استانادا قازاقستان رەسپۋبليكاسىنىڭ مادەنيەت جانە اقپارات ءمينيسترى ارمان قىرىقباەۆ جاستارمەن جانە كرەاتيۆتى يندۋستريا وكىلدەرىمەن كەزدەستى. جيىندا مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋى مەن نەگىزگى باستامالارى ءسوز بولدى.
كەزدەسۋگە جاس كاسىپكەرلەر، ديزاينەرلەر، مۋزىكانتتار، رەجيسسەرلەر، پروديۋسەرلەر، بلوگەرلەر، جۋرناليستەر، عالىمدار، زەرتتەۋشىلەر مەن سپورتشىلار قاتىستى. سونداي-اق «دارىن» مەملەكەتتىك جاستار سىيلىعىنىڭ لاۋرەاتتارى، «تاۋەلسىزدىك ۇرپاقتارى» گرانتىنىڭ يەگەرلەرى، جاستار ۇيىمدارى مەن ۆولونتەرلىك قوزعالىس كوشباسشىلارى جانە ستۋدەنتتەر جينالدى.
مينيستر جولداۋدا ايقىندالعان نەگىزگى مىندەتتەرگە كەڭىنەن توقتالىپ، مەملەكەتتىك جاستار ساياساتىنىڭ باسىم باعىتتارىن اتاپ ءوتتى.
ءىس-شارادا شىعارماشىل جاستاردى قولداۋ، ولارعا ءبىلىم بەرۋ، كاسىبي بىلىگىن جەتىلدىرۋ، تسيفرلاندىرۋ، جاساندى ينتەللەكت جانە كرەاتيۆتى يندۋستريالاردى دامىتۋ ماسەلەلەرى تالقىلاندى. مەملەكەتتىك ساياساتتىڭ بۇل ماڭىزدى باعىتتارى مەملەكەت باسشىسىنىڭ جولداۋىندا دا قامتىلعان.
«مەملەكەت باسشىسىنىڭ بيىلعى جولداۋى – ەلىمىزدىڭ الداعى دامۋ باعدارىن ايقىندايتىن، جاڭا مىندەتتەر مەن مۇمكىندىكتەردى بەلگىلەيتىن ماڭىزدى ستراتەگيالىق قۇجات. پرەزيدەنت كەلەر ۇرپاققا قۋاتتى ەكونوميكا مەن دامىعان تەحنولوگيالارى بار مەملەكەت قالدىرۋ مىندەتىن اتاپ ءوتتى. بۇل جاستارعا جاسالىپ جاتقان مۇمكىندىكتەرمەن قاتار، ولاردىڭ ەل بولاشاعى الدىنداعى جاۋاپكەرشىلىگىن دە ايقىندايدى»، – دەدى ارمان قىرىقباەۆ.
مينيستر ءبىلىمدى، وي-ءورىسى كەڭ ۇرپاق تاربيەلەۋدىڭ جانە كىتاپ وقۋ مادەنيەتىن قالىپتاستىرۋدىڭ ماڭىزىن ايتتى. ءوز سوزىندە ول مەملەكەت باسشىسىنىڭ كىتاپ وقيتىن ۇلت قالىپتاستىرۋ باعىتىنداعى باستاماسىنا ارنايى توقتالدى. وسى باعىتتا 2026 جىلعى 1 قىركۇيەكتەن باستاپ «كىتاپ وقيتىن ۇلت» رەسپۋبليكالىق مارافونى ءوتىپ جاتىر.
ارمان قىرىقباەۆ مەملەكەتتىك قولداۋ شارالارى جاستاردىڭ ءوز باستامالارىن قولعا الىپ، كاسىبي بىلىگىن جەتىلدىرۋىنە مۇمكىندىك بەرەتىنىن جەتكىزدى. اتاپ ايتقاندا، «تاۋەلسىزدىك ۇرپاقتارى» گرانتى اياسىندا جىل سايىن 30 جاسقا 3 ميلليون تەڭگەدەن قارجىلاي قولداۋ كورسەتىلەدى.
كەزدەسۋدە جاستاردىڭ ەكونوميكانىڭ جاڭا باعىتتارىندا ءوز ورنىن تابۋ مۇمكىندىكتەرىنە دە ەرەكشە كوڭىل ءبولىندى. مينيستر تسيفرلىق تەحنولوگيالار مەن جاساندى ينتەللەكت ەكونوميكانىڭ بارلىق دەرلىك سالاسىن، سونىڭ ىشىندە مادەنيەت پەن اقپارات سالاسىن دامىتۋدىڭ ماڭىزدى قۇرالدارىنا اينالىپ كەلە جاتقانىن ايرىقشا اتاپ ءوتتى.
جيىندا كرەاتيۆتى ەكونوميكانى دامىتۋ ماسەلەسى دە جەكە قارالدى. بۇگىندە ەلىمىزدىڭ بارلىق 20 وڭىرىندە جاس تالانتتاردىڭ قابىلەتىن اشۋعا، ءوز جوبالارىن باستاۋعا جانە وتاندىق ونىمدەردى تانىتۋعا جاعداي جاسايتىن كرەاتيۆتى حابتار جۇمىس ىستەيدى.
قاتىسۋشىلار ۇلتتىق مادەنيەتتى دامىتۋ، وتاندىق اۆتورلاردى قولداۋ، قوعامدىق قۇندىلىقتاردى نىعايتۋ جانە جاڭا ادەپ قاعيدالارىن قالىپتاستىرۋ جونىندە پىكىر الماستى. وسى ورايدا جاۋاپكەرشىلىك، ادالدىق، زاڭعا قۇرمەت جانە قورشاعان ورتاعا ۇقىپتى تۇردە قاراۋ مادەنيەتىن ورنىقتىرۋعا باعىتتالعان «ادال ازامات»، «زاڭ مەن ءتارتىپ» جانە «تازا قازاقستان» قاعيداتتارى ءسوز بولدى.
مينيستر قوعامداعى وزگەرىستەرگە جاستاردىڭ قاتىسۋى ماڭىزدى ەكەنىن اتادى. ونىڭ ايتۋىنشا، زاماناۋي ءبىلىم مەن تەحنولوگيالاردى مەڭگەرۋ قابىلەتى ۇلتتىق قۇندىلىقتارعا ادالدىقپەن، جاۋاپكەرشىلىكپەن جانە بەلسەندى ازاماتتىق ۇستانىممەن ۇشتاسۋعا ءتيىس.
جاستار مەملەكەت باسشىسىنىڭ باستامالارىن قولدايتىنىن ءبىلدىرىپ، ولاردى ورىنداۋ ماقساتىندا بەلسەندى قاتىسۋعا، ەلدىڭ دامۋىنا جانە قوعامداعى وڭ وزگەرىستەرگە ۇلەس قوسۋعا دايىن ەكەنىن جەتكىزدى.
كەزدەسۋ اشىق ديالوگ تۇرىندە جالعاستى. جاستار مينيسترگە ءوز ساۋالىن قويىپ، بىرقاتار باستاماسىن ۇسىندى. سونىمەن قاتار ەل الدىنداعى ماڭىزدى مىندەتتەردى اتقارۋداعى جاستاردىڭ ءرولى ءسوز بولدى.
