اقمولا وبلىسىندا كرەاتيۆتى يندۋستريانى دامىتۋ باعىتىنداعى جۇمىستار جۇيەلى تۇردە جالعاسىپ كەلەدى، دەپ حابارلايدى "ادىرنا" ۇلتتىق پورتالى.
13 ماۋسىم كۇنى استانادا «Creative Aimaq» جوباسى اياسىندا اقمولا وبلىسىنىڭ كرەاتيۆتى جارمەڭكەسى ۇيىمداستىرىلىپ، ءوڭىردىڭ شىعارماشىلىق الەۋەتى مەن ۇلتتىق قولونەرى كوپشىلىك نازارىنا ۇسىنىلدى. ءىس-شارادا پرەمەر-مينيسترىنىڭ ورىنباسارى – مادەنيەت جانە اقپارات مينيسترى ايدا بالاەۆا مەن اقمولا وبلىسىنىڭ اكىمى مارات احمەتجانوۆقا جەرگىلىكتى شەبەرلەردىڭ تۋىندىلارى، زاماناۋي ديزاينەرلىك جوبالار مەن تسيفرلىق باستامالار تانىستىرىلدى.
مەملەكەت باسشىسىنىڭ كرەاتيۆتى ەكونوميكانى قولداۋ، ءاربىر وبلىس ورتالىعى مەن ءىرى قالالاردا كرەاتيۆتى يندۋستريا ورتالىقتارىن قۇرۋ جانە شىعارماشىلىق جوبالاردى كوممەرتسيالاندىرۋ جونىندەگى تاپسىرماسىنا سايكەس وڭىردە ونەر، مادەنيەت پەن قولونەردى دامىتۋعا ارنالعان كەشەندى باستامالار جۇزەگە اسىرىلۋدا.
اقمولا وبلىسىندا كرەاتيۆتى يندۋستريانىڭ بەس باسىم باعىتى ايقىندالعان. ولار – زەرگەرلىك ونەر، مادەني مۇرا، مۋزىكا، ساۋلەت پەن ءسان يندۋسترياسى، سونداي-اق حالىقتىق قولونەر. وسى سالالاردا ەڭبەك ەتىپ جۇرگەن شەبەرلەردىڭ تۋىندىلارى رەسپۋبليكالىق جانە حالىقارالىق كورمەلەردە كەڭىنەن تانىستىرىلىپ كەلەدى. ءوڭىردىڭ مادەني الەۋەتىن 47 كيەلى نىسان تولىقتىرادى. ولاردىڭ قاتارىندا ابىلاي حان الاڭى، زەرەندى اۋىلىنداعى كوبەلەكتەر مۋزەيى جانە تاريحي-مادەني ماڭىزى بار وزگە دە ورىندار بار. بۇل نىساندار ايماقتىڭ تۋريستىك جانە مادەني برەندىنە اينالىپ كەلەدى.
مۋزىكالىق باعىتتا ۇلتتىق اسپاپ جاساۋشىلاردىڭ ەڭبەگى ەرەكشە باعالانادى. شەبەرلەر دومبىرا، قوبىز جانە وزگە دە ءداستۇرلى اسپاپتاردى جاساپ، قازاقتىڭ مۋزىكالىق مۇراسىن ساقتاۋعا ۇلەس قوسىپ ءجۇر. ال ساۋلەت جانە ءسان يندۋسترياسىندا ۇلتتىق ناقىش پەن زاماناۋي ديزايندى ۇيلەستىرەتىن شىعارماشىلىق جوبالار جۇزەگە اسىرىلۋدا.
اقمولا وبلىسىندا ادەبيەت پەن ونەردى دامىتۋعا دا ەرەكشە كوڭىل بولىنەدى. وڭىردە ادەبيەت جانە ونەر مۋزەيى جۇمىس ىستەيدى، وبلىستىق كىتاپحانا جانىنان جاس قالامگەرلەردىڭ «جاس تۇلپار» كلۋبى قۇرىلعان. سونىمەن قاتار ينكليۋزيۆتى فەستيۆالدەر، شىعارماشىلىق بايقاۋلار مەن تەاتر جوبالارى تۇراقتى تۇردە وتكىزىلىپ كەلەدى.
حالىقتىق قولونەر دە قارقىندى دامىپ كەلەدى. بۇگىندە وبلىستا 300-دەن استام قولونەرشى ەڭبەك ەتەدى. ولار سۇيەك پەن اعاش ويۋ، كيىز باسۋ، ۇلتتىق كيىم تىگۋ، زەرگەرلىك بۇيىمدار جاساۋ جانە ساندىك-قولدانبالى ونەردىڭ باسقا دا تۇرلەرىمەن اينالىسادى. تەك كوكشەتاۋ قالاسىنىڭ وزىندە ونداعان كاسىبي سۋرەتشى شىعارماشىلىقپەن شۇعىلدانادى.
