12 قىركۇيەك كۇنى ازەربايجان ۇلتتىق عىلىم اكادەمياسىنىڭ (ۇعا) نەگىزگى عيماراتىندا ءبىرىنشى تۇركىتانۋشىلار سەزىنىڭ 100 جىلدىعىنا ارنالعان التاي قاۋىمداستىقتارىنىڭ XIV حالىقارالىق سيمپوزيۋمىنىڭ جابىلۋ ءراسىمى ءوتتى, دەپ حابارلايدى "ادىرنا".
ءبىرىنشى تۇركىتانۋشىلار سەزىنىڭ 100 جىلدىعىنا ارنالعان عىلىمي جيىن 9-12 قىركۇيەك ارالىعىندا ازەربايجان ۇلتتىق عىلىم اكادەمياسىندا ءوتتى.
سيمپوزيۋمعا الەمنىڭ ءتۇرلى ەلدەرىنەن شامامەن 120 عالىم قاتىسىپ، التايتانۋ مەن تۇركىتانۋدىڭ وزەكتى ماسەلەلەرىنە ارنالعان 120-دان استام بايانداما ۇسىنىلدى. زەرتتەۋشىلەر ءتىل، تاريح، ادەبيەت، فولكلور جانە مادەنيەت باعىتتارى بويىنشا پىكىر الماستى.
جابىلۋ راسىمىندە التاي قاۋىمداستىقتارى اكادەميالىق مەكەمەسىنىڭ پرەزيدەنتى، پروفەسسور يلحان شاحين سيمپوزيۋمنىڭ حالىقارالىق عىلىمي بايلانىستاردى نىعايتۋداعى ماڭىزىن اتاپ ءوتتى. ونىڭ ايتۋىنشا، جيىندا ۇسىنىلعان باياندامالار جيناق بولىپ جارىق كورىپ، كەلەسى سيمپوزيۋمعا دەيىن قاتىسۋشىلارعا ۇسىنىلادى. كەزەكتى جيىن كەلەسى جىلى موڭعوليانىڭ ۇلان-باتىر قالاسىندا وتەدى دەپ جوسپارلانىپ وتىر.
ۇعا وكىلدەرى ءبىرىنشى تۇركىتانۋشىلار سەزىنىڭ تۇركى حالىقتارىنىڭ ءتىلى، تاريحى، ادەبيەتى مەن مادەني مۇراسىن زەرتتەۋدەگى تاريحي ماڭىزىن اتاپ ءوتتى. 1926 جىلى باكۋدە وتكەن سەزد تۇركىتانۋ عىلىمىنىڭ دامۋىنا سەرپىن بەرگەن ماڭىزدى عىلىمي-ينتەللەكتۋالدىق وقيعا رەتىندە باعالاندى.
عالىمداردىڭ پىكىرىنشە، بۇگىندە تۇركىتانۋ ورتاق تاريحي-مادەني مۇرانى زەرتتەۋمەن قاتار، تۇركى حالىقتارى اراسىنداعى عىلىمي جانە مادەني بايلانىستاردى دامىتۋدا ماڭىزدى ءرول اتقارادى.
ايتا كەتەيىك، التاي قاۋىمداستىقتارىنىڭ حالىقارالىق سيمپوزيۋمى ازەربايجاندا العاش رەت ۇيىمداستىرىلدى.
