اقش قورعانىس مينيسترلىگىنىڭ شتاب پاتەرى يرانمەن سوعىسقا كەتكەن شىعىن كولەمىن العاش رەت جاريالادى، دەپ حابارلايدى "ادىرنا" ۇلتتىق پورتالى.
شەتەلدىك باق دەرەگىنشە، يرانداعى اسكەري قاقتىعىسقا شامامەن 25 ملرد دوللار جۇمسالعان. الايدا سوعىستىڭ قاشان اياقتالاتىنى ازىرگە بەلگىسىز.
اقش قورعانىس ءمينيسترى پيت حەگسەت وكىلدەر پالاتاسىنىڭ قارۋلى كۇشتەر كوميتەتى الدىندا وتكەن تىڭداۋدا يرانداعى اسكەري وپەراتسيالار تۋرالى ەسەپ بەرگەن. ونىڭ ايتۋىنشا، اقش-تىڭ اۋە سوققىلارى ناتيجەسىندە يراننىڭ بىرقاتار «يادرولىق نىساندارى جويىلعان»، سونىڭ ىشىندە جوعارى بايىتىلعان ۋران قورى دا بار.
دەگەنمەن، ادام سميت بۇل مالىمدەمەگە كۇمان كەلتىرىپ، اكىمشىلىك بۇعان دەيىن يراننىڭ يادرولىق باعدارلاماسىن «جەدەل قاۋىپ» دەپ باعالاعانىن ەسكە سالدى. ءوز كەزەگىندە حەگسەت يران يادرولىق امبيتسيالارىنان باس تارتپاعانىن اتاپ ءوتتى، بىراق سوعىستىڭ ناقتى مەرزىمى مەن جالپى قۇنىنا قاتىستى تولىق اقپارات بەرمەدى.
تىڭداۋعا قاتىسقان پەنتاگوننىڭ باس قارجىلىق باقىلاۋشىسى دجەي حەرست قازىرگى ۋاقىتقا دەيىنگى شىعىن شامامەن 25 ملرد دوللاردى قۇراعانىن مالىمدەدى. ونىڭ ايتۋىنشا، نەگىزگى قاراجات يران اۋماعىنا باعىتتالعان قارۋ-جاراققا جۇمسالعان.
پەنتاگون دەرەگىنە سايكەس، دونالد ترامپ 7 ساۋىردە اتىستى توقتاتۋ تۋرالى مالىمدەمە جاساعانعا دەيىن اقش اسكەرى يرانداعى شامامەن 13 مىڭ نىساناعا سوققى جاساعان.
