فوتو: rozetked
19 ساۋىردە قىتايدىڭ بەيجىڭ قالاسىندا وتكەن جارتىلاي مارافوندا «شانديان» اتتى روبوت-گۋمانويد ەرەكشە ناتيجە كورسەتىپ، ادام رەكوردىن جاڭارتتى. بۇل تۋرالى Reuters جازدى، دەپ حابارلايدى “ادىرنا”.
ءبىر جىل بۇرىن عانا مارافونعا قاتىسقان روبوتتاردىڭ دەنى مارە سىزىعىنا جەتپەي قالعان. ءتىپتى كەيبىرى جارىس باستالاتىن سىزىقتان اتتاي دا الماعان. بىراق بيىل ولار الدەقايدا دامىعانىن بۇكىل الەمگە پاش ەتتى.
Reuters مالىمەتىنشە، Honor كومپانياسى ازىرلەگەن روبوت 21,1 شاقىرىمدى 50 مينۋت 26 سەكۋندتا ءجۇرىپ ءوتتى. بۇل دجەيكوب كيپليمو ورناتقان الەم رەكوردىنان بىرنەشە مينۋتقا جىلدام. الايدا جەڭىمپاز روبوت مارەگە بىرنەشە مەتر قالعاندا قورشاۋعا سوعىلىپ قۇلاپ، كومەكشى دەمەۋىمەن تۇرعاننان كەيىن مارەگە جەتكەن.
باسقا دا روبوتتار ايتارلىقتاي جىلدامدىق كورسەتە المادى. دەگەنمەن وسى مارافون ادام ءتارىزدى روبوتتاردىڭ فيزيكالىق كۇش-قۋاتىن تاعى ءبىر مارتە دالەلدەدى.
2025 جىلى مارافونعا 20 روبوت قاتىسسا، بيىل ولاردىڭ سانى جۇزدەن اسىپ كەتتى. ولار ادامداردان ايتارلىقتاي جىلدام جۇگىردى. روبوتتار مەن ادامدار سوقتىعىسپاس ءۇشىن ەكى ءتۇرلى جول تاڭدالدى.
