eGov Mobile قوسىمشاسى جاڭارتىلعاننان كەيىنگى جەتى جىل ىشىندە جەكەلەگەن مەملەكەتتىك قىزمەتتەرگە ءموبيلدى قول جەتكىزۋ قۇرالىنان 13,2 ميلليوننان استام پايدالانۋشىسى بار بىرىڭعاي تسيفرلىق پلاتفورماعا اينالدى. بۇگىندە قوسىمشادا 1 100-دەن استام مەملەكەتتىك قىزمەت پەن سەرۆيس قولجەتىمدى.
ءموبيلدى تسيفرلىق ۇكىمەتتىڭ تاريحى 2012 جىلى mGov قوسىمشاسىنىڭ ىسكە قوسىلۋىنان باستالدى. پايدالانۋشىلارعا العاشقى ەلەكتروندىق مەملەكەتتىك قىزمەتتەر، ونىڭ ىشىندە مەكەنجاي جانە زەينەتاقى انىقتامالارىن، جىلجىمايتىن مۇلىكتىڭ بار-جوعى جانە وعان سالىنعان اۋىرتپالىقتار تۋرالى انىقتامالاردى الۋ، سونداي-اق ايىپپۇلداردى، سالىقتار مەن مەملەكەتتىك باجداردى تولەۋ مۇمكىندىگى ۇسىنىلدى. 2019 جىلعا قاراي قوسىمشادا 70-كە جۋىق قىزمەت پەن سەرۆيس قولجەتىمدى بولدى.
2019 جىلى mGov قوسىمشاسىنىڭ ديزاينى جاڭارتىلىپ، اتاۋى eGov Mobile بولىپ وزگەرتىلدى. وسى ساتتەن باستاپ ءموبيلدى تسيفرلىق ۇكىمەتتى دامىتۋدىڭ جاڭا كەزەڭى باستالدى. 2020 جىلى قوسىمشادا بيومەتريالىق سايكەستەندىرۋ ەنگىزىلىپ، مەملەكەتتىك قىزمەتتەردى الۋ كەزىندە جەكە باستى راستاۋ پروتسەسى جەڭىلدەتىلدى.
ەڭ سۇرانىسقا يە سەرۆيستەردىڭ ءبىرى - قۇجاتتاردىڭ ەلەكتروندىق نۇسقالارىن زاڭنامادا كوزدەلگەن جاعدايلاردا قاعاز نەمەسە فيزيكالىق قۇجاتتاردىڭ ورنىنا ۇسىنۋعا مۇمكىندىك بەرەتىن «تسيفرلىق قۇجاتتار» سەرۆيسى. سەرۆيس ىسكە قوسىلعاننان بەرى پايدالانۋشىلار تسيفرلىق قۇجاتتارعا 600 ميلليوننان استام رەت جۇگىنگەن. كەيىن بۇل سەرۆيس ەكىنشى دەڭگەيلى بانكتەردىڭ تانىمال قوسىمشالارىندا دا قولجەتىمدى بولدى.
تاعى ءبىر ماڭىزدى قۇرال - ەلەكتروندىق تسيفرلىق قولتاڭبانى شىعارۋ جانە QR-كود ارقىلى قۇجاتتارعا قول قويۋ مۇمكىندىگى. بۇگىنگى تاڭدا پايدالانۋشىلار QR-كود ارقىلى قول قويۋ قىزمەتىن شامامەن 80 ميلليون رەت پايدالانعان.
