28 قازان - كاسىپكەرلەر كۇنى قارساڭىندا الماتىدا TikTok Impact Forum ءوتتى. فورۋم اياسىندا پلاتفورما قازاقستان رەسپۋبليكاسى «اتامەكەن» ۇلتتىق كاسىپكەرلەر پالاتاسىمەن بىرلەسىپ، «TikTok اسەرى: پلاتفورمانىڭ قازاقستانداعى شاعىن جانە ورتا كاسىپكەرلىككە ىقپالى» اتتى زەرتتەۋدىڭ جاڭارتىلعان ناتيجەلەرىن ۇسىندى. زەرتتەۋ ناتيجەلەرىنە سايكەس، ساۋالناماعا قاتىسۋشىلاردىڭ 70%-دان استامى پلاتفورمانى بيزنەس ماقساتىندا ايىنا كەمىندە ءبىر رەت پايدالانادى، ال 88,3%-ى ونىڭ جاڭا كليەنتتەردى تارتۋعا وڭ اسەر ەتەتىنىن اتاپ ءوتتى.
جەتەكشى TikTok بەينەپلاتفورماسى الماتىدا Impact Forum وتكىزدى. ءىس-شارا پلاتفورمانىڭ قازاقستانداعى كاسىپكەرلىك پەن ەكونوميكانى دامىتۋداعى رولىنە ارنالدى. باعدارلاماعا پلاتفورمانىڭ «اتامەكەن» ۇكپ-مەن بىرلەسىپ جۇرگىزگەن جاڭارتىلعان زەرتتەۋىنىڭ ناتيجەلەرىن تانىستىرۋ، قازاقستاننىڭ شاعىن جانە ورتا بيزنەس وكىلدەرى قاتىسقان پانەلدىك پىكىرتالاس، TikTok for Business شەبەرلىك ساباعى جانە TikTok-تى ىلگەرىلەتۋ مەن ءوسۋدى قامتاماسىز ەتۋ ءۇشىن بەلسەندى پايدالاناتىن جەرگىلىكتى برەندتەردىڭ كورمەسى كىردى.
بىرلەسكەن زەرتتەۋ ناتيجەلەرىن ەكونوميكا عىلىمدارىنىڭ كانديداتى، «اتامەكەن» ۇلتتىق كاسىپكەرلەر پالاتاسىنىڭ باسقارۋشى ديرەكتورى – بيزنەستى رەتتەۋ دەپارتامەنتىنىڭ ديرەكتورى دينارا اقىنبەكوۆا تانىستىردى.
قاتىسۋشىلار كومپانيالاردىڭ تانىمالدىلىقتى ارتتىرۋ، كليەنتتەر تارتۋ، ساتىلىمدى دامىتۋ جانە جاڭا نارىقتارعا شىعۋ ءۇشىن ورگانيكالىق كونتەنتتى، اۆتورلارمەن ىنتىماقتاستىقتى جانە جارنامالىق قۇرالداردى قالاي پايدالاناتىنىن تالقىلادى. فورۋم اياسىندا كاسىپكەرلەر ءوز ونىمدەرىن دە تانىستىرىپ، پلاتفورمادا جۇمىس ىستەۋ تاجىريبەسىمەن ءبولىستى.
