فوتو: gov.kz
قازاقستاندا جاڭا جەكە كۋالىك العان كەيبىر ازاماتتار قۇجاتتاعى «تۋعان جەرى» دەگەن باعانعا ەلدى مەكەننىڭ ورنىنا مەملەكەت اتاۋى جازىلعانىن بايقاعان. ىشكى ىستەر مينيسترلىگى بۇل وزگەرىستىڭ سەبەبىن ءتۇسىندىردى، دەپ حابارلايدى “ادىرنا”.
ۆەدومستۆونىڭ ءباسپاسوز قىزمەتىنىڭ مالىمەتىنشە، جاڭا ءتارتىپ 2025 جىلدىڭ ناۋرىز ايىنان باستاپ قولدانىسقا ەنگىزىلگەن. ەندى جەكە كۋالىكتەگى «تۋعان جەرى» باعانىندا ادامنىڭ تۋعان قالاسى نەمەسە اۋىلى ەمەس، دۇنيەگە كەلگەن ەلىنىڭ اتاۋى كورسەتىلەدى.
وسىعان سايكەس، قازاقستاندا تۋعان ازاماتتاردىڭ قۇجاتىندا «قازاقستان» دەگەن جازۋ بولادى. ال شەتەلدە دۇنيەگە كەلگەن قازاقستاندىقتاردىڭ جەكە كۋالىگىندە تۋعان مەملەكەتىنىڭ اتاۋى كورسەتىلەدى. ماسەلەن، اقش-تا تۋعان ازاماتتىڭ قۇجاتىندا «اقش» دەپ جازىلادى.
ىشكى ىستەر مينيسترلىگى بۇل جاڭاشىلدىق قۇجاتتاردى راسىمدەۋ ءتارتىبىن جەتىلدىرۋ جانە ونى حالىقارالىق ستاندارتتارعا سايكەستەندىرۋ ماقساتىندا ەنگىزىلگەنىن اتاپ ءوتتى.
سونىمەن قاتار ازاماتتاردىڭ تۋعان جەرىنە قاتىستى تولىق مالىمەتتەر، سونىڭ ىشىندە وبلىس، اۋدان جانە ەلدى مەكەن تۋرالى اقپارات تسيفرلىق جۇيەدە ساقتالادى.
مينيسترلىك جاڭا تالاپقا بايلانىستى بۇرىن بەرىلگەن جەكە كۋالىكتەردى مىندەتتى تۇردە اۋىستىرۋدىڭ قاجەتى جوق ەكەنىن ەسكە سالدى.
رەسمي دەرەكتەرگە سايكەس، 2026 جىلدىڭ العاشقى التى ايىندا قازاقستاندا 1,5 ميلليوننان استام ازاماتقا پاسپورت پەن جەكە كۋالىك بەرىلگەن.
