الماتى وبلىسىنداعى جيھاز تسەحى اي سايىن 3 مىڭ ورىندىق شىعارادى

2179
Adyrna.kz Telegram

الماتى وبلىسىندا كاسىپكەر ورىندىقتار ءوندىرىسىن جولعا قويدى. مەملەكەتتىك قولداۋدىڭ ارقاسىندا اشىلعان جيھاز تسەحى اي سايىن ءۇش مىڭعا دەيىن ورىندىق شىعارادى.

ىلە اۋدانىنىڭ تۇرعىنى تىلەك ءادىلحات «ەڭبەك» مەملەكەتتىك باعدارلاماسى اياسىندا جۇزەگە اسىرىلىپ جاتقان «باستاۋ بيزنەس» كاسىپكەرلىك نەگىزدەرى جوباسىنىڭ ارقاسىندا كاسىپكەر اتاندى. ول ۇزاق ۋاقىتتان بەرى جيھاز جاساپ، ونى بازاردا ساتىپ ءجۇردى.

2018 جىلى ول الماتى وبلىسىنىڭ كاسىپكەرلەر پالاتاسى ارقىلى «باستاۋ بيزنەس» جوباسى بويىنشا وقۋعا جازىلدى. كۋرس اياقتالعان سوڭ «جاس كاسىپكەر» باعدارلاماسى بويىنشا 505 مىڭ تەڭگە كولەمىندە گرانتقا الدى. ال وتكەن جىلى جيھاز وندىرەتىن تسەحتى دامىتۋ ءۇشىن اۋىل شارۋاشىلىعىن قارجىلاي قولداۋ قورى ارقىلى 6 ملن تەڭگە كولەمىندە نەسيەگە قول جەتكىزدى.

بيزنەستى باستاعان كەزدە ءۇش اپتا بويى قىزمەتكەرلەردى وقىتىپ، تەگىن شەبەرلىك ساباقتارىن وتكىزدىم. قازىر ءوز كوماندامدى جاساقتادىم. ءبىز كۇن سايىن ۇيگە ارنالعان 100 ورىندىق جاسايمىز. وتاندىق ءونىمنىڭ باستى ارتىقشىلىعى ساپاسى مەن باعاسىندا. شەتەلدىڭ ورىندىقتارىنا قاراعاندا قۇنى تومەن. وسىنىڭ ارقاسىندا كوتەرمە تاپسىرىس بەرۋشىلەرىمىز بار، - دەيدى كاسىپكەر.

جيھاز تسەحى ىلە اۋدانىنىڭ جەتىگەن اۋىلىندا ورنالاسقان. ونىمدەر اۋدان ىشىندە جانە الماتى قالاسىنىڭ بازارلارىندا ساتىلادى. بۇگىندە كاسىپكەر جيھاز ءتۇرىن ۇلعايتىپ، جاڭا ستانوكتار ساتىپ الۋ ارقىلى تسەحتى كەڭەيتۋدى جوسپارلاپ وتىر.

الماتى وبلىسى كاسىپكەرلەر پالاتاسىنىڭ ديرەكتورى اسەت شاياحمەتوۆتىڭ ايتۋىنشا، جىل باسىنان بەرى «باستاۋ بيزنەس» جوباسىنىڭ 600-گە جۋىق تۇلەگى ءوز جوبالارىن قارجىلاندىرا الدى.​
جالپى، وتكەن جىلى الماتى وبلىسىندا «باستاۋ بيزنەس» اياسىندا 3022 قاتىسۋشى كاسىپكەرلىك نەگىزدەرىنە وقىتىلدى، 2 مىڭنان استام جوبا جالپى سوماسى 1,8 ملرد تەڭگەگە قارجىلاندىرىلدى.

پىكىرلەر