ايتىسكەر اقىن، بۇرىنعى ءماجىلىس دەپۋتاتى رينات زايىت قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعىن باسقارۋعا كىرىستى. ول جاڭا قىزمەتكە قازان ايىنىڭ باسىندا، ماڭعىستاۋ وبلىسىندا 14 ساربازدىڭ قازا تابۋىنان كەيىن كەلگەن. بۇل تۋرالى ول Adal ADAM YouTube ارناسىنا بەرگەن سۇحباتىندا ايتتى، دەپ حابارلايدى “ادىرنا” .
اقىننىڭ سوزىنشە، ورتالىقتىڭ نەگىزگى مىندەتتەرىنە اسكەري انسامبلدەر مەن وركەسترلەردىڭ جۇمىسىن ۇيلەستىرۋ، مادەني جانە پاتريوتتىق ءىس-شارالاردى ۇيىمداستىرۋ كىرەدى. سونىمەن قاتار مەكەمە اسكەري قىزمەتشىلەر مەن اسكەرگە شاقىرىلۋعا دەيىنگى جاستاردىڭ بويىندا وتانسۇيگىشتىك قاسيەتتى قالىپتاستىرۋعا باعىتتالعان جۇمىستار جۇرگىزەدى.
رينات زايىتتىڭ مالىمدەۋىنشە، ونىڭ بۇل قىزمەتكە كەلۋىنە قورعانىس سالاسىندا قولعا الىنعان رەفورمالار دا ىقپال ەتكەن.
«سوڭعى جاعدايلاردان كەيىن مەملەكەت باسشىسى قاسىم-جومارت توقاەۆ قورعانىس سالاسىندا تۇبەگەيلى وزگەرىستەر جاساۋدى تاپسىردى. بۇل رەفورمالار باستالدى. مەن ءوزىم جاڭا وزگەرىستەرگە قاتىسقاندى جاقسى كورەتىن اداممىن. سوندىقتان بۇل قىزمەتكە قۋانا-قۋانا كەلدىم. سول رەفورمانىڭ كىشكەنتاي بولسا دا ءبىر بولشەگىنە اتسالىسسام دەگەن ارمانمەن كەلدىم»، – دەدى رينات زايىت.
