الماتى وبلىسىندا وندىرىلگەن ونىمدەر الەمنىڭ 61 ەلىنە ەكسپورتتالادى. وڭىردەگى 49 كاسىپورىن شەتەل نارىعىنا ءونىم شىعارىپ، سوڭعى ءۇش جىلدا ەكسپورت كولەمىن 1,1 ملرد اقش دوللارىنا (شامامەن 515 ملرد تەڭگە) جەتكىزگەن.
ەكسپورت گەوگرافياسى جىل سايىن كەڭەيىپ كەلەدى. بۇگىندە وبلىس كاسىپورىندارى ونىمدەرىن تەك كورشى ەلدەرگە ەمەس، تۇركيا، بىرىككەن اراب امىرلىكتەرى، يران، يراك، پاكىستان، گەرمانيا، پولشا، رۋمىنيا جانە بولگارياعا ەكسپورتتايدى. سوڭعى ءۇش جىلدا شالعاي مەملەكەتتەرگە ەكسپورت كولەمى 2,1 ەسە ءوسىپ، 291,7 ملن اقش دوللارىن قۇرادى.
الماتى وبلىسىنىڭ نەگىزگى ساۋدا سەرىكتەستەرىنىڭ ءبىرى – وزبەكستان. سوڭعى ءۇش جىلدا بۇل ەلگە ەكسپورت كولەمى 110 ملن اقش دوللارىنان 203 ملن اقش دوللارىنا دەيىن ۇلعايعان. كورشى مەملەكەتكە نەگىزىنەن ۇن، ءسۇت جانە فارماتسەۆتيكالىق ونىمدەر جەتكىزىلەدى.
ءوڭىر ەكسپورتىنىڭ 60 پايىزدان استامىن اۋىل شارۋاشىلىعى ونىمدەرى مەن ولاردى قايتا وڭدەۋ ارقىلى وندىرىلگەن تاۋارلار قۇرايدى. سونىمەن قاتار قۇرىلىس ماتەريالدارى، حيميا ونەركاسىبى، فارماتسەۆتيكا جانە تەمەكى ونىمدەرى دە سىرتقى نارىققا شىعارىلادى.
اۋىل شارۋاشىلىعى ونىمدەرىنىڭ ىشىندە ەت، قۇس ەتى، جەمىس-جيدەك، كوكونىس، ءسۇت ونىمدەرى مەن سۋسىندارعا سۇرانىس جوعارى. ال كوكونىس شىرىندارىن ەكسپورتتاۋ بويىنشا الماتى وبلىسى رەسپۋبليكادا كوش باستاپ تۇر.
الماتى وبلىسىنىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى ايبول راقىمباەۆتىڭ ايتۋىنشا، ءوندىرىستى جاڭعىرتۋ، ينۆەستيتسيا تارتۋ جانە بيزنەستى قولداۋ شارالارى ءوڭىردىڭ ەكسپورتتىق الەۋەتىن ارتتىرىپ، جاڭا نارىقتارعا شىعۋىنا جول اشىپ وتىر.
«الماتى وبلىسى قازاقستاننىڭ ءىرى ەكسپورتتىق جانە لوگيستيكالىق ورتالىقتارىنىڭ بىرىنە اينالىپ كەلەدى. بۇل ناتيجەگە ازىق-تۇلىك ونەركاسىبى، فارماتسەۆتيكا جانە اگروونىمدەردى قايتا وڭدەۋ سالالارىنداعى كاسىپورىنداردىڭ وندىرىستىك قۋاتىنىڭ ارتۋى ىقپال ەتتى. سونىمەن قاتار ءوڭىردىڭ كولىك-لوگيستيكالىق الەۋەتى دە ەكسپورتتىڭ دامۋىنا وڭ سەرپىن بەرىپ وتىر. قىتاي – ەۋروپا حالىقارالىق كولىك ءدالىزى، ۇلكەن الماتى اينالما اۆتوجولى، زاماناۋي لوگيستيكالىق حابتار مەن قويمالار جەرگىلىكتى كاسىپورىندارعا ونىمدەرىن سىرتقى نارىقتارعا جىلدام جەتكىزۋگە مۇمكىندىك بەرەدى. سونىڭ ارقاسىندا وبلىس كاسىپورىندارى جاڭا نارىقتارعا شىعىپ، ەكسپورت كولەمىن ۇلعايتىپ كەلەدى»، – دەدى ايبول راقىمباەۆ.
وڭىردەگى كاسىپورىنداردىڭ جەتىستىكتەرى ەكسپورت كولەمىنىڭ تۇراقتى ءوسىپ كەلە جاتقانىن كورسەتەدى. ماسەلەن، Shin-Line كومپانياسى وتكەن جىلى قىتايعا، ساۋد ارابياسىنا جانە تمد ەلدەرىنە رەكوردتىق كولەمدە – 15 مىڭ توننا بالمۇزداق ەكسپورتتادى. Fruit Art پەن LST AGRO كاسىپورىندارىندا وندىرىلەتىن قىزاناق پەن سۋبليماتسيالانعان ونىمدەردىڭ 90 پايىزى رەسەيدىڭ ءىرى ساۋدا جەلىلەرىنە جونەلتىلەدى. ال RG Brands Kazakhstan كومپانياسى شىرىن، سۋسىن جانە شاي ونىمدەرىن ەكسپورتتاۋ ارقىلى جىل سايىن شامامەن 60 ملن اقش دوللارى كولەمىندە تابىس تابادى.
