ تاپسىرماسىن ورىنداۋ اياسىندا جۇزەگە اسىرىلدى.
– مەملەكەت باسشىسىنىڭ تاپسىرماسىنا سايكەس قوسشى قالاسىن دامىتۋداعى ماڭىزدى كەزەڭدەردىڭ ءبىرىن جۇزەگە اسىرىپ وتىرمىز. بۇگىن ورتالىقتاندىرىلعان گازبەن جابدىقتاۋ جۇيەسى تولىق ىسكە قوسىلدى. سونىمەن قاتار مەرەيتوي اياسىندا مەردىگەر كومپانيامەن بىرلەسىپ، قوسشى تۇرعىندارىنا گاز ەسەپتەگىش قۇرالدارىن تەگىن بەرۋ تۋرالى شەشىم قابىلداندى، – دەدى ءوڭىر باسشىسى.
قالانىڭ بەس جىلدىق مەرەيتويىنا وراي ۇيىمداستىرىلعان مادەني باعدارلاما تۇرعىندار مەن قوناقتارعا ەرەكشە كوڭىل كۇي سىيلادى. كونتسەرتتە جەرگىلىكتى ونەر ۇجىمدارى ونەر كورسەتىپ، مەرەكەنىڭ شارىقتاۋ شەگى اشىق اسپان استىنداعى گالا-كونتسەرتكە ۇلاستى. باس ساحنادا قازاقستاندىق ەسترادا جۇلدىزدارى – نۇرلان ونەرباەۆ، اڭىزعا اينالعان «مۋزارت» توبى، كومپوزيتور ءارى ءانشى ۇلىقپان جولداسوۆ، كورەرمەننىڭ سۇيىكتى ءانشىسى راحىمجان جاقايىم جانە وزگە دە ونەرپازدار ونەر كورسەتتى. مەرەكە سوڭى اسەرلى وتشاشۋمەن اياقتالدى.
ايتا كەتۋ كەرەك، قوسشىنىڭ الەۋمەتتىك سالاداعى جەتىستىكتەرى دە قالا تۇرعىندارى ءۇشىن ماڭىزدى سىيعا اينالدى. بۇگىندە قالادا ءۇش اۋىسىمدى وقۋ ماسەلەسى تولىق شەشىلدى. سونىمەن قاتار تۇرعىنداردىڭ يگىلىگىنە بىرەگەي قوعامدىق مادەني-سپورت ورتالىعى پايدالانۋعا بەرىلدى. دەنساۋلىق ساقتاۋ سالاسىندا تاۋلىگىنە 1000 ادام قابىلدايتىن زاماناۋي كوپسالالى «Viamedis» ەمحاناسىنىڭ قۇرىلىسى اياقتالىپ، جاقىن ارادا جاڭا ستاتسيوناردىڭ اشىلۋى جوسپارلانىپ وتىر.
سوڭعى جىلدارى قالاداعى ينفراقۇرىلىمدىق ماسەلەلەر دە كەزەڭ-كەزەڭىمەن شەشىلۋدە. ونداعان شاقىرىم اۆتوموبيل جولى سالىنىپ، جوندەلدى، ۇزاق ۋاقىت بويى اياقتالماي تۇرعان تۇرعىن ءۇي نىساندارى پايدالانۋعا بەرىلدى. ال الداعى جوسپارلار قاتارىندا LRT جەلىسىنىڭ ەكىنشى كەزەڭىن ىسكە قوسۋ جانە جاڭا ءبىلىم بەرۋ مەكەمەلەرىنىڭ قۇرىلىسىن جۇرگىزۋ كوزدەلگەن.