اقمولا وبلىسىندا 3 مىڭنان استام كرەاتيۆتى يندۋستريا سۋبەكتىسى تىركەلگەن. ولاردى قولداۋ ماقساتىندا كورمەلەر، جارمەڭكەلەر، فورۋمدار، فەستيۆالدەر مەن شەبەرلىك ساباقتارى ۇيىمداستىرىلىپ، اۆتورلىق برەندتەردى دامىتۋعا جانە ونىمدەردى نارىققا شىعارۋعا مۇمكىندىك جاسالۋدا.
ءوز ءونىمىن برەندكە اينالدىرعانداردىڭ ءبىرى - گۇلنار ورىنباەۆا. ديزاينەر كيىزدەن ءتۇرلى قامزول مەن ورامال، قالپاق باسادى. وعان بۇل ونەر اجەسىنەن دارىعان. بۇگىندە زەينەتكە شىققان ديزاينەر بۇل كاسىبىمەن 10 جىلدان بەرى اينالىسىپ، تۇراقتى تۇتىنۋشىلارىن قالىپتاستىرعان.
ودان بولەك، وڭىردە 15 كرەاتيۆتى يندۋستريا ورتالىعى جۇمىس ىستەيدى. بۇل الاڭدار شىعارماشىلىق باستامالاردى قولداپ، جاستاردىڭ كاسىبي داعدىلارىن دامىتۋعا جانە مادەني قاۋىمداستىق وكىلدەرىنىڭ ءوزارا تاجىريبە الماسۋىنا جاعداي جاساپ وتىر. اقمولالىق شەبەرلەر V دۇنيەجۇزىلىك كوشپەندىلەر ويىندارى اياسىنداعى ەتنواۋىل جۇمىسىنا قاتىسىپ، ءوڭىردىڭ مادەني الەۋەتىن كەڭىنەن تانىستىردى.
سونداي-اق ناۋرىزناما ونكۇندىگى كەزىندە ۇيىمداستىرىلاتىن «كوشپەندىلەر مۇراسى» اشىق الاڭى ۇلتتىق ونەردى ناسيحاتتايتىن ماڭىزدى جوباعا اينالعان. مۇندا كيىز باسۋ، سىرماق جاساۋ، زەرگەرلىك ونەر، ۇلتتىق كيىم تىگۋ جانە باسقا دا ءداستۇرلى قولونەر تۇرلەرى كوپشىلىك نازارىنا ۇسىنىلادى.
كرەاتيۆتى ينفراقۇرىلىمدى كەڭەيتۋ جۇمىستارى دا جالعاسۋدا. كوكشەتاۋدا «سالتانات سارايى» بازاسىندا كرەاتيۆتى يندۋستريا ورتالىعى جۇمىس ىستەسە، قوسشى قالاسىندا حالىقارالىق ستاندارتتارعا ساي العاشقى كوپفۋنكتسيونالدى كوميۋنيتي-ورتالىق اشىلعان. وندا شىعارماشىلىق ستۋديالار، كورمە الاڭدارى، كوۆوركينگتەر، كىتاپحانا، سپورت جانە ءبىلىم بەرۋ كەڭىستىكتەرى ورنالاسقان. مۇندا اعاش ويۋ، بىلعارى وڭدەۋ، مۋزىكالىق اسپاپ جاساۋ، كيىز ونەرى، بەينەلەۋ ونەرى جانە زەرگەرلىك باعىتتاعى تانىمال شەبەرلەردىڭ شەبەرحانالارى تەگىن نەگىزدە قىزمەت ەتەدى.
بۇدان بولەك، جارقايىڭ، ساندىقتاۋ، بۇلاندى، جاقسى جانە اتباسار اۋداندارىندا كىتاپحانالار جانىنان كرەاتيۆتى ورتالىقتار اشىلۋدا. ال زەرەندى اۋىلىندا بولاشاق ۆيزيت-ورتالىق پەن كرەاتيۆتى يندۋستريا حابى بولاتىن زاماناۋي مۋزەيدىڭ قۇرىلىسى باستالعان. سونىمەن بىرگە بۋراباي اۋدانىندا ءىرى كونگرەسس-ورتالىقتىڭ جوبالىق قۇجاتتاماسى ازىرلەنىپ جاتىر.
وڭىردە IT, digital جانە media باعىتتارى دا بەلسەندى دامىپ كەلەدى. كورمەلەردە روبوتوتەحنيكا، باعدارلامالاۋ، كيبەرسپورت، جاساندى ينتەللەكت، ۇلتتىق مادەنيەتكە نەگىزدەلگەن ويىندار، «اقىلدى» دومبىرا، تۋريزمگە ارنالعان تسيفرلىق پلاتفورمالار جانە ينجەنەرلىك ستارتاپتار تانىستىرىلۋدا. بۇل باستامالار جاستاردىڭ يننوۆاتسيالىق الەۋەتىن ارتتىرىپ، ءوڭىردىڭ كرەاتيۆتى ەكونوميكاسىنىڭ جاڭا باعىتىن قالىپتاستىرۋعا ىقپال ەتۋدە.
