قازاقستانداعى مۇناي قورى 45 جىلدان استام ۋاقىتقا جەتەدى. بۇل تۋرالى «قازمۇنايگاز» ۇلتتىق كومپانياسى باسقارماسىنىڭ توراعاسى اسحات حاسەنوۆ ۇكىمەت كۋلۋارىندا مالىمدەدى، دەپ حابارلايدى «ادىرنا» ءتىلشىسى.
«قانشا ۋاقىتقا جەتەتىنىن ەسەپتەپ كورەيىك. بۇگىندە «قازمۇنايگاز» جىلىنا 26 ملن توننا مۇناي وندىرەدى. ەسەپتەۋدى جەڭىلدەتۋ ءۇشىن قور كولەمىن 800 ملن توننا دەپ دوڭگەلەكتەيىك. سوندا مۇناي قورى 45 جىلدان استام ۋاقىتقا جەتەدى. الايدا بۇل 45 جىلدان كەيىن مۇناي قورى تولىق تاۋسىلادى دەگەن ءسوز ەمەس. سەبەبى رەسۋرستىق بازا ۇنەمى تولىقتىرىلىپ وتىرادى. گەولوگيالىق بارلاۋ جۇمىستارى جۇرگىزىلىپ، جاڭا كەن ورىندارى انىقتالعاننان كەيىن ولاردىڭ قورى بىردەن ەسەپكە الىنادى. ياعني قور كولەمى تۇراقتى تۇردە جاڭارىپ وتىرادى»، – دەدى ول.
اسحات حاسەنوۆتىڭ ايتۋىنشا، بۇگىندە «قازمۇنايگازدىڭ» مۇناي قورى 785 ملن توننانى قۇرايدى.
