قازاقستانداعى «سوپىلىق» باعىتتاعى زىكىرشىلەر جاماعاتىنىڭ جەتەكشىسى يسماتۋللا ماقسۇمعا قاتىستى سوتقا دەيىنگى تەرگەۋ باستالدى، دەپ حابارلايدى «ادىرنا» ءتىلشىسى Tizgin.kz-كە سىلتەمە جاساپ.
بۇعان دەيىن بىرقاتار ينتەرنەت پلاتفورمادا سۇحبات بەرگەن بىرقاتار ازامات يسماتۋللا ماقسۇمنىڭ مەدرەسەدەگى جۇمىسى كەزىندە بالالارعا زورلىق-زومبىلىق كورسەتكەنى تۋرالى مالىمدەمە ايتقان ەدى.
ءىىم مالىمەتىنشە، جاريالانىمداردا كەلتىرىلگەن اقپارات بويىنشا تەرگەۋ امالدارى جۇرگىزىلىپ جاتىر. ونىڭ اياسىندا ءىستىڭ بارلىق ءمان-جايى تەكسەرىلەدى.
«جاريالانىمداعى دەرەكتەرگە قاتىستى سوتقا دەيىنگى تەرگەۋ باستالدى. ونىڭ اياسىندا بارلىق ءمان-جاي تەكسەرىلەتىن بولادى. قپك-ءنىڭ 201-بابىنا سايكەس وزگە اقپارات جاريالاۋعا جاتپايدى»، – دەلىنگەن مينيسترلىكتىڭ جاۋابىندا.
قوعامدا رەزونانس تۋدىرعان مالىمدەمەلەردەن كەيىن قازاقستان مۇسىلماندارى ءدىني باسقارماسى ارنايى مالىمدەمە جاساپ، يسماتۋللا ماقسۇم مەن ونىڭ جاقتاستارىنىڭ مۇفتياتقا ەشقانداي قاتىسى جوق ەكەنىن حابارلاعان بولاتىن.
