12 қыркүйек күні Әзербайжан Ұлттық Ғылым Академиясының (ҰҒА) негізгі ғимаратында Бірінші түркітанушылар съезінің 100 жылдығына арналған Алтай қауымдастықтарының XIV халықаралық симпозиумының жабылу рәсімі өтті, деп хабарлайды "Адырна".
Бірінші түркітанушылар съезінің 100 жылдығына арналған ғылыми жиын 9-12 қыркүйек аралығында Әзербайжан Ұлттық Ғылым Академиясында өтті.
Симпозиумға әлемнің түрлі елдерінен шамамен 120 ғалым қатысып, алтайтану мен түркітанудың өзекті мәселелеріне арналған 120-дан астам баяндама ұсынылды. Зерттеушілер тіл, тарих, әдебиет, фольклор және мәдениет бағыттары бойынша пікір алмасты.
Жабылу рәсімінде Алтай қауымдастықтары академиялық мекемесінің президенті, профессор Илхан Шахин симпозиумның халықаралық ғылыми байланыстарды нығайтудағы маңызын атап өтті. Оның айтуынша, жиында ұсынылған баяндамалар жинақ болып жарық көріп, келесі симпозиумға дейін қатысушыларға ұсынылады. Кезекті жиын келесі жылы Моңғолияның Ұлан-Батыр қаласында өтеді деп жоспарланып отыр.
ҰҒА өкілдері Бірінші түркітанушылар съезінің түркі халықтарының тілі, тарихы, әдебиеті мен мәдени мұрасын зерттеудегі тарихи маңызын атап өтті. 1926 жылы Бакуде өткен съезд түркітану ғылымының дамуына серпін берген маңызды ғылыми-интеллектуалдық оқиға ретінде бағаланды.
Ғалымдардың пікірінше, бүгінде түркітану ортақ тарихи-мәдени мұраны зерттеумен қатар, түркі халықтары арасындағы ғылыми және мәдени байланыстарды дамытуда маңызды рөл атқарады.
Айта кетейік, Алтай қауымдастықтарының халықаралық симпозиумы Әзербайжанда алғаш рет ұйымдастырылды.
