فوتو: arctic-freedom
شىعىس قازاقستان وبلىسىنداعى ريددەر قالاسىنىڭ تۇرعىندارى سوڭعى كۇندەرى جابايى ايۋلاردى بىرنەشە رەت بايقاعان. جىرتقىشتار تۇرعىن ۇيلەردىڭ، دۇكەندەردىڭ ماڭىندا جانە №12 جاڭا مەكتەپكە اپاراتىن جولدا جۇرگەن. بۇل جاعداي قالا تۇرعىندارىنىڭ، اسىرەسە بالالاردىڭ قاۋىپسىزدىگىنە قاتىستى الاڭداۋشىلىق تۋعىزدى، دەپ حابارلايدى "ادىرنا".
كۋاگەرلەردىڭ ايتۋىنشا، وتكەن ءتۇنى لازو كوشەسىندەگى №13 ءۇيدىڭ اۋلاسىندا قونجىعى بار ايۋ جۇرگەن. وقيعا ورنىندا تۇسىرىلگەن ۆيدەودا ايۋلاردىڭ جەكە ءۇيدىڭ اۋماعىنا كىرگەنى كورىنەدى. ءۇي يەسىنىڭ ءيتى ولارعا ءۇرىپ، قارسى شىققان كەزدە، جابايى اڭدار قاشا جونەلگەن. ولار تەمىر قورشاۋدان اسىپ ءوتىپ، كەيىن «كرەستيانسكي دوم» دۇكەنىنىڭ ماڭىندا بايقالعان.
تۇرعىندار بولعان جاعدايعا بايلانىستى پوليتسيا شاقىرعان.
تاڭەرتەڭ الەۋمەتتىك جەلىلەر مەن قالالىق چاتتاردا ايۋلاردىڭ باسقا كوشەلەردە دە كورىنگەنى تۋرالى حابارلامالار تارادى. ءبىر تۇرعىن تۇنگى ساعات تورتتەر شاماسىندا سەمەي كوشەسىنەن ەكى ايۋدى كەزدەستىرگەنىن جازعان. اتالعان كوشەدە «كرەستيانسكي دوم» دۇكەنى دە ورنالاسقان.
سونىمەن قاتار، تۇنگى ساعات بىرلەردە بازارنايا كوشەسىندە دە ايۋلار ۆيدەوعا تۇسىرىلگەن. كۋاگەرلەردىڭ مالىمەتىنشە، جابايى اڭدار №12 جاڭا مەكتەپكە قاراي بارا جاتقان جولدا جۇرگەن. كادرلاردان بۇعان دەيىن بايقالعان قونجىعى بار ايۋدى كورۋگە بولادى. كەيىن ەكى قونجىعىمەن جۇرگەن ايۋ بەينەلەنگەن وزگە ۆيدەولار دا جاريالاندى.
ءبىر كۇن بۇرىن قالا تۇرعىندارى تالوۆكا اۋدانىندا دا ايۋلاردى كورگەندەرىن حابارلاعان. ولار جابايى اڭداردىڭ ىزدەرىن جانە بۇلىنگەن قورشاۋلاردى سۋرەتكە ءتۇسىرىپ، الەۋمەتتىك جەلىلەردە بولىسكەن.
وقيعاعا بايلانىستى شقو تابيعي رەسۋرستار جانە تابيعات پايدالانۋدى رەتتەۋ باسقارماسىنا قاراستى ورمان جانە اڭشىلىق شارۋاشىلىعىنىڭ جەدەل دەن قويۋ جاساعى ريددەرگە بارعان. قازىر ينسپەكتورلار ايۋلاردىڭ قوزعالىسىن باقىلاپ، ولاردى ۇركىتۋ جانە ەلدى مەكەن اۋماعىنان شىعارۋ جۇمىستارىن جۇرگىزىپ جاتىر.
جەدەل دەن قويۋ جاساعىنىڭ باسشىسى ەرمەك باعلانۇلىنىڭ سوزىنشە، كۇننىڭ سۋىتۋى مەن قاردىڭ ءتۇسۋى ايۋلاردىڭ قىسقى ۇيقىعا دايىندالۋ كەزەڭىن جاقىنداتادى.
«ريددەردە اۋا رايى بۇزىلىپ جاتىر، جاقىندا قار جاۋادى. العاشقى قار تۇسكەننەن كەيىن ايۋلار اپاندارىنا جاقىندايدى، ولاردى دايىنداي باستايدى. ەكى اپتاداي كۇتۋ كەرەك، سودان كەيىن اڭدار تاۋعا كەتەدى. ءبىر جارىم ايدان كەيىن قىسقى ۇيقىعا جاتادى»، – دەدى ول.
قالا تۇرعىندارى، اسىرەسە ەكىنشى اۋىسىمدا وقيتىن بالالاردىڭ قاۋىپسىزدىگىنە الاڭداۋلى. اتا-انالار وقۋشىلاردىڭ كەشكى ۋاقىتتا مەكتەپتەن ۇيىنە قايتۋ كەزىندە جابايى اڭدارعا كەزىگىپ قالۋىنان قاۋىپتەنەدى. ولار ايۋلاردىڭ قالا اۋماعىندا قايتا-قايتا پايدا بولۋىنا بايلانىستى ءتيىستى شارالاردى كۇشەيتۋدى تالاپ ەتىپ وتىر.
ايتا كەتەيىك، شىلدە ايىنىڭ سوڭىندا ريددەر ماڭىنداعى باتىس التاي مەملەكەتتىك تابيعي قورىعىنىڭ اۋماعىندا ايۋ ومارتادا جۇمىس ىستەپ جۇرگەن 58 جاستاعى ەر ادامعا شابۋىل جاساعان بولاتىن.
ەر ادام اۋىر جاراقات الىپ، بىرنەشە كۇن بويى جانساقتاۋ بولىمىندە ەمدەلدى. ول 19 تامىزدا اۋرۋحانادان شىعارىلعان. وقيعادان كەيىن شابۋىل جاساعان ايۋدى ينسپەكتورلار اتىپ ولتىرگەن.