كاسىپكەرلەر بيزنەستى دامىتۋ ءۇشىن TikTok-تى جۇيەلى تۇردە پايدالانادى
TikTok-تىڭ كاسىپكەرلىككە ىقپالى تۋرالى زەرتتەۋ ەكىنشى جىل قاتارىنان جۇرگىزىلىپ كەلەدى. زەرتتەۋ 2026 جىلعى قىركۇيەك–قازان ايلارىندا قازاقستاننىڭ بارلىق 20 وڭىرىنەن 206 كومپانيانىڭ قاتىسۋىمەن جۇرگىزىلگەن ساۋالناماعا نەگىزدەلگەن. ساۋالناما جەتى سالانى قامتىدى: مادەنيەت، ويىن-ساۋىق جانە تۋريزم; دەنساۋلىق، سۇلۋلىق جانە سپورت; ازىق-تۇلىك جانە ازىق-تۇلىككە جاتپايتىن تاۋارلاردى ءوندىرۋ مەن ساتۋ; قوعامدىق تاماقتاندىرۋ; ءبىلىم بەرۋ جانە جىلجىمايتىن مۇلىك سالاسىنداعى قىزمەتتەر. [1]
2026 جىلى ساۋالناماعا قاتىسقان كاسىپورىنداردىڭ 43,7%-ى TikTok-تى بيزنەس ماقساتىندا اي سايىن پايدالاناتىنىن حابارلاعان. بۇل وتكەن جىلعى ۇقساس زەرتتەۋدەگى كورسەتكىشتەن (29,5%) 14,2 پايىزدىق تارماققا جوعارى. ال كاسىپورىنداردىڭ 27,2%-ى پلاتفورمانى اپتا سايىن نەمەسە ودان دا ءجيى پايدالانادى. وسىلايشا، ساۋالناماعا قاتىسۋشىلاردىڭ 70%-دان استامى پلاتفورمانى ايىنا كەمىندە ءبىر رەت پايدالانادى.
تۇراقتى پايدالانۋ ءارتۇرلى جۇمىس ءوتىلى بار كومپانيالارعا ءتان. ساۋالناما ناتيجەلەرىنە سايكەس، 10 جىلدان استام ۋاقىت جۇمىس ىستەپ كەلە جاتقان كومپانيالاردىڭ 31%-ى TikTok-تى ماركەتينگتىك ماقساتتا اپتا سايىن نەمەسە ودان دا ءجيى پايدالانادى. بۇل كورسەتكىش جاس كومپانيالار اراسىنداعى كورسەتكىشتەردەن كەم ەمەس: ءبىر جىلدان از ۋاقىت بۇرىن قۇرىلعان كاسىپورىنداردىڭ 15,4%-ى TikTok-تى اپتاسىنا كەمىندە ءبىر رەت پايدالانادى; جۇمىس ىستەپ كەلە جاتقانىنا ءبىر جىلدان ءۇش جىلعا دەيىنگى كومپانيالاردا بۇل كورسەتكىش 30,8%-دى، ءۇش جىلدان بەس جىلعا دەيىنگى كومپانيالاردا 32,2%-دى، ال بەس جىلدان ون جىلعا دەيىنگى كومپانيالاردا 20%-دى قۇرايدى.
TikTok تابىس كوزى رەتىندە
