قازاقستاندىق جۋرناليست تالعات المانوۆ اقش-تىڭ نيۋ-يورك شتاتىنداعى بۋففالو قالاسىندا ورنالاسقان ABC 7 تەلەارناسىندا Executive Reporter قىزمەتىنە تاعايىندالدى. بۇل تۋرالى «حابار» اگەنتتىگىنىڭ بۇرىنعى باسشىسى، جۋرناليست رينات كەرتاەۆ الەۋمەتتىك جەلىدەگى جازباسىندا جاريالادى، دەپ حابارلايدى “ادىرنا”.
جاڭا قىزمەتىندە تالعات المانوۆ جاڭالىقتار ءبولىمىنىڭ جۇمىسىن ۇيلەستىرىپ، جۋرناليستەر مەن پروديۋسەرلەردىڭ قىزمەتىن قاداعالايدى. سونىمەن قاتار جاڭالىقتاردىڭ ساپالى ءارى كورەرمەنگە ۋاقىتىلى جەتۋىنە جاۋاپتى بولادى.
مەديامامان رەپورتاجدار ازىرلەۋ جانە زەرتتەۋ جۋرناليستيكاسىمەن اينالىسۋدى دا جالعاستىرادى.
رينات كەرتاەۆ قازاقستاندىق مەدياماماننىڭ اقش-تاعى تەلەارنادا باسشىلىق قىزمەتكە تاعايىندالۋىن وتاندىق جۋرناليستيكا ءۇشىن ماڭىزدى وقيعا دەپ باعالادى. ونىڭ ايتۋىنشا، تالعات المانوۆتىڭ كاسىبي جەتىستىگى قازاق مەدياشەجىرەسىندە ەرەكشە ورىن الۋى مۇمكىن.
«نيۋ-يوركتىڭ ايگىلى ABC 7 (بۋففالو) تەلەارناسىندا مەديامەنەدجەر قازاق بار دەپ قۋاناتىن بولدىق»، – دەپ جازدى ول.
كەرتاەۆ سونداي-اق الەمدىك دەڭگەيدەگى مەديامامانداردىڭ قازاقستاندا لايىقتى باعالانباي جۇرگەنىنە وكىنىش ءبىلدىرىپ، تالعات المانوۆتىڭ بولاشاقتا اقش-تاعى تەلەارنالاردىڭ ءبىرىن باسقارۋعا الەۋەتى بار ەكەنىن اتاپ ءوتتى.
تالعات المانوۆ تا جاڭا قىزمەتىنە تاعايىندالعانىن الەۋمەتتىك جەلىدەگى پاراقشاسىندا راستادى. ول وزىنە وسىنداي جاۋاپتى مىندەت جۇكتەگەن تەلەارنا باسشىلىعىنا العىس ايتىپ، كورسەتىلگەن سەنىمدى اقتاۋعا بار كۇشىن سالاتىنىن جەتكىزدى.
“ماعان وسىنداي جاۋاپتى مىندەتتى سەنىپ تاپسىرعان باسشىلىعىما ەرەكشە العىسىمدى بىلدىرەمىن. كورسەتىلگەن سەنىمدى اقتاپ، جاڭا قىزمەتىمدى ابىرويمەن اتقارۋ ءۇشىن بار كۇشىمدى سالامىن!“ – دەپ جازدى ول.
