كوكشە ءوڭىرىنىڭ مادەني ومىرىندە جاڭا ماۋسىم باستالدى. قازان ايىنىڭ العاشقى ونكۇندىگىندە كوكشەتاۋدا مۋزىكا، تەاتر جانە حورەوگرافيا ونەرىن توعىستىراتىن اۋقىمدى مادەني باعدارلاما قولعا الىندى. بىرنەشە كۇنگە جالعاساتىن ونكۇندىك اياسىندا ءوڭىردىڭ كاسىبي شىعارماشىلىق ۇجىمدارى ءوز ونەرىن ۇسىنىپ، كورەرمەنگە جاڭا كونتسەرتتىك جانە ساحنالىق باعدارلامالارىن تانىستىرادى.
مادەني ونكۇندىكتىڭ العاشقى شارالارىنىڭ ءبىرى ۇكىلى ىبىراي اتىنداعى اقمولا وبلىستىق فيلارمونياسىنىڭ 80 جىلدىعىنا ارنالدى. وسىعان وراي «تازا قازاقستان – مادەنيەت كەڭىستىگىندە» اتتى رەسپۋبليكالىق دوڭگەلەك ۇستەل ءوتىپ، وعان ەلىمىزدىڭ ءار وڭىرىنەن مادەنيەت سالاسىنىڭ وكىلدەرى، ونەر قايراتكەرلەرى، شىعارماشىلىق ۇيىمداردىڭ باسشىلارى مەن سالا ارداگەرلەرى جينالدى.
باسقوسۋدا فيلارمونيانىڭ سەكسەن جىلدىق تاريحى عانا ەمەس، ۇلتتىق ونەردىڭ بۇگىنگى تىنىسى، مادەني مۇرانى ساقتاۋ، شىعارماشىلىق ۇرپاقتار ساباقتاستىعى جانە ونەردىڭ قوعامداعى ورنى ءسوز بولدى. قاتىسۋشىلار مادەنيەتتى كونتسەرت پەن سپەكتاكلدەر جيىنتىعى رەتىندە عانا ەمەس، قوعامنىڭ رۋحاني بولمىسىن قالىپتاستىراتىن ماڭىزدى قۇندىلىق رەتىندە قاراستىرۋ قاجەتتىگىن اتاپ ءوتتى.
سەكسەن جىل ىشىندە ۇكىلى ىبىراي اتىنداعى فيلارمونيا كوكشە وڭىرىندەگى كاسىبي ونەردىڭ قالىپتاسۋىنا ەلەۋلى ۇلەس قوستى. ونىڭ ساحناسىندا ءداستۇرلى ءان مەن كۇيدەن باستاپ كلاسسيكالىق مۋزىكا، حورەوگرافيا جانە كاسىبي ساحنا ونەرىنىڭ ءتۇرلى جانرلارى ورىندالىپ كەلەدى. ۇجىم ءبىرجان سال، اقان سەرى، ۇكىلى ىبىراي سىندى كوكشە ونەرىنىڭ ساڭلاقتارىنان جالعاسقان ءداستۇردى بۇگىنگى بۋىنعا جەتكىزىپ، ۇلتتىق ونەردى جاڭا شىعارماشىلىق ىزدەنىستەرمەن ساباقتاستىرىپ كەلەدى.
شارا بارىسىندا قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆ مەملەكەت باسشىسى قاسىم-جومارت توقاەۆتىڭ قۇتتىقتاۋىن جەتكىزدى. پرەزيدەنت ءوز قۇتتىقتاۋىندا فيلارمونيانىڭ 80-ءشى كونتسەرتتىك ماۋسىمىنىڭ اشىلۋىنا وراي ۇجىم ارداگەرلەرىن، باسشىلىعى مەن شىعارماشىلىق قۇرامىن قۇتتىقتاپ، ونەر ورداسىنىڭ ەل مادەنيەتىندەگى ورنىنا جوعارى باعا بەردى.
«فيلارمونيانىڭ 80 جىلدىعى – ءبىر شىعارماشىلىق ۇجىمنىڭ مەرەيتويىنان الدەقايدا اۋقىمدى مانگە يە. بۇل – كوكشە وڭىرىندەگى كاسىبي ونەردىڭ قالىپتاسۋى مەن دامۋىن، بىرنەشە بۋىن ونەرپازدىڭ شىعارماشىلىق جولىن ساباقتاستىراتىن ماڭىزدى بەلەس.»، – دەدى سارسەنباي حاسەنوۆ ۇكىلى ىبىراي اتىنداعى اقمولا وبلىستىق فيلارمونياسىنىڭ ءداستۇرلى ءانشىسى.