وتكەن جىلعى زەرتتەۋمەن سالىستىرعاندا، TikTok پلاتفورماسىنداعى بەلسەندىلىكتەن تۇسەتىن تابىسى جالپى تابىسىنىڭ 5%-ىنان اساتىن ساۋالناماعا قاتىسقان كومپانيالاردىڭ ۇلەسى 12,3 پايىزدىق تارماققا ارتىپ، 57,8%-عا جەتتى. بۇل رەتتە ساۋالناماعا قاتىسقان كاسىپورىنداردىڭ 14,6%-ى ءۇشىن مۇنداي تابىس جالپى كىرىستىڭ 25%-ىن نەمەسە ودان دا كوپ بولىگىن قۇراعان. TikTok-تى اپتا سايىن پايدالاناتىن شاعىن جانە ورتا كاسىپكەرلىك سۋبەكتىلەرىنىڭ (شوكس) شامامەن 11%-ى جالپى تابىسىنىڭ 50% جانە ودان استامى پلاتفورماداعى بەلسەندىلىكتەن تۇسەتىنىن مالىمدەگەن. بۇل دەرەكتەر TikTok-تاعى تۇراقتى بەلسەندىلىك پەن كاسىپورىنداردىڭ وسى پلاتفورماعا جاتقىزاتىن تابىس ۇلەسى اراسىندا وڭ بايلانىس بار ەكەنىن كورسەتەدى. [2]
TikTok كليەنتتەردى تارتۋعا جانە باسەكەلەستەر اراسىندا ەرەكشەلەنۋگە كومەكتەسەدى
زەرتتەۋ دەرەكتەرىنە سايكەس، ساۋالناماعا قاتىسۋشىلاردىڭ 88,3%-ى TikTok جاڭا كليەنتتەر تارتۋعا وڭ ىقپال ەتەتىنىن اتاپ وتكەن، 83,5%-ى پلاتفورما كليەنتتەرمەن ءوزارا ارەكەتتەسۋگە وڭ اسەر ەتەتىنىن كورسەتكەن، ال 73,3%-ى پلاتفورما ءوز بيزنەسىنىڭ باسەكەلەستەر اراسىندا ەرەكشەلەنۋىنە كومەكتەسەدى دەپ سانايدى. بۇل رەتتە پلاتفورمانى پايدالانۋدىڭ ەڭ كەڭ تارالعان ءتاسىلى ورگانيكالىق كونتەنت بولىپ قالا بەرەدى: 2026 جىلى ساۋالناماعا قاتىسقان كومپانيالاردىڭ 77,6%-ى بەينەماتەريالدار جاريالاعان.
سونىمەن قاتار، كونتەنت اۆتورلارىمەن ىنتىماقتاستىق ورناتاتىن كاسىپورىنداردىڭ ۇلەسى الدىڭعى زەرتتەۋدەگى 10,4%-دان 22,8%-عا دەيىن ءوستى، ال ساۋالناماعا قاتىسۋشىلاردىڭ 18,0%-ى اقىلى جارنامانى پايدالانعان. بۇل كورسەتكىشتەر وسكەنىنە قاراماستان، كونتەنت جاريالاۋ مەن اقىلى قۇرالداردى پايدالانۋ اراسىندا ايتارلىقتاي الشاقتىق ساقتالىپ وتىر. بۇل شاعىن جانە ورتا كاسىپكەرلىك سۋبەكتىلەرىنىڭ باسىم بولىگى پلاتفورمانىڭ مۇمكىندىكتەرىن ءالى دە تولىق پايدالانباي وتىرعانىن كورسەتەدى. دەمەك، تسيفرلىق ماركەتينگ ارقىلى ودان ءارى ءوسۋ الەۋەتى زور.
TikTok-قا جۇمسالاتىن شىعىنداردى جالپى قاراستىراتىن بولساق، ياعني اقىلى جارناما مەن كونتەنت اۆتورلارىمەن ىنتىماقتاستىقتى عانا ەمەس، سونىمەن قاتار كونتەنت ءوندىرۋدى، SMM-ماماندارىنىڭ جۇمىسىن جانە باسقا دا ماركەتينگتىك قىزمەتتى ەسكەرسەك، پلاتفورمادا ىلگەرىلەتۋگە بيۋدجەت بولەتىن ساۋالناماعا قاتىسقان كومپانيالاردىڭ ۇلەسى 2025 جىلعى 62,3%-دان 2026 جىلى 75,7%-عا دەيىن ءوستى.