«جەتى جىل ىشىندە eGov Mobile جەكەلەگەن مەملەكەتتىك قىزمەتتەردى الۋعا ارنالعان قوسىمشادان قازاقستاننىڭ نەگىزگى تسيفرلىق پلاتفورمالارىنىڭ بىرىنە اينالدى. ەگەر 2019 جىلى اي سايىنعى بەلسەندى پايدالانۋشىلار سانى 272 مىڭ بولسا، 2026 جىلى بۇل كورسەتكىش 7,5 ميلليون ادامعا جەتىپ، شامامەن 28 ەسەگە ءوستى. بيىل قوسىمشا ارقىلى 20 ميلليوننان استام مەملەكەتتىك قىزمەت كورسەتىلدى. بۇل قوسىمشانىڭ قازاقستاندىقتار اراسىندا سۇرانىسقا يە بولىپ كەلە جاتقانىن كورسەتەدى. بۇگىندە eGov Mobile مەملەكەتتىك قىزمەتتەر مەن تسيفرلىق سەرۆيستەردى ءبىر پلاتفورماعا بىرىكتىرىپ، ولاردى الۋدى ىڭعايلى ءارى قولجەتىمدى ەتۋدە. ءبىز ازاماتتاردىڭ كۇندەلىكتى ماسەلەلەرىن ۇيدەن شىقپاي-اق، تەزىرەك، وڭاي ءارى بارىنشا از كۇش جۇمساپ شەشۋى ءۇشىن ءموبيلدى ۇكىمەتتى جەتىلدىرۋدى جالعاستىرامىز»، - دەپ اتاپ ءوتتى قر جاساندى ينتەللەكت جانە تسيفرلىق دامۋ ءبىرىنشى ۆيتسە-ءمينيسترى روستيسلاۆ كونياشكين.
2024 جىلدىڭ شىلدەسىندە ەلەكتروندىق ۇكىمەتتىڭ ءموبيلدى ەكوجۇيەسى كاسىپكەرلەرگە ارنالعان eGov Business قوسىمشاسىنىڭ ىسكە قوسىلۋىمەن كەڭەيدى. ول بيزنەس وكىلدەرىنە سمارتفون ارقىلى مەملەكەتتىك قىزمەتتەردى پايدالانۋعا، ەتسق شىعارۋعا ءوتىنىم بەرۋگە، QR-كود ارقىلى قۇجاتتارعا قول قويۋعا، زاڭدى تۇلعانىڭ ءبىرىنشى باسشىسىن تىركەۋگە جانە باسقا دا سۇرانىسقا يە وپەراتسيالاردى ورىنداۋعا مۇمكىندىك بەرەدى.
2025 جىلى eGov Mobile تولىق رەبرەندينگتەن ءوتىپ، قوسىمشانىڭ ۆيزۋالدى ديزاينى مەن پايدالانۋشى تاجىريبەسى جاڭارتىلدى.
2026 جىلى قوسىمشادا پايدالانۋشىلارعا مەملەكەتتىك قىزمەتتەردى وڭاي تابۋعا جانە قاجەتتى اقپاراتتى ديالوگ فورماتىندا الۋعا كومەكتەسەتىن جاڭا قۇرال - eGov GPT پايدا بولدى. ونى ينتەراكتيۆتى انىقتامالىق رەتىندە پايدالانۋعا بولادى. ول ءۇشىن سۇراقتى قاراپايىم تىلمەن قويىپ نەمەسە ءوز جاعدايىن سيپاتتاۋ جەتكىلىكتى. سەرۆيس قولجەتىمدى قىزمەتتەر مەن قاجەتتى ءىس-قيمىل ءتارتىبى تۋرالى اقپارات بەرەدى. مىسالى، بالانىڭ تۋىن تىركەۋ تۋرالى سۇراق قويىلعان جاعدايدا، سەرۆيس قانداي قىزمەتتەر قاجەت بولۋى مۇمكىن ەكەنىن جانە نەدەن باستاۋ كەرەكتىگىن تۇسىندىرەدى. eGov GPT ارقىلى 50-دەن استام مەملەكەتتىك قىزمەت قولجەتىمدى، ال سەرۆيسكە جۇگىنۋ سانى 150 مىڭنان استى.
سول جىلى eGov GPT AI & Digital Bridge Awards 2026 سىيلىعىنىڭ «GovTech Project of the Year» نوميناتسياسى بويىنشا جەڭىمپازى اتاندى. ماراپات استانادا وتكەن AI & Digital Bridge 2026 حالىقارالىق تەحنولوگيالىق فورۋمى اياسىندا تابىستالدى.
