فوتو: Instagram/ @efw.kz
الماتى قالاسىنىڭ سوتى الەۋمەتتىك جەلىدە Mini Knopka اتىمەن تانىمال ايگەرىم بەرداليەۆانى ۇساق بۇزاقىلىق جاساعانى ءۇشىن كىنالى دەپ تانىدى، دەپ حابارلايدى "ادىرنا".
سوت قاۋلىسىمەن بلوگەرگە 60 550 تەڭگە كولەمىندە ايىپپۇل سالىندى. وعان Threads الەۋمەتتىك جەلىسىندە كوشە اتاۋلارىنا قاتىستى پىكىر ءبىلدىرىپ، وزىنە قارسى شىققان قولدانۋشىلارعا دورەكى سوزدەر ايتقانى ءۇشىن اكىمشىلىك جازا تاعايىندالعان.
قالالىق سوتتىڭ ءباسپاسوز قىزمەتى اكىمشىلىك ءىستىڭ 8 قازاندا قارالعانىن مالىمدەدى. سوت بەرداليەۆانىڭ ارەكەتىن قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 434-بابىنىڭ 1-بولىگىنە سايكەس سارالاعان.
جانجالعا بلوگەردىڭ الماتىداعى بىرنەشە كوشەنىڭ بۇرىنعى اتاۋلارىن قولدانعان جازباسى تۇرتكى بولعان. اتاپ ايتقاندا، ول لەنين، فۋرمانوۆ، دزەرجينسكي، ميرا جانە كومسومولسكايا كوشەلەرىنىڭ ەسكى اتاۋلارىن اتاپ، قازىرگى اتاۋلارىن پايدالانۋدان باس تارتقان. بۇل جازباعا نارازىلىق بىلدىرگەن جەلى قولدانۋشىلارىنا بلوگەر بەيادەپ سوزدەرمەن جاۋاپ بەرگەن.
كەيىن ايگەرىم بەرداليەۆا ءوز جازباسىنا بايلانىستى كەشىرىم سۇراعان. الايدا ونىڭ مالىمدەمەسى الەۋمەتتىك جەلىدەگى بارلىق قولدانۋشىنىڭ كوڭىلىنەن شىقپاعان.
وقيعادان كەيىن Eurasian Fashion Week (EFW) ۇيىمى دا ءوز ۇستانىمىن جاريالادى. ۇيىم بلوگەرمەن ىنتىماقتاستىقتى توقتاتاتىنىن مالىمدەپ، ونىڭ بەينەسى بەينەلەنگەن جارنامالىق ماتەريالداردى بيلبوردتار مەن ەكرانداردان الىپ تاستاعانىن حابارلادى.