2026 جىلعى ساۋالناما ناتيجەسىندە، پلاتفورمانىڭ ماركەتينگتىك بيۋدجەتتەگى ۇلەسى مەن كاسىپكەرلەردىڭ ونى پايدالانۋمەن بايلانىستىراتىن تابىس ۇلەسى اراسىنداعى وڭ بايلانىستىڭ كۇشەيگەنىن كورسەتتى. TikTok-قا بيۋدجەت بولمەيتىن كاسىپورىندار ورتا ەسەپپەن ءوز تابىسىنىڭ 3,9%-ىن وسى پلاتفورماعا جاتقىزعان. ال ماركەتينگتىك بيۋدجەتىنىڭ 70%-دان استام بولىگىن TikTok-قا باعىتتايتىن كومپانيالار اراسىندا بۇل كورسەتكىش ورتا ەسەپپەن 42,0%-دى قۇراعان
TikTok-تى پايدالانۋ كورسەتكىشتەرىنىڭ سالالار بويىنشا وزگەرۋى
دەرەكتەر TikTok-پەن ءتۇسىمىنىڭ بەلگىلى ءبىر بولىگىن بايلانىستىراتىن كومپانيالاردىڭ ۇلەسى ساۋالناماعا قاتىسقان سالالىق توپتار اراسىندا ءارتۇرلى ەكەنىن كورسەتەدى. الدىڭعى ساۋالنامامەن سالىستىرعاندا، ءتۇسىمىنىڭ كەمىندە 5%-ىن TikTok پلاتفورماسىمەن بايلانىستىراتىن كومپانيالار ۇلەسىنىڭ ەڭ جوعارى ءوسىمى جىلجىمايتىن مۇلىك قىزمەتتەرى سالاسىندا (+40,6 پايىزدىق تارماق، 66,6%-عا دەيىن), مادەنيەت، ويىن-ساۋىق جانە تۋريزم سالالارىندا (+24,7 پايىزدىق تارماق، 60,5%-عا دەيىن), سونداي-اق ازىق-تۇلىك تاۋارلارى سەگمەنتىندە (+18,1 پايىزدىق تارماق، 56,8%-عا دەيىن) تىركەلدى. قوعامدىق تاماقتاندىرۋ سالاسىندا (68%) جانە ازىق-تۇلىككە جاتپايتىن تاۋارلار سەگمەنتىندە (53,5%) تۇراقتى تۇردە جوعارى كورسەتكىشتەر ساقتالىپ وتىر. بۇل TikTok-تا ىلگەرىلەتۋدىڭ تيىمدىلىگى سالاعا بايلانىستى وزگەرەتىنىن، ال بىرقاتار سالالار ءۇشىن پلاتفورمانىڭ الەۋەتى ءالى دە تولىق اشىلماعانىن كورسەتەدى.
كاسىپكەرلەردىڭ TikTok-پەن بايلانىستىراتىن كىرىسىنىڭ مودەلدىك باعاسى
كاسىپكەرلەردىڭ TikTok-پەن بايلانىستىراتىن كىرىسىنىڭ ىقتيمال اۋقىمىن باعالاۋ ءۇشىن زەرتتەۋشىلەر ولاردىڭ اينالىمى مەن وسى كىرىستىڭ ۇلەسى تۋرالى جاۋاپتارىنا، سونداي-اق شوب سانى جونىندەگى رەسمي ستاتيستيكاعا نەگىزدەلگەن مودەل قۇردى. وتكەن جىلداعىداي، ءۇش ستسەناري قاراستىرىلدى: TikTok-تى كاسىپكەرلەردىڭ 10%-ى بەلسەندى پايدالاناتىن، ولاردىڭ ۇلەسى 15%-دى قۇرايتىن جانە 20%-عا جەتەتىن جاعدايلار.
