Astanada Qazaqstan Respublikasynyŋ Mädeniet jäne aqparat ministrı Arman Qyryqbaev jastarmen jäne kreativtı industriia ökılderımen kezdestı. Jiynda Memleket basşysy Qasym-Jomart Toqaevtyŋ Qazaqstan halqyna Joldauy men negızgı bastamalary söz boldy.
Kezdesuge jas käsıpkerler, dizainerler, muzykanttar, rejisserler, prodiuserler, blogerler, jurnalister, ǧalymdar, zertteuşıler men sportşylar qatysty. Sondai-aq «Daryn» memlekettık jastar syilyǧynyŋ laureattary, «Täuelsızdık ūrpaqtary» grantynyŋ iegerlerı, jastar ūiymdary men volonterlık qozǧalys köşbasşylary jäne studentter jinaldy.
Ministr Joldauda aiqyndalǧan negızgı mındetterge keŋınen toqtalyp, memlekettık jastar saiasatynyŋ basym baǧyttaryn atap öttı.
Is-şarada şyǧarmaşyl jastardy qoldau, olarǧa bılım beru, käsıbi bılıgın jetıldıru, sifrlandyru, jasandy intellekt jäne kreativtı industriialardy damytu mäselelerı talqylandy. Memlekettık saiasattyŋ būl maŋyzdy baǧyttary Memleket basşysynyŋ Joldauynda da qamtylǧan.
«Memleket basşysynyŋ biylǧy Joldauy – elımızdıŋ aldaǧy damu baǧdaryn aiqyndaityn, jaŋa mındetter men mümkındıkterdı belgıleitın maŋyzdy strategiialyq qūjat. Prezident keler ūrpaqqa quatty ekonomika men damyǧan tehnologiialary bar memleket qaldyru mındetın atap öttı. Būl jastarǧa jasalyp jatqan mümkındıktermen qatar, olardyŋ el bolaşaǧy aldyndaǧy jauapkerşılıgın de aiqyndaidy», – dedı Arman Qyryqbaev.
Ministr bılımdı, oi-örısı keŋ ūrpaq tärbieleudıŋ jäne kıtap oqu mädenietın qalyptastyrudyŋ maŋyzyn aitty. Öz sözınde ol Memleket basşysynyŋ kıtap oqityn ūlt qalyptastyru baǧytyndaǧy bastamasyna arnaiy toqtaldy. Osy baǧytta 2026 jylǧy 1 qyrküiekten bastap «Kıtap oqityn ūlt» respublikalyq marafony ötıp jatyr.
Arman Qyryqbaev memlekettık qoldau şaralary jastardyŋ öz bastamalaryn qolǧa alyp, käsıbi bılıgın jetıldıruıne mümkındık beretının jetkızdı. Atap aitqanda, «Täuelsızdık ūrpaqtary» granty aiasynda jyl saiyn 30 jasqa 3 million teŋgeden qarjylai qoldau körsetıledı.
Kezdesude jastardyŋ ekonomikanyŋ jaŋa baǧyttarynda öz ornyn tabu mümkındıkterıne de erekşe köŋıl bölındı. Ministr sifrlyq tehnologiialar men jasandy intellekt ekonomikanyŋ barlyq derlık salasyn, sonyŋ ışınde mädeniet pen aqparat salasyn damytudyŋ maŋyzdy qūraldaryna ainalyp kele jatqanyn airyqşa atap öttı.
Jiynda kreativtı ekonomikany damytu mäselesı de jeke qaraldy. Bügınde elımızdıŋ barlyq 20 öŋırınde jas talanttardyŋ qabıletın aşuǧa, öz jobalaryn bastauǧa jäne otandyq önımderdı tanytuǧa jaǧdai jasaityn kreativtı habtar jūmys ısteidı.
Qatysuşylar ūlttyq mädeniettı damytu, otandyq avtorlardy qoldau, qoǧamdyq qūndylyqtardy nyǧaitu jäne jaŋa ädep qaǧidalaryn qalyptastyru jönınde pıkır almasty. Osy oraida jauapkerşılık, adaldyq, zaŋǧa qūrmet jäne qorşaǧan ortaǧa ūqypty türde qarau mädenietın ornyqtyruǧa baǧyttalǧan «Adal azamat», «Zaŋ men tärtıp» jäne «Taza Qazaqstan» qaǧidattary söz boldy.
Ministr qoǧamdaǧy özgerısterge jastardyŋ qatysuy maŋyzdy ekenın atady. Onyŋ aituynşa, zamanaui bılım men tehnologiialardy meŋgeru qabıletı ūlttyq qūndylyqtarǧa adaldyqpen, jauapkerşılıkpen jäne belsendı azamattyq ūstanymmen ūştasuǧa tiıs.
Jastar Memleket basşysynyŋ bastamalaryn qoldaitynyn bıldırıp, olardy oryndau maqsatynda belsendı qatysuǧa, eldıŋ damuyna jäne qoǧamdaǧy oŋ özgerısterge üles qosuǧa daiyn ekenın jetkızdı.
Kezdesu aşyq dialog türınde jalǧasty. Jastar ministrge öz saualyn qoiyp, bırqatar bastamasyn ūsyndy. Sonymen qatar el aldyndaǧy maŋyzdy mındetterdı atqarudaǧy jastardyŋ rölı söz boldy.
