Qosşy qalasy özınıŋ alǧaşqy mereitoiyn atap öttı. Osydan tura bes jyl būryn Memleket basşysynyŋ Jarlyǧymen eldı mekenge resmi türde qala märtebesı berılgen bolatyn. Bügınde Qosşy ekonomikasy qarqyndy damyp, infraqūrylymy jaŋaryp jatqan, eŋ jyldam ösıp kele jatqan qalalardyŋ bırıne ainaldy.
Soŋǧy bes jyl ışınde Qosşy qalasynyŋ ekonomikasyna 200 milliard teŋgeden astam investisiia tartyldy. Qarajattyŋ basym bölıgı tūrǧyn üi qūrylysyna, injenerlık-kommunikasiialyq infraqūrylymdy damytuǧa, jol jelısın jaŋǧyrtuǧa jäne äleumettık nysandar saluǧa baǧyttaldy.
Mereitoi qarsaŋyndaǧy eŋ ülken tartu – qalany tolyq gazdandyru jūmystarynyŋ aiaqtaluy boldy. Qala künı ekınşı jäne üşınşı ortalyqtandyrylǧan gazben jabdyqtau keşenderı resmi türde ıske qosylyp, nätijesınde qalanyŋ barlyq şaǧyn audandary men 112 myŋ tūrǧyny ekologiialyq taza otynǧa qol jetkızdı.
Aqmola oblysynyŋ äkımı Marat Ahmetjanovtyŋ aituynşa, būl joba Memleket basşysynyŋ tapsyrmasyn oryndau aiasynda jüzege asyryldy.
– Memleket basşysynyŋ tapsyrmasyna säikes Qosşy qalasyn damytudaǧy maŋyzdy kezeŋderdıŋ bırın jüzege asyryp otyrmyz. Bügın ortalyqtandyrylǧan gazben jabdyqtau jüiesı tolyq ıske qosyldy. Sonymen qatar mereitoi aiasynda merdıger kompaniiamen bırlesıp, Qosşy tūrǧyndaryna gaz eseptegış qūraldaryn tegın beru turaly şeşım qabyldandy, – dedı öŋır basşysy.
Qalanyŋ bes jyldyq mereitoiyna orai ūiymdastyrylǧan mädeni baǧdarlama tūrǧyndar men qonaqtarǧa erekşe köŋıl küi syilady. Konsertte jergılıktı öner ūjymdary öner körsetıp, merekenıŋ şaryqtau şegı aşyq aspan astyndaǧy gala-konsertke ūlasty. Bas sahnada qazaqstandyq estrada jūldyzdary – Nūrlan Önerbaev, aŋyzǧa ainalǧan «MuzArt» toby, kompozitor ärı änşı Ūlyqpan Joldasov, körermennıŋ süiıktı änşısı Rahymjan Jaqaiym jäne özge de önerpazdar öner körsettı. Mereke soŋy äserlı otşaşumen aiaqtaldy.
Aita ketu kerek, Qosşynyŋ äleumettık saladaǧy jetıstıkterı de qala tūrǧyndary üşın maŋyzdy syiǧa ainaldy. Bügınde qalada üş auysymdy oqu mäselesı tolyq şeşıldı. Sonymen qatar tūrǧyndardyŋ igılıgıne bıregei qoǧamdyq mädeni-sport ortalyǧy paidalanuǧa berıldı. Densaulyq saqtau salasynda täulıgıne 1000 adam qabyldaityn zamanaui köpsalaly «Viamedis» emhanasynyŋ qūrylysy aiaqtalyp, jaqyn arada jaŋa stasionardyŋ aşyluy josparlanyp otyr.
Soŋǧy jyldary qaladaǧy infraqūrylymdyq mäseleler de kezeŋ-kezeŋımen şeşılude. Ondaǧan şaqyrym avtomobil joly salynyp, jöndeldı, ūzaq uaqyt boiy aiaqtalmai tūrǧan tūrǧyn üi nysandary paidalanuǧa berıldı. Al aldaǧy josparlar qatarynda LRT jelısınıŋ ekınşı kezeŋın ıske qosu jäne jaŋa bılım beru mekemelerınıŋ qūrylysyn jürgızu közdelgen.