كونسەرۆاتيۆتى ستسەناري رەتىندە 10% دەڭگەيى تاڭدالدى. بۇل كورسەتكىش ۇلىبريتانيا مەن اۆستراليانى قوسا العاندا، باسقا ەلدەردە جۇرگىزىلگەن ۇقساس زەرتتەۋلەردىڭ ناتيجەلەرىنە سايكەس كەلەدى. وسى ستسەناريگە سايكەس، 2026 جىلى TikTok-تى پايدالانۋمەن بايلانىستى قازاقستاننىڭ شاعىن جانە ورتا كاسىپكەرلىك سۋبەكتىلەرىنىڭ ەسەپتىك تابىسى شامامەن 531,6 ملرد تەڭگەنى قۇرادى. قامتۋ دەڭگەيى 15% بولاتىن قالىپتى ستسەناريدە TikTok-قا جاتقىزىلاتىن تابىس 797,4 ملرد تەڭگەنى، ال قامتۋ دەڭگەيى 20% بولاتىن جەدەل تسيفرلاندىرۋ ستسەناريىندە 1 063,2 ملرد تەڭگەنى قۇرايدى. [4]
بۇل سومالاردى قازاقستاننىڭ جالپى ىشكى ونىمىمەن ء(جىو) سالىستىرعاندا، ولار تيىسىنشە ءجىو-ءنىڭ 0,33% / 0,50% / 0,67%-ىنا تەڭ. الدىڭعى زەرتتەۋدە بۇل كورسەتكىشتەر شامامەن 0,16% / 0,25% / 0,33% بولعان. بۇل رەتتە اتالعان كورسەتكىشتەر پلاتفورماعا بايلانىستى تابىستىڭ ەكونوميكالىق اۋقىمىن كورسەتەدى جانە TikTok-تىڭ ەلدىڭ ءجىو-نە تىكەلەي قوسقان ۇلەسىنىڭ باعاسى بولىپ تابىلمايدى. باعالاۋعا جۇمىس ورىندارىن قۇرۋ، جەتكىزۋ تىزبەكتەرىن دامىتۋ جانە ءۇي شارۋاشىلىقتارىنىڭ تۇتىنۋىنا ىقپال ەتۋ سياقتى جاناما اسەرلەر ەنگىزىلمەگەن.
مودەلدىك تابىس، مودەلدىك تابىستىڭ ءجىو-گە قاتىناسى جانە شوك سۋبەكتىلەرىن بولجامدى قامتۋ دەڭگەيى نەگىزىندە TikTok-قا جاتقىزىلاتىن تابىس. [5]
سانداردىڭ ارتىنداعى بيزنەس تاريحى
TikTok Impact Forum اياسىندا جانە زەرتتەۋ بارىسىندا اۋديتورياسىن كەڭەيتىپ، ساتىلىم كولەمىن ارتتىرۋ ءۇشىن TikTok-تى پايدالاناتىن قازاقستاندىق كومپانيالاردىڭ مىسالدارى ۇسىنىلدى. ماسەلەن، شىمكەنت قالاسىنداعى Al-AN Duken كيىم برەندى @alan_duken ءبىر جىل ىشىندە TikTok-تاعى جازىلۋشىلار سانىن شامامەن 15 مىڭعا، ال ساتىلىم كولەمىن شامامەن 20%-عا ارتتىرعان. كومپانيانىڭ مالىمەتىنشە، TikTok-تاعى ءبىر ساعاتتىق تىكەلەي ەفير ورتا ەسەپپەن 15–20 ءوتىنىم ءتۇسىرىپ، 3-تەن 6-عا دەيىن ساتىلىمعا اكەلەدى.
شىعىس قازاقستاننان شىققان تابيعي بال ءوندىرۋشى Lesnoe VKO برەندى @lesnoe_vko ونىمدەرى مەن ومارتا جۇمىسى تۋرالى ورگانيكالىق كونتەنتكە باسىمدىق بەردى. كومپانيا قازاقستاننان تىس جەرلەردە دە ساتىپ الۋشىلار تاۋىپ، ەكسپورتتان تۇسەتىن تابىستىڭ ءوسۋىن TikTok-تاعى برەند كونتەنتىنە شەتەلدىك اۋديتوريانىڭ قىزىعۋشىلىعىمەن بايلانىستىرادى.
