فوتو: Almaty TV
الماتىدا تاۋعا سەرۋەندەۋگە باراتىن تۇرعىندار مەن تۋريستەر ەندى ساپارى تۋرالى الدىن الا ونلاين حابارلاي الادى. بۇل ءۇشىن Almaty Hike اتتى جاڭا سەرۆيس ىسكە قوسىلدى.
جوبا الماتى قالاسىنىڭ تابيعات قورعاۋ پروكۋراتۋراسى، ىلە-الاتاۋى مەملەكەتتىك ۇلتتىق تابيعي پاركى، ءال-فارابي اتىنداعى قازۇۋ، قالالىق توتەنشە جاعدايلار دەپارتامەنتى مەن اكىمدىكتىڭ بىرلەسۋىمەن ازىرلەنگەن.
سەرۆيستىڭ باستى ماقساتى – تاۋعا شىعاتىن ادامداردىڭ قاۋىپسىزدىگىن قامتاماسىز ەتۋ جانە توتەنشە جاعداي كەزىندە ولاردى ىزدەۋدى جەڭىلدەتۋ. سونىمەن قاتار پلاتفورما ارقىلى تۋريستەر اۋا رايى مەن قاۋىپسىزدىك تالاپتارى تۋرالى اقپارات الا الادى.
الماتى قالاسىنىڭ مامانداندىرىلعان تابيعات قورعاۋ پروكۋرورى ارمان نۇعىربەكوۆتىڭ ايتۋىنشا، جاڭا جۇيە قۇتقارۋ قىزمەتتەرىنە تاۋعا شىققان ادامدار تۋرالى الدىن الا مالىمەت الۋعا مۇمكىندىك بەرەدى. بۇل ىزدەستىرۋ جۇمىستارىن جەدەلدەتىپ، وقىس وقيعالار كەزىندە كومەك كورسەتۋ ۋاقىتىن قىسقارتۋعا ىقپال ەتەدى.
Almaty Hike پلاتفورماسىندا تۋريستەر ساپار ۋاقىتىن، باراتىن باعىتىن جانە بايلانىس ءنومىرىن كورسەتۋى كەرەك. تىركەلۋ ءۇشىن سايتقا كىرۋگە نەمەسە تاۋلى ايماقتارعا قاتىنايتىن اۆتوبۋستار مەن ايالدامالارداعى QR-كودتى سكانەرلەۋگە بولادى.
ماڭىزدىسى، سەرۋەن اياقتالعان سوڭ پلاتفورماعا قايتا كىرىپ، تاۋدان امان-ەسەن ورالعانىڭىزدى بەلگىلەۋ قاجەت. بۇل اقپارات قۇتقارۋشىلارعا ءتۋريستىڭ ساپارى اياقتالعانىن بىلۋگە كومەكتەسەدى.
