Qazaqstandyq jurnalist Talǧat Almanov AQŞ-tyŋ Niu-Iork ştatyndaǧy Buffalo qalasynda ornalasqan ABC 7 telearnasynda Executive Reporter qyzmetıne taǧaiyndaldy. Būl turaly «Habar» agenttıgınıŋ būrynǧy basşysy, jurnalist Rinat Kertaev äleumettık jelıdegı jazbasynda jariialady, dep habarlaidy “Adyrna”.
Jaŋa qyzmetınde Talǧat Almanov jaŋalyqtar bölımınıŋ jūmysyn üilestırıp, jurnalister men prodiuserlerdıŋ qyzmetın qadaǧalaidy. Sonymen qatar jaŋalyqtardyŋ sapaly ärı körermenge uaqytyly jetuıne jauapty bolady.
Mediamaman reportajdar äzırleu jäne zertteu jurnalistikasymen ainalysudy da jalǧastyrady.
Rinat Kertaev qazaqstandyq mediamamannyŋ AQŞ-taǧy telearnada basşylyq qyzmetke taǧaiyndaluyn otandyq jurnalistika üşın maŋyzdy oqiǧa dep baǧalady. Onyŋ aituynşa, Talǧat Almanovtyŋ käsıbi jetıstıgı qazaq mediaşejıresınde erekşe oryn aluy mümkın.
«Niu-Iorktıŋ äigılı ABC 7 (Buffalo) telearnasynda mediamenedjer qazaq bar dep quanatyn boldyq», – dep jazdy ol.
Kertaev sondai-aq älemdık deŋgeidegı mediamamandardyŋ Qazaqstanda laiyqty baǧalanbai jürgenıne ökınış bıldırıp, Talǧat Almanovtyŋ bolaşaqta AQŞ-taǧy telearnalardyŋ bırın basqaruǧa äleuetı bar ekenın atap öttı.
Talǧat Almanov ta jaŋa qyzmetıne taǧaiyndalǧanyn äleumettık jelıdegı paraqşasynda rastady. Ol özıne osyndai jauapty mındet jüktegen telearna basşylyǧyna alǧys aityp, körsetılgen senımdı aqtauǧa bar küşın salatynyn jetkızdı.
“Maǧan osyndai jauapty mındettı senıp tapsyrǧan basşylyǧyma erekşe alǧysymdy bıldıremın. Körsetılgen senımdı aqtap, jaŋa qyzmetımdı abyroimen atqaru üşın bar küşımdı salamyn!“ – dep jazdy ol.