Doner na Satpayeva فاستفۋد جەلىسى @doner_na_satpayeva_ اۋديتوريامەن قارىم-قاتىناس ورناتۋ قۇرالى رەتىندە TikTok-قا باسىمدىق بەرىپ، ۇتىلمادى. بۇگىندە كومپانيا اككاۋنتىنىڭ جازىلۋشىلارىنىڭ سانى ميلليوننان اسادى، ال كوپتەگەن قوناقتار بۇل ورىن تۋرالى ۆيدەولاردان، سونىڭ ىشىندە باسقا قالالاردا جاريالانعان ۆيدەولاردان ءبىلىپ، ارنايى كەلەدى. ءتورت جىل ىشىندە جەلى الماتىدا 13 نۇكتەگە دەيىن كەڭەيدى، ال جاقىن ارادا جاڭا قالاعا شىعۋدى جوسپارلاپ وتىر. وتكەن جىلى كومپانيا TikTok سىيلىعىن «شاعىن بيزنەستىڭ ۇزدىك اككاۋنتى» نوميناتسياسى بويىنشا الدى. كوماندانىڭ ايتۋىنشا، تابىستىڭ سىرى قاراپايىم قاعيدادا: كونتەنت شىنايى ءارى تابيعي بولۋى كەرەك. ءدال وسى قاسيەت اۋديتوريانىڭ قىزىعۋشىلىعىن ساقتاپ، كەزدەيسوق كورەرمەندى تۇراقتى قوناققا اينالدىرادى.
ء«ار بيزنەستىڭ ءوز تاريحى بار. كەيدە ءبارى شاعىن يدەيادان، وتباسىلىق ىستەن نەمەسە كۇتپەگەن جەردەن مىڭداعان ادامنىڭ كوڭىلىنەن شىعاتىن قىسقا ۆيدەودان باستالادى. جاڭارتىلعان زەرتتەۋ قازاقستاندىق كاسىپكەرلەردىڭ TikTok-تى بارعان سايىن سەنىمدى ءارى ءتيىمدى پايدالانىپ كەلە جاتقانىن، ال پلاتفورمانىڭ بيزنەس ءۇشىن تەك تانىمالدىقتى ارتتىراتىن الاڭ عانا ەمەس، سونىمەن قاتار ىلگەرىلەتۋگە، ساتىلىمدى ارتتىرۋعا جانە بيزنەستى دامىتۋعا مۇمكىندىك بەرەتىن تولىققاندى قۇرالعا اينالىپ كەلە جاتقانىن كورسەتەدى. ءبىز كەز كەلگەن اۋقىمداعى بيزنەستىڭ TikTok-تا ءوز اۋديتورياسىن تاۋىپ، ونىمەن بىرگە وسۋىنە مۇمكىندىك بەرگىمىز كەلەدى جانە وسى ماقساتتا قولدان كەلگەننىڭ ءبارىن جاساپ جاتىرمىز»، — TikTok كومپانياسىنىڭ ورتالىق ازيا مەن شىعىس ەۋروپاداعى بيزنەستى دامىتۋ دەپارتامەنتىنىڭ باسشىسى يۋليا كۋشنير.
«„اتامەكەن“ ءۇشىن جاڭا تەحنولوگيالاردىڭ ءىس جۇزىندە قالاي جۇمىس ىستەيتىنىن جانە وتاندىق كاسىپكەرلەرگە قانداي مۇمكىندىكتەر بەرەتىنىن ءتۇسىنۋ ماڭىزدى. سوندىقتان TikTok-پەن ىنتىماقتاستىعىمىزدىڭ نەگىزگى باعىتتارىنىڭ ءبىرى بيزنەستىڭ تاجىريبەسىن زەرتتەۋ بولدى. بيىل وڭىرلىك كاسىپكەرلەر پالاتالارىنىڭ بەلسەندى قاتىسۋىمەن زەرتتەۋدى جاڭارتىپ، قازاقستاندىق كومپانيالاردىڭ پلاتفورمانى پايدالانۋ تاجىريبەسىنەن ناقتى مىسالدار جينادىق»، — دەپ اتاپ ءوتتى قازاقستان رەسپۋبليكاسى «اتامەكەن» ۇلتتىق كاسىپكەرلەر پالاتاسىنىڭ باسقارما توراعاسىنىڭ ورىنباسارى اسلان قاليعازين.
ۇسىنىلعان دەرەكتەر مەن جەرگىلىكتى كومپانيالاردىڭ وقيعالارى TikTok-تىڭ شاعىن جانە ورتا بيزنەس ءۇشىن تەك تانىمالدىقتى ارتتىرۋ ارناسى عانا ەمەس، سونىمەن قاتار ىلگەرىلەتۋ مەن ءوسۋدىڭ پراكتيكالىق قۇرالىنا اينالىپ كەلە جاتقانىن كورسەتەدى.
