قازاقستاندىق مانەرلەپ سىرعاناۋشى ميحايل شايدوروۆ 2026/27 ماۋسىمىنداعى گران-پري سەرياسىنىڭ فرانتسيانىڭ انجە قالاسىندا وتكەن العاشقى كەزەڭىندەگى جارىسىن اياقتادى، دەپ حابارلايدى «ادىرنا» ءتىلشىسى Olympic.kz-كە سىلتەمە جاساپ.
ەكى كۇنگە سوزىلعان جارىستا وتانداسىمىز 206,55 ۇپاي جيناپ، ونىنشى ورىنعا تۇراقتادى.
قىسقا باعدارلامادا ميحايل شايدوروۆ ءتورتىنشى ناتيجە كورسەتكەن ەدى. الايدا ەركىن باعدارلامادا 11-ورىنعا يە بولىپ، جالپى ەسەپتە ۇزدىك بەستىكتەگى ورنىن ساقتاپ قالا المادى.
«مۇنداي ءساتسىز باستامامنان كەيىن نە ايتارىمدى بىلمەيمىن. كەيدە ءبارى ءبىز قالاعانداي بولا بەرمەيدى. مۇز تايعاق. سىزدەردىڭ الاڭداۋشىلىقتارىڭىزدى سەزىپ، جازعان حابارلامالارىڭىزدى وقىپ وتىرمىن. قولداۋ بىلدىرگەن ارقايسىڭىزعا شىن جۇرەكتەن العىس ايتامىن. مەنى تەك جەڭىستەرىمدە عانا ەمەس، جەڭىلىستەرىمدە دە قولداپ جۇرگەندەرىڭىز ءۇشىن راقمەت. ويتكەنى جەڭىلىس تە — وسى جولدىڭ ءبىر بولىگى. بەرىلمەي، بۇرىنعىدان دا مىقتى بولىپ ورالۋعا ۋادە بەرەمىن. بارشاڭىزعا راقمەت!» — دەپ جازدى وتانداسىمىز Instagram پاراقشاسىندا.
284,24 ۇپاي جيناعان فرانتسيا وكىلى ادام سياو حيم فا جەڭىمپاز اتاندى. جاپونيا سپورتشىسى كاو ميۋرا 247,96 ۇپايمەن كۇمىس جۇلدەگە يە بولسا، وڭتۇستىك كورەيا وكىلى مينكيۋ سو 244,90 ۇپايمەن ۇزدىك ۇشتىكتى تۇيىندەدى.
ايتا كەتەيىك، فرانتسياداعى جارىس 2026/27 جىلعى ماۋسىمدا وتەتىن گران-پري سەرياسىنىڭ التى كەزەڭىنىڭ العاشقىسى بولدى.