دوڭگەلەك ۇستەلدىڭ «تازا قازاقستان» باستاماسىنا ارنالۋى دا كەزدەيسوق ەمەس. تالقىلاۋ بارىسىندا تازالىق ۇعىمىنىڭ تەك قورشاعان ورتانى اباتتاندىرۋمەن شەكتەلمەي، ادامنىڭ ىشكى مادەنيەتى مەن رۋحاني دۇنيەسىنە دە قاتىستى ەكەنى ايتىلدى.
اقمولا وبلىسى اكىمىنىڭ كەڭەسشىسى، جازۋشى جابال ەرعاليەۆ مادەنيەت پەن تازالىقتىڭ ءوزارا بايلانىسىنا توقتالدى.
«بۇگىن كوكشەتاۋ جەرىندە مادەنيەت توعىسى بولىپ جاتىر دەپ ايتۋعا بولادى. ۇكىلى ىبىراي اتىنداعى اقمولا وبلىستىق فيلارمونياسىنىڭ 80 جىلدىعى – ۇلكەن مەرەكە. «تازا قازاقستان» يدەياسى ادامنىڭ قورشاعان ورتاسىنا عانا ەمەس، ونىڭ ىشكى مادەنيەتى مەن رۋحاني الەمىنە دە قاتىستى. وسى تۇرعىدان العاندا، مادەنيەت پەن تازالىق ۇعىمدارى ءوزارا ساباقتاسىپ جاتىر»، – دەدى جابال ەرعاليەۆ.
مادەني ونكۇندىك اياسىنداعى شارالار كوكشەتاۋدىڭ وزگە دە ونەر وردالارىن قامتيدى. ەلىمىزدىڭ ءار وڭىرىنەن كەلگەن قوناقتارعا قالانىڭ مادەنيەت جانە ونەر نىساندارىنا تانىمدىق ەكسكۋرسيا ۇيىمداستىرىلىپ، ءوڭىردىڭ مادەني الەۋەتى مەن شىعارماشىلىق ۇجىمدارىنىڭ جۇمىسى تانىستىرىلدى.
ال فيلارمونيانىڭ 80 جىلدىعى وسى ونكۇندىكتىڭ مازمۇنىن ايقىندايتىن ماڭىزدى بەلەستەردىڭ بىرىنە اينالدى. سەكسەن جىل بويى بۇل ساحنادا تالاي ونەرپازدىڭ ءۇنى ەستىلىپ، تالاي شىعارماشىلىق ۇجىمنىڭ تاريحى قالىپتاستى. بۇگىندە سول ءداستۇر جاڭا بۋىننىڭ ونەرىمەن جالعاسىپ كەلەدى.
كەشكە مەرەيتويلىق باعدارلاما گالا-كونتسەرتپەن جالعاستى. ساحنادا ك. كۇمىسبەكوۆ اتىنداعى قازاق حالىق اسپاپتار وركەسترى، سيمفونيالىق جانە ەسترادالىق-ۇرلەمەلى اسپاپتار وركەسترلەرى، «گاككۋ» بي ءانسامبلى مەن فيلارمونيا سوليستەرى ونەر كورسەتىپ، كورەرمەنگە مازمۇندى كونتسەرتتىك باعدارلاما ۇسىندى. مەرەيتويلىق كەشكە ارنايى قوناق رەتىندە قازاقستاننىڭ حالىق ءارتىسى، كۇيشى-كومپوزيتور سەكەن تۇرىسبەك، ءداستۇرلى ءان ونەرىنىڭ كورنەكتى وكىلى قايرات بايبوسىنوۆ، ءانشى-كومپوزيتور ءبىرجان حاسانعاليەۆ جانە كۇيشى-كومپوزيتور، حالىق ءارتىسى ايتقالي جايىموۆ قاتىستى.
كوكشە تورىندە باستالعان مادەني ونكۇندىك – وتكەنگە كوز جۇگىرتىپ قانا قويماي، ونەردىڭ بۇگىنگى باعىتىن باعامداپ، ونىڭ بولاشاعىن ءسوز ەتەتىن مادەني الاڭعا اينالماق.