TikTok تۋرالى
TikTok – قىسقا ۆيدەوروليكتەرگە ارنالعان جەتەكشى پلاتفورما. ءبىزدىڭ ميسسيامىز – ادامداردى شىعارماشىلىققا شابىتتاندىرۋ جانە ولارعا قۋانىش سىيلاۋ.
رەداكتورعا ارنالعان انىقتاما
ناتيجەلەر ساۋالناماعا قاتىسۋشىلاردىڭ تاجىريبەسى مەن باعالاۋىن كورسەتەدى جانە ولاردى ەلدەگى بارلىق شوب سۋبەكتىلەرىنە اۆتوماتتى تۇردە تاراتۋعا بولمايدى.
جاۋاپتار كاسىپكەرلەردىڭ ءوز باعالاۋىن كورسەتەدى جانە پلاتفورمانىڭ كىرىسكە سەبەپ-سالدارلىق اسەرىن انىقتامايدى.
زەرتتەۋ ەسەپتەۋلەرى ىرىكتەمە قۇرامىنا جانە جەكەلەگەن كومپانيالاردىڭ جاۋاپتارىنا تاۋەلدى. 2025 جانە 2026 جىلدارداعى ىرىكتەمەلەر بىردەي ەمەس، پانەلدىك زەرتتەۋ قۇرمايدى جانە قازاقستانداعى بارلىق شوب سۋبەكتىلەرى ءۇشىن ستاتيستيكالىق تۇرعىدان رەپرەزەنتاتيۆتى بولىپ تابىلمايدى. سوندىقتان ەكى كەزەڭنىڭ ناتيجەلەرى اراسىنداعى ايىرماشىلىقتاردى ساۋالناماعا قاتىسقان كاسىپورىندار اراسىنداعى ۇردىستەر رەتىندە قاراستىرعان ءجون، ال اقشالاي كورسەتكىشتەردى بۇكىل ەل بويىنشا ولشەنگەن ءوسىم ەمەس، ستسەناريلىك باعالاۋ رەتىندە ءتۇسىنۋ قاجەت.
TikTok قازاقستاندا كاسىپكەرلىكتى قولداۋعا باعىتتالعان باستامالاردى جۇيەلى تۇردە دامىتىپ كەلەدى:
2021 جىلى ەلدە ءارتۇرلى اۋقىمداعى بيزنەسكە ارنالعان شەشىمدەرى بار TikTok for Business پلاتفورماسى ىسكە قوسىلدى;
2022 جىلى Astana Hub-پەن بىرلەسىپ TikTok Startup Academy باعدارلاماسى ىسكە قوسىلدى. 2025 جىلعا قاراي باعدارلاماعا قاتىسۋشىلاردىڭ ءۇش لەگى وقۋدى اياقتادى;
2024 جىلى TikTok پەن قازاقستان رەسپۋبليكاسى ۇلتتىق كاسىپكەرلەر پالاتاسى «اتامەكەن» بىرلەسىپ، الەۋمەتتىك جانە ەكولوگيالىق جوبالاردى جۇزەگە اسىراتىن 800-دەن استام ميكرو جانە شاعىن كاسىپورىندى بىرىكتىرگەن #قازاقستانداجاسالعان («قازاقستاندا جاسالعان») بايقاۋىن وتكىزدى.
بۇل — كاسىپكەرلەردىڭ ءوز باعالاۋلارىنا نەگىزدەلگەن شارتتى ەسەپتەۋ ناتيجەلەرى، قازاقستانداعى بارلىق شوب سۋبەكتىلەرىنىڭ راستالعان ساتۋ كولەمى ەمەس. زەرتتەۋ TikTok بولماعان جاعدايدا وسى ساتىلىمداردىڭ قانداي بولىگى جۇزەگە اسپايتىنىن انىقتامايدى.
