جول سالاسىن قولداۋ جانە ينفراقۇرىلىمدىق جوبالاردى ىسكە اسىرۋعا ەكىنشى دەڭگەيلى بانكتەردى تارتۋ ماسەلەلەرىنە ارنالعان دوڭگەلەك ۇستەل بارىسىندا «قازاۆتوجول» ۇلتتىق كومپانياسى، Halyk Bank جانە قازاقستاننىڭ تاعى ەكى بانكى اراسىندا كەلىسىمگە قول قويىلدى.
كەلىسىم بويىنشا $700 ملن-عا دەيىنگى كولەمدە قارجىلاندىرۋدى تارتۋ كوزدەلگەن. قارجىلاندىرۋ بۇرىن قازاقستان دامۋ بانكىنەن (قدب) قولداۋ العان ۇلتتىق كومپانيا جوبالارىنا ارنالعان ينۆەستيتسيالىق پۋلدى ودان ءارى دامىتۋعا جانە كەڭەيتۋگە جۇمسالادى.
بۇعان دەيىن اۆتوموبيل جولدارىن جوندەۋ جانە جاڭارتۋ جوبالارىن ىسكە اسىرۋ ءۇشىن قدب قاراجاتى تارتىلاتىن. جاڭا كەلىسىمگە سايكەس ىنتىماقتاستىق ۇزاق مەرزىمدى فورماتقا وتەدى، ياعني قارجىلاندىرۋ 2034 جىلعا دەيىن بەرىلەدى. سينديكاتتالعان قارجىلاندىرۋدى ۇيىمداستىرۋشى جانە اگەنت-بانك Halyk Bank بولىپ وتىر.
پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين اتاپ وتكەندەي، قول جەتكىزىلگەن ۋاعدالاستىقتار كرەديتتىك جۇكتەمەنى قارجى ينستيتۋتتارى اراسىندا قايتا بولۋگە جانە جاڭا باسىم ينفراقۇرىلىمدىق جوبالاردى قارجىلاندىرۋ ءۇشىن قدب كرەديتتىك ءليميتىنىڭ ءبىر بولىگىن بوساتۋعا مۇمكىندىك بەرەدى.
«مەملەكەت باسشىسى ەكونوميكانىڭ ناقتى سەكتورىن قارجىلاندىرۋعا ەكىنشى دەڭگەيدەگى بانكتەردىڭ نەعۇرلىم بەلسەندى قاتىسۋى جانە ءىرى جوبالاردى ىسكە اسىرۋعا جەكە كاپيتالدى تارتۋ قاجەتتىگىن بىرنەشە رەت اتاپ ءوتتى. بۇگىن ءبىز وسىنداي ءوزارا ارەكەتتەستىكتىڭ ناقتى مىسالىن كورىپ وتىرمىز. بۇل جەردە ءسوز جول قۇرىلىسىنا جاڭا قارىز الۋ تۋرالى ەمەس، كوممەرتسيالىق بانكتەردىڭ قاراجاتى ەسەبىنەن قدب الدىنداعى قولدانىستاعى مىندەتتەمەلەردى قايتا قارجىلاندىرۋ تۋرالى بولىپ وتىرعانى اسا ماڭىزدى. بۇل بانك سەكتورىنىڭ ينفراقۇرىلىمدى قارجىلاندىرۋعا قاتىسۋىن ارتتىرىپ قانا قويماي، دامۋ ينستيتۋتىنىڭ رەسۋرستارىن جاڭا جوبالاردى ىسكە اسىرۋعا باعىتتاۋعا مۇمكىندىك بەرەدى»،— دەپ اتاپ ءوتتى ۆيتسە-پرەمەر.
Halyk ءۇشىن بۇل جوباعا قاتىسۋ – قازاقستاننىڭ كولىك بايلانىسىن نىعايتۋعا، ايماقتاردى دامىتۋعا جانە ۇلتتىق ەكونوميكانىڭ باسەكەگە قابىلەتتىلىگىن ارتتىرۋعا قوسقان ۇلەسى. سوندىقتان بۇل كەلىسىمنىڭ ماڭىزى ءبىر عانا قارجىلىق مامىلەنىڭ اياسىنان الدەقايدا كەڭ، دەپ اتاپ ءوتتى Halyk باسقارما ءتورايىمى ءۇمىت شاياحمەتوۆا:
«ەل ءۇشىن جۇيەلىك ماڭىزى بار جوبالاردى قولداۋ – Halyk ءۇشىن باسىم باعىتتاردىڭ ءبىرى. ءبىز بۇل كەلىسىمگە قاتىسۋدى قازاقستان ەكونوميكاسى مەن سەرىكتەستەرىمىز الدىنداعى ۇزاق مەرزىمدى جاۋاپكەرشىلىگىمىز رەتىندە قاراستىرامىز. بانكتەردىڭ بىرلەسىپ قاتىسۋىنىڭ ماڭىزدىلىعىن دا ەرەكشە اتاپ وتكىم كەلەدى. قارجىلىق رەسۋرستار مەن كاسىبي ساراپتامانى بىرىكتىرۋ وسىنداي اۋقىمدى جوبالاردى قولداۋعا جانە ولاردى ىسكە اسىرۋدىڭ بارلىق كەزەڭىندە ءتيىمدى ءوزارا ءىس-قيمىل ورناتۋعا مۇمكىندىك بەرەدى».
ەكىنشى دەڭگەيدەگى بانكتەردى جول ينفراقۇرىلىمىن دامىتۋعا تارتۋ ىشكى ينۆەستيتسيالىق رەسۋرستاردى قوسىمشا جۇمىلدىرۋعا جانە ءىرى ۇلتتىق جوبالاردىڭ مەملەكەتتىك قارجىلاندىرۋعا تاۋەلدىلىگىن تومەندەتۋگە مۇمكىندىك بەرەدى. مۇنداي تەتىك كوممەرتسيالىق بانكتەردىڭ، بيۋدجەت شىعىستارىن جۇمساماي-اق، ەكونوميكانى دامىتۋعا اناعۇرلىم بەلسەندى قاتىسۋىنا جاعداي جاسايدى.
