ويىن-ساۋىق تەحنولوگيالارىنا ماماندانعان وڭتۇستىك كورەيانىڭ Galaxy Corp. كومپانياسى دۋبايدا روبوتتار ونەر كورسەتەتىن Galaxy Robot Arena الاڭىن اشتى. بۇل تۋرالى Yonhap اگەنتتىگى جازدى، دەپ حابارلايدى «ادىرنا» ءتىلشىسى.
جوبا دۋبايداعى Emaar Entertainment جانە Reel Cinemas كومپانيالارىمەن بىرلەسىپ، Dubai Mall ساۋدا-ويىن-ساۋىق كەشەنىنىڭ اۋماعىندا جۇزەگە اسىرىلعان. بۇل — Galaxy Corp. كومپانياسىنىڭ وڭتۇستىك كورەيادا اشىلعان العاشقى ارەناسىنان كەيىنگى ەكىنشى وسىنداي الاڭى.
اشىلۋ سالتاناتىندا گۋمانويد روبوتتار K-pop جانە تاياۋ شىعىس مۋزىكاسىنىڭ سۇيەمەلدەۋىمەن سينحروندى بي بيلەگەن. سونداي-اق كورەرمەندەرگە وڭتۇستىك كورەيا مەن بىرىككەن اراب امىرلىكتەرىنىڭ جالاۋلارىن ۇستاعان، عارىشكەر كيىمىن كيگەن روبوتتار تانىستىرىلعان. بۇل قويىلىم ەكى ەل اراسىنداعى ىنتىماقتاستىقتى بەينەلەگەن.
Galaxy Corp. كومپانياسى العاشقى تاقىرىپتىق روبوتتار ساياباعىن تامىز ايىندا سەۋلدە اشقان. ال قىركۇيەكتە نيۋ-يوركتەگى تايمس-سكۆەردە جارنامالىق ناۋقانىن باستاعان.
الداعى ۋاقىتتا كومپانيا روبوتتار قاتىساتىن ويىن-ساۋىق جوبالارىن حالىقارالىق نارىقتا كەڭەيتىپ، گونكونگ، توكيو جانە سينگاپۋر قالالارىندا وسىنداي ارەنالار اشۋدى جوسپارلاپ وتىر.
