ءال-فارابي اتىنداعى قازاق ۇلتتىق ۋنيۆەرسيتەتىندە ساباق ۇستىندە وقىتۋشىعا جۇمىستان بوساتىلعانى تۋرالى حابارلانعان ءسات تۇسىرىلگەن ۆيدەو الەۋمەتتىك جەلىلەردە تارادى، دەپ حابارلايدى "ادىرنا" ۇلتتىق پورتالى.
جازبا قوعامدا قىزۋ تالقىلانىپ، قولدانۋشىلار وقىتۋشىعا قاتىستى شەشىمنىڭ جاريا تۇردە جەتكىزىلۋىنە نازار اۋداردى. ۋنيۆەرسيتەت وقيعاعا قاتىستى تۇسىنىكتەمە بەردى.
الەۋمەتتىك جەلىدە تاراعان ۆيدەودا ەر ادامنىڭ اۋديتوريادا وتىرعان ايەلگە قۇجاتتاردى ۇسىنىپ جاتقانى كورىنەدى. جازباداعى ايەل جۇمىستان بوساتىلۋ سەبەبىن سۇراپ، ءتيىستى قۇجاتتارمەن تانىستىرىلماعانىن ايتادى. ۆيدەو اۆتورلارىنىڭ مالىمەتىنشە، ايەل ۋنيۆەرسيتەتتە وقىتۋشى بولىپ جۇمىس ىستەگەن. جەلى قولدانۋشىلارى ەڭبەك قاتىناستارىنا قاتىستى ماسەلەنى ستۋدەنتتەردىڭ كوزىنشە تالقىلاۋدىڭ ەتيكالىق جاعىنا نازار اۋداردى.
قازۇۋ ءباسپاسوز قىزمەتىنىڭ مالىمەتىنشە، ۆيدەو 7 قازاندا، وقىتۋشىمەن ەڭبەك قاتىناستارى توقتاتىلعاننان كەيىن تۇسىرىلگەن. ۋنيۆەرسيتەتتىڭ حابارلاۋىنشا، ونىڭ ورنىنا باسقا وقىتۋشى تاعايىندالعان. جوو مالىمەتىنشە، بۇرىنعى وقىتۋشى اۋديتورياعا كىرىپ، جاڭا تاعايىندالعان پەداگوگتان شىعۋىن تالاپ ەتىپ، ساباقتى ءوزى وتكىزۋگە كىرىسكەن. كادر ءبولىمىنىڭ وكىلى وعان جاعدايدى تالقىلاۋ ءۇشىن دالىزگە شىعۋدى ۇسىنعانىمەن، ايەل اڭگىمەنى اۋديتوريادا وتكىزۋدى تالاپ ەتكەن.
ۋنيۆەرسيتەت وكىلدەرى ۆيدەونى وقىتۋشىنىڭ ءوتىنىشى بويىنشا ستۋدەنتتەر تۇسىرگەنىن مالىمدەدى. سونداي-اق اكىمشىلىك كادرلىق قۇجاتتاردى اۋديتوريادا جاريا تۇردە تاپسىرۋعا باستاماشى بولماعانىن اتاپ ءوتتى.
قازۇۋ مالىمەتىنشە، ەڭبەك قاتىناستارىن توقتاتۋ تۋرالى بۇيرىق 2026 جىلعى 2 قازاندا تارتىپتىك كوميسسيانىڭ شەشىمى نەگىزىندە شىعارىلعان. ۋنيۆەرسيتەت وقىتۋشى كوميسسيا وتىرىسى تۋرالى حاباردار بولعانىن جانە ءوز ۇستانىمىن بىلدىرۋگە مۇمكىندىگى بولعانىن، الايدا وتىرىسقا قاتىسپاعانىن حابارلادى. جوو بۇيرىقتىڭ كوشىرمەسى زاڭنامادا بەلگىلەنگەن مەرزىمدە وقىتۋشىنىڭ تۇرعىلىقتى جەرىنە پوشتا ارقىلى جىبەرىلگەنىن دە ايتتى.
ۋنيۆەرسيتەتتىڭ تۇسىندىرۋىنشە، ەڭبەك قاتىناستارىن توقتاتۋ تۋرالى شەشىم وقىتۋشىنىڭ 2024–2026 جىلدارداعى جۇمىسىنا قاتىستى انىقتالعان بىرقاتار بۇزۋشىلىققا بايلانىستى قابىلدانعان.
اتاپ ايتقاندا، جوو Univer اقپاراتتىق جۇيەسىنىڭ قاۋىپسىزدىك تالاپتارى بۇزىلعانىن، سونىڭ ىشىندە ستۋدەنتتەرگە وقىتۋشىنىڭ ەسەپتىك جازباسىن پايدالانۋعا رۇقسات بەرىلگەن جاعدايلار بولعانىن حابارلادى.
بۇدان بولەك، وقۋ-ادىستەمەلىك ماتەريالداردى ازىرلەۋ، ەمتيحان تاپسىرمالارىن دايىنداۋ، ساباق وتكىزۋ جانە ستۋدەنتتەردىڭ جۇمىستارىن تەكسەرۋ تالاپتارىنا قاتىستى ولقىلىقتار انىقتالعانى ايتىلدى. ۋنيۆەرسيتەتتىڭ پىكىرىنشە، بۇل جاعدايلار ەمتيحان سەسسيالارىنىڭ ۋاقتىلى وتۋىنە جانە ستۋدەنتتەردىڭ اكادەميالىق قۇقىقتارىنىڭ ساقتالۋىنا كەرى اسەر ەتۋى مۇمكىن بولعان.
سونىمەن قاتار اكىمشىلىك ستۋدەنتتەردى، ونىڭ ىشىندە كامەلەتكە تولماعانداردى، وقىتۋشىنىڭ ۋنيۆەرسيتەتپەن اراداعى ەڭبەك داۋىنا تارتۋ ماسەلەسىنە الاڭداۋشىلىق ءبىلدىردى.
قازۇۋ ستۋدەنتتەردى جەكە نەمەسە ەڭبەك داۋلارىن شەشۋ قۇرالى رەتىندە پايدالانۋعا بولمايتىنىن اتاپ ءوتتى. ۋنيۆەرسيتەتتىڭ حابارلاۋىنشا، جاعدايدى رەتتەۋ ماقساتىندا وقىتۋشىمەن ءتۇسىندىرۋ جۇمىستارى جۇرگىزىلىپ، تارتىپتىك شارالار قولدانىلعان.
