قازاقستان ءىىم «قورعاس» حالىقارالىق شەكارا ماڭى ىنتىماقتاستىعى ورتالىعىندا قاۋىپسىزدىك رەجيمى مەن قوعامدىق ءتارتىپتى قامتاماسىز ەتۋ جونىندەگى كەلىسىمدى راتيفيكاتسيالاۋ تۋرالى زاڭ جوباسىن ازىرلەدى، دەپ حابارلايدى “ادىرنا”.
قۇجات «اشىق نقا» پورتالىندا قوعامدىق تالقىلاۋعا ۇسىنىلعان.
كەلىسىمنىڭ نەگىزگى ماقساتى – ەكى ەلدىڭ قۇزىرەتتى ورگاندارى اراسىنداعى ءوزارا ءىس-قيمىلدىڭ ءتيىمدى قۇقىقتىق تەتىگىن قالىپتاستىرۋ.
قۇجاتقا سايكەس، ورتالىق اۋماعىندا قۇقىق بۇزۋشىلىق جاسادى دەگەن كۇدىككە ىلىنگەن نەمەسە ايىپتالعان قازاقستان، قىتاي جانە ءۇشىنشى مەملەكەتتەردىڭ ازاماتتارىن، ازاماتتىعى جوق ادامداردى قۋدالاۋ ءار ەلدىڭ اۋماقتىق يۋريسديكتسياسىنا سايكەس جۇزەگە اسىرىلادى.
ەگەر كۇدىكتى نەمەسە ايىپتالۋشى ورتالىقتىڭ ەكىنشى ەلگە تيەسىلى بولىگىنە ءوتىپ كەتسە، سول ەلدىڭ قۇزىرەتتى ورگاندارى بۇل تۋرالى قۋدالاۋدى جۇزەگە اسىرىپ جاتقان تاراپقا حابارلاۋعا، تەرگەۋ جۇرگىزۋگە جانە ادامدى ۇستاۋعا جان-جاقتى كومەك كورسەتۋگە مىندەتتى بولادى.
كەلىسىمدە جاپپاي تارتىپسىزدىكتەر، تەرروريستىك اكتىلەر جانە ادامداردىڭ ءومىرى مەن دەنساۋلىعىنا قاۋىپ توندىرەتىن وزگە دە جاعدايلار كەزىندەگى بىرلەسكەن ءىس-قيمىل ءتارتىبى دە كوزدەلگەن. مۇنداي جاعدايدا ەكى ەلدىڭ قۇزىرەتتى ورگاندارى قاۋىپتىڭ الدىن الۋ جانە ونى زالالسىزداندىرۋ ءۇشىن زاڭ اياسىندا قاجەتتى شارالاردى قابىلدايدى.
سونىمەن قاتار قۇجاتتا ارنايى تالاپ بەلگىلەنگەن. ءتيىستى تاراپتىڭ سۇراۋى نەمەسە رۇقساتى بولماسا، ەكىنشى تاراپتىڭ قۇزىرەتتى ورگاندارىنىڭ قىزمەتكەرلەرى مەن اسكەري قىزمەتشىلەرىنە ورتالىقتىڭ ەكى ەلگە تيەسىلى بولىكتەرى اراسىنداعى شەكارانى كەسىپ وتۋگە جول بەرىلمەيدى. بۇل تالاپ فورس-ماجورلىق جاعدايلارعا تەڭەستىرىلەتىن توتەنشە وقيعالار كەزىندە دە قولدانىلادى.
زاڭ جوباسى 18 قاراشاعا دەيىن قوعامدىق تالقىلاۋعا ۇسىنىلعان.
